Gud Nyus Long Intanet

Long taem ya blong yumi we ol man blong sayens oli wokem plante nyufala samting, samfala oli dipen long ol rod olsem Intanet, blong kasem ol save blong olgeta. Taswe, naoia Sosaeti i putum stret save long saed blong ol bilif mo wok blong ol Wetnes blong Jeova, i go long Intanet.

Adres blong yumi long Intanet Web, hemia http://www.watchtower.org mo long ples ya, yu save faenem plante defren traket, buklet, mo sam haf blong Wajtaoa mo Wekap! long lanwis Engglis, lanwis blong Jaena (Isi), Jemani, Rasia, Spen, mo sam narafala lanwis bakegen. Ol buk ya long Web oli sem mak long olgeta we yumi yusum long kongregesen mo long wok blong prij. Risen from wanem yumi gat wan ples long Web, i no blong soemaot ol nyufala buk, be blong givim save long ol man. Taswe, i no gat nid blong wan long yumi i mekemrere ol save long saed blong ol Wetnes blong Jeova, wok mo bilif blong olgeta, blong putum i go long Intanet. I gat stret save i stap finis long Web blong eni man we i wantem.

Ples blong yumi long Web i no gat rod blong sanem mesej (E-mail), be hem i talem adres blong ofis blong Sosaeti, long ol defren ples blong wol. Taswe, ol man oli save raetem leta blong kasem moa save no blong askem ol Wetnes blong kam luk olgeta. Yu save givim adres blong Intanet antap, long eni man we i wantem yusum rod ya blong stat kasem save long ol trutok blong Baebol.