Yumi Lavem Tumas Papa Blong Yumi, Jehova

1-2. ?From wanem Jehova i mekem rod blong yumi save joen long famle blong hem? ?Mo hem i mekem olsem wanem?

JEHOVA i invaetem yumi blong joen long bigfala famle blong ol man we oli wosipim hem. !Yumi glad tumas long samting ya! Olgeta we oli stap long famle ya oli givim laef blong olgeta i go long God, mo oli soemaot bilif long ransom sakrefaes blong Pikinini blong hem. Yumi stap long wan famle we i glad. Yumi harem gud long laef naoia, mo yumi gat wan nambawan hop blong laef olwe long fiuja, long heven o long Paradaes long wol.

² From we Jehova i lavem yumi, hem i mekem rod blong yumi save joen long famle blong hem. Be hem i mas lego Pikinini ya we i impoten tumas long hem. (Jon 3:16) Hem i ‘pemaot yumi long wan praes.’ (1 Kor. 6:20) Ransom ya i mekem se yumi save fren gud wetem Jehova, we i hae moa long ol narafala long heven mo wol, mo yumi gat bigfala blesing blong singaot hem se Papa. Olsem yumi tokbaot long las stadi, i no gat wan narafala papa we i olsem Jehova.

3. ?Maet yumi gat wanem tingting? (Yu luk bokis ya “?Jehova i Stap Luk Mi?”)

³ Maet yumi gat sem tingting olsem wan man blong raetem Baebol, we i talem se: “Hae God i stap mekem i gud tumas long mi. ?Bambae mi save givim wanem presen long hem?” (Sam 116:12) Ansa blong kwestin ya se, i no gat wan presen we i naf blong pembak Papa blong yumi long heven from samting we hem i mekem long yumi. Nating se i olsem, yumi wantem soemaot lav long hem. Aposol Jon i raetem se: “Yumi stap lavem ol narafala, from we God i lavem yumi fastaem.” (1 Jon 4:19) ?Olsem wanem blong soemaot lav long Papa blong yumi long heven?

KAM KLOSAP LONG JEHOVA

4. Folem Jemes 4:8, ?from wanem yumi mas traehad blong kam klosap long Jehova?

⁴ Jehova i wantem se yumi kam klosap long hem mo toktok long hem. (Ridim Jemes 4:8.) Hem i talem long yumi blong “prea oltaem,” mo hem i rere blong lesin enitaem nomo. (Rom 12:12) Hem i neva bisi tumas blong lesin long yumi, mo hem i no save taed. Yumi lesin long hem taem yumi ridim Baebol mo ol buk we oli halpem yumi blong kasem save long Baebol. Mo taem yumi lesin gud long ol miting, yumi stap lesin long Jehova. Sipos ol pikinini oli toktok oltaem long papa mo mama blong olgeta, bambae oli kam klosap long tufala. Long sem fasin, sipos yumi toktok oltaem long Jehova, bambae yumi kam klosap long hem.

5. ?Olsem wanem blong mekem ol prea blong yu oli kam gud moa?

⁵ Traem tingbaot ol prea blong yumi. Jehova i wantem se yumi talemaot evri samting we i stap long hat blong yumi. (Sam 62:8) I gud yu tingbaot se: ‘?Ol prea blong mi oli olsem mesej we man i kopi bakegen mo bakegen, o oli olsem leta we man i raetem blong talemaot ol filing blong hem?’ I sua se yu lavem Jehova tumas mo yu wantem fren gud oltaem wetem hem. Blong mekem olsem, yu mas toktok long hem oltaem. Talemaot long hem ol samting we yu no save talemaot long narafala. Tokbaot ol samting we oli mekem yu yu glad mo ol samting we yu harem nogud from. Mo yu mas gat strong tingting se hem i save givhan long yu.

6. ?Yumi mas mekem wanem blong stap klosap long Papa blong yumi long heven?

⁶ Blong stap klosap long Papa blong yumi long heven, oltaem yumi mas talem tangkiu long hem. Yumi gat sem tingting olsem man we i raetem Sam ya, se: “Hae God, yu yu God blong mifala. Yu yu mekem plante samting finis blong givhan long mifala. I no gat narafala god we i olsem yu. Yu mekem plante gudfala plan blong mifala i folem. Mi mi no save tokbaot olgeta evriwan, oli plante tumas.” (Sam 40:5) Yumi no harem nomo se yumi glad long ol samting we Jehova i givim, be yumi talem tangkiu tu long hem, long ol toktok mo aksen blong yumi. Hemia i mekem yumi defren long plante narafala man tede. Bighaf blong ol man oli no talem tangkiu long God. Blong talem stret, wan samting we i soemaot se yumi stap long “ol las dei,” hemia se ol man oli no moa talem tangkiu. (2 Tim. 3:1, 2) !Yumi neva mas kam olsem!

7. ?Jehova i wantem se yumi mekem wanem, mo from wanem?

⁷ Ol papa mo mama oli no wantem se ol pikinini blong olgeta oli raorao, be oli wantem se oli fren gud. Long sem fasin, Jehova i wantem se ol pikinini blong hem oli fren gud. Taem yumi lavlavem yumi, yumi soemaot se yumi ol tru Kristin. (Jon 13:35) Yumi agri wetem man we i raetem Sam ya, se: “I gud tumas taem ol man blong God oli stap wanples, we oli gat wan tingting nomo.” (Sam 133:1) Taem yumi lavem ol brata mo sista, yumi soemaot se yumi lavem Jehova. (1 Jon 4:20) !I gud tumas blong stap insaed long wan famle blong ol brata mo sista we oli ‘kaen mo oli gat sore’!—Efes. 4:32.

YU SOEMAOT LAV TAEM YU OBEI

8. Folem 1 Jon 5:3, ?wanem bigfala risen blong obei long Jehova?

⁸ Jehova i wantem se ol pikinini oli obei long papa mo mama blong olgeta, mo i wantem se yumi tu yumi obei long hem. (Efes. 6:1) I stret nomo we yumi obei long hem from we hem i wokem yumi, i givim evri samting we yumi nidim blong laef, mo i waes moa i bitim ol narafala papa. Be bigfala risen blong obei long Jehova, hemia from we yumi lavem hem. (Ridim 1 Jon 5:3.) I gat plante risen blong obei long Jehova, be hem i no fosem yumi blong obei. Hem i mekem yumi we yumi naf blong jusum rod we yumi wantem folem, taswe hem i glad taem yumi obei long hem from we yumi lavem hem.

9-10. ?From wanem i impoten blong save ol rul blong God mo folem olgeta?

⁹ Ol papa mo mama oli wantem se ol pikinini blong olgeta oli stap sef. Taswe oli mekem sam rul we pikinini i mas folem blong protektem hem. Taem pikinini i obei long ol rul ya, hem i soemaot se i trastem mo i respektem papa mo mama blong hem. Samting we i moa impoten, se yumi mas save ol rul we Papa blong yumi long heven i mekem, mo yumi mas folem olgeta. Taem yumi mekem olsem, yumi soemaot se yumi lavem mo respektem Jehova, mo yumi mekem i gud long yumi bakegen. (Aes. 48:17, 18) Be olgeta we oli no wantem save long Jehova mo ol rul blong hem, oli spolem olgeta bakegen.—Gal. 6:7, 8.

¹⁰ Taem yumi laef long fasin we Jehova i glad long hem, yumi blokem plante trabol we yumi save kasem long bodi mo tingting, mo ol samting we oli save mekem se yumi no moa fren gud wetem Jehova. Hem i save samting we i moa gud long yumi. Wan sista blong Yunaeted Stet, nem blong hem Orora, i talem se: “Mi save se sipos mi obei long Jehova, laef blong mi bambae i gud moa i bitim ol narafala.” Hemia i tru tumas. ?Olsem wanem laef blong yu i gud moa from we yu obei long Jehova?

11. ?Olsem wanem prea i save givhan long yumi?

¹¹ Prea i save givhan long yumi blong yumi obei. Samtaem i had blong obei long Jehova, taswe oltaem yumi mas faet agensem sin we i stap long yumi. Man blong raetem Sam i askem long God se: “Plis yu mekem mi mi wantem blong obei long yu.” (Sam 51:12) Denis, wan sista we i fultaem paenia, i talem se: “Taem i had blong obei long wan loa blong Jehova, mi prea blong gat strong tingting blong mekem samting we i stret.” Yumi save se oltaem Jehova bambae i ansarem wan prea olsem.—Luk 11:9-13.

HALPEM OL NARAFALA BLONG OLI LAVEM PAPA JEHOVA

12. Folem Efesas 5:1, ?yumi mas mekem wanem?

¹² Ridim Efesas 5:1. Yumi ‘ol pikinini blong Jehova we hem i lavem tumas,’ taswe yumi traehad blong folem fasin blong hem. Yumi mekem olsem taem yumi soemaot lav, yumi kaen, mo yumi fogivim narafala. Taem olgeta we oli no save God oli luk gudfala fasin blong yumi, maet oli wantem kasem save moa long hem. (1 Pita 2:12) Ol papa mo mama we oli trufala Kristin, oli mas mekem sem mak long ol pikinini blong olgeta olsem Jehova i mekem long yumi. Taem oli mekem olsem, maet ol pikinini tu oli wantem kam fren blong Papa blong yumi long heven.

13. Blong winim fraet, ?yumi mas tingbaot wanem?

¹³ Smol pikinini i praod long papa blong hem mo i glad blong tokbaot hem. Long sem fasin, yumi praod long Papa blong yumi long heven, Jehova, mo yumi wantem se ol narafala oli save hem. Yumi gat sem filing long hat blong yumi olsem King Deved, we i raetem se: “Bambae mi presem [Jehova] from ol samting we hem i mekem.” (Sam 34:2) ?Olsem wanem sipos yumi fraet blong tokbaot Jehova? ?Olsem wanem blong winim fraet ya? Bambae yumi no moa fraet sipos yumi tingbaot se Jehova i glad tumas taem yumi tokbaot hem, mo tu, ol narafala bambae oli harem gud tumas sipos oli kasem save long hem. Jehova i save mekem se yumi no moa fraet. Hem i givhan long ol Kristin bifo blong oli no fraet, mo bambae hem i givhan long yumi tu.—1 Tes. 2:2.

14. ?From wanem i impoten blong joen long wok blong pulum ol man oli kam disaepol?

¹⁴ Jehova i stap mekem i sem mak long olgeta man, taswe hem i glad taem hem i luk we yumi soemaot lav long olkaen man. (Wok 10:34, 35) Rod we i beswan blong soemaot lav, hemia blong talemaot gud nius. (Mat. 28:19, 20) ?Wanem frut i save kamaot? Olgeta we oli lesin oli save gat wan laef we i moa gud naoia, mo oli kasem hop blong laef olwe long fiuja.—1 Tim. 4:16.

LAVEM PAPA JEHOVA MO STAP GLAD

15-16. ?Wanem sam risen blong glad?

¹⁵ Jehova i wan Papa we i gat lav, taswe hem i wantem se ol famle blong hem oli hapi. (Aes. 65:14) I gat plante risen blong glad, nating se maet yumi stap fesem hadtaem. Sam risen: Yumi save se Papa blong yumi long heven i lavem yumi tumas. Yumi gat stret save long Baebol, Tok blong God. (Jer. 15:16) Mo yumi stap long wan spesel famle blong ol man we oli lavem Jehova, oli lavem ol loa blong hem, mo oli lavlavem olgeta.—Sam 106:4, 5.

¹⁶ Yumi save glad from we yumi gat wan hop we i sua, se laef blong yumi bambae i kam gud moa long fiuja. Yumi save se i no longtaem, Jehova bambae i spolem ol rabis man, mo Kingdom bambae i mekem wol ya i kam Paradaes. Mo tu, yumi gat nambawan hop ya blong joen wetem ol fren mo famle taem oli laef bakegen. (Jon 5:28, 29) !Traem tingbaot bigfala glad we bambae yumi kasem! Samting we i moa impoten, yumi sua se i no longtaem, evriwan long heven mo long wol bambae oli presem, wosipim, mo givim ona long Papa Jehova, olsem we i stret blong hem i kasem.