Evriwan i Wantem Gat Wan Fiuja We i Sef
?Yu yu wantem se fiuja blong yu i olsem wanem? Plante man oli wantem se famle blong olgeta i stap gud mo i sef. Oli wantem glad, gat gudfala helt, gat pis, mo gat inaf mane. I sua se yu tu yu wantem gat wan fiuja olsem.
Plante man oli no sua se bambae oli kasem fiuja ya we oli wantem o nogat. From we eni samting i save hapen enitaem, olsem COVID-19 we i spolem ol man, i afektem ekonomi mo i kilim plante man i ded. Taswe oli wari long fiuja.
Hemia i mekem se plante man oli lukaot rod blong faenem wan gudfala fiuja. Sam man oli ting se gudlak mo badlak i stap kontrolem laef blong olgeta. Plante narafala oli ting se edukesen mo mane i save givhan long olgeta blong kasem samting we oli wantem. Mo samfala oli ting se sipos oli gat ol gudfala fasin, bambae oli gat wan gudfala laef.
?Yu ting se ol samting ya oli save givhan long yu blong gat wan gudfala fiuja? Blong faenemaot, i gud yu tingbaot ol kwestin ya:
?Wanem i save talemaot fiuja blong yu?
?Edukesen mo mane i save mekem se yu gat wan gudfala laef?
?I tru se yu mas kam wan gudfala man blong gat wan gudfala fiuja?
?Weples yumi save faenem ol advaes we yumi save trastem?
Wajtaoa ya i save givhan long yu blong faenem ansa blong ol kwestin ya.