No Westem Taem Long “Wok We i No Gat Frut Long Hem”
1 Wan bigfala rod we ol man oli stap yusum tede blong toktok i go long ol narafala, hemia E-mail. I stret nomo we yumi yusum rod ya blong serem ol nius mo tingting blong yumi wetem ol fren mo famle. ?Be olsem wanem fasin ya blong yusum E-mail i save kam wan “wok we i no gat frut blong hem”?—Prov. 12:11.
2 Woning Long Saed Blong E-Mail: Samfala oli harem se oli stap klosap moa long ogenaesesen blong Jeova taem oli stap kasem ol niufala save oltaem long E-mail. Maet oli kasem ol stori blong prij, sam save long ol samting we i stap hapen long Betel, ol disasta mo hadtaem we ol brata oli stap kasem, mo samtaem ol save we i no blong talemaot tu, we i kamaot long ol Kingdom Ministri Skul. Samfala oli wantem stap olsem faswan man blong sanem olkaen mesej olsem, mo blong talemaot ol save ya long ol fren blong olgeta.
3 Sam samtaem, oli jenisim ol save ya no oli bitim mak long ol stori we oli talem. No oli talemaot save ya long fasin we i no givim trufala mining blong hem, maet from we oli wantem mekem ol fren blong olgeta oli sapraes. Plante taem, oli hareap blong talemaot wan samting long narafala, be oli no gat olgeta save long bisnes ya tu. (Prov. 29:20) Samfala oli kasem wan stori we i bitim mak, mo nating se oli no bilivim, be oli sanem i go long narafala from oli ting se maet narafala i glad blong ridim nomo. Ol stori olsem we oli no stret no oli givim rong tingting long narafala, oli rili olsem ‘ol kastom stori we oli no tru,’ mo oli no pulum narafala blong ona gud long God.—1 Tim. 4:6, 7.
4 Maet yu no save se wan stori i giaman, be sipos yu sanem stori ya i go long narafala mo i mekem trabol i kamaot, yu yu gat fol nao. Taem Deved i kasem giaman nius ya se ol pikinini blong hem oli ded, hem i harem nogud tumas, “i girap, i terem ol klos blong hem.” Be, trufala samting se wan nomo long ol pikinini blong hem, i ded. Hemia i nogud tu, be giaman save we hem i kasem antap long samting ya, i mekem hem i harem nogud moa. (2 Saml. 13:30-33) I sua se yumi no wantem mekem wan samting we i save givim rong tingting long ol brata blong yumi no mekem tingting blong olgeta i foldaon.
5 Rod We God i Stap Yusum: Yumi no mas fogetem se Papa blong yumi long heven i putumap wan rod finis blong sanem toktok i kam long yumi, hemia “slef we i stret mo waes.” Wok blong “slef” ya i blong jusum wanem save ol famle blong hem long saed blong spirit oli mas kasem, mo wetaem i “stret taem” blong givimaot save ya long olgeta. Kakae ya long saed blong spirit, yumi save kasem nomo tru long tiokratik ogenaesesen. Oltaem yumi mas lukluk i go long rod ya we God i stap yusum blong yumi save kasem ol trufala save, be yumi no mas lukluk i go long ol man we oli stap toktok long yumi long Internet.—Mat. 24:45, NW.
6 Ol Adres Long Internet: Sosaeti i gat wan web saet long Internet, we adres blong hem: www.watchtower.org. Web saet ya i naf blong givim save we ol man oli wantem long saed blong yumi. I no gat nid blong eni man, komiti, no kongregesen, i mekemrere ol save long saed blong ol Witnes blong Jeova, blong putum long Internet. Samfala oli bin putum ol save we i kamaot long ol buk blong yumi wetem ol vas mo refrens fulwan. Oli bin talem tu se oli save givim ol save we i kamaot long ol distrik asembli sipos ol man oli wantem sanem smol presen mane i kam. Nating se i blong kasem mane no nogat, be fasin ya blong putum ol pej blong ol buk blong ol Witnes blong Jeova long Internet, hemia i agensem loa blong kopiraet. Maet samfala oli ting se oli stap halpem ol brata, be fasin ya i no stret mo i mas stop.
7 Sipos yumi gat stret tingting mo fasin luksave taem yumi yusum kompiuta blong sanem toktok i go long narafala, bambae yumi meksua se tingting blong yumi i fulap nomo wetem “ol gudgudfala samting, we praes blong olgeta i antap moa.”—Prov. 24:4.