LAEF BLONG OL KRISTIN
Traehad Blong Faenemaot Tingting Blong God
Yumi wantem se Jehova i glad long evri samting we yumi mekem. (Pro 27:11) Taswe, ol desisen blong yumi oli mas laenap wetem tingting blong hem, nating sipos i no gat wan klia loa long saed ya. ?Wanem i save givhan long yumi?
Folem wan program blong stadi Baebol. Taem yumi ridim Baebol, i olsem we yumi stap spenem taem wetem Jehova. Yumi kasemsave long tingting blong Jehova taem yumi luk olsem wanem hem i mekem long ol man blong hem bifo, mo taem yumi stadi long fasin blong ol gudfala man mo ol man nogud. Taem yumi mas mekem wan desisen, tabu spirit i save halpem yumi blong tingbaot ol impoten lesen mo rul we yumi lanem long Tok blong God.—Jon 14:26.
Mekem risej. Taem yu mas mekem wan desisen, traem tingbaot kwestin ya: ‘?Wanem ol vas mo stori long Baebol we oli save halpem mi blong kasemsave tingting blong Jehova?’ Prea blong askem help blong Jehova, mo yusum ol tul blong mekem risej long lanwis blong yu. Hemia bambae i halpem yu blong faenem mo folem ol advaes blong Baebol we i stret long situesen blong yu.—Sam 25:4.
WAJEM VIDEO YA YUMI MAS ‘STANAP STRONG MO RON’—KAKAE OL GUDFALA KAKAE, MO ANSAREM OL KWESTIN YA:
?Yangfala sista long video ya i kasem wanem trabol?
?Olsem wanem blong yusum ol tul blong risej, taem yu yu kasem wan trabol olsem?
Sipos yumi tekem taem blong mekem risej mo prapa stadi blong yumi, ?olsem wanem samting ya i save halpem yumi blong mekem ol gudfala desisen?—Hib 5:13, 14