?I Tru Se Yu Mas Kam Wan Gudfala Man Blong Gat Wan Gudfala Fiuja?

Long ol handred yia we i pas, plante man oli harem se sipos oli stap mekem ol gudfala fasin, bambae oli gat wan gudfala fiuja. Eksampol, plante man long Esia oli agri wetem tingting blong tija ya Confucius (551-479 B.K.T.) we i talem se: “Samting we yu no wantem ol narafala oli mekem long yu, yu no mas mekem long olgeta.”a

PLANTE OLI TRAEHAD BLONG MEKEM OL GUDFALA FASIN

Plante man oli stil bilif se sipos oli gat ol gudfala fasin, bambae oli gat wan gudfala fiuja. Taswe oli traem blong gat respek, soem ol gudfala fasin, wok had long komuniti, mo gat tingting we i klin. Woman ya Linh we i stap long Vietnam, i talem se: “Mi bilif se sipos oltaem mi mekem i stret mo mi no stap giaman, bambae mi gat wan gudfala laef.”

Sem woman ya i givim kakae long ol pua man mo olgeta we oli nogat ples blong slip.

Sam oli mekem ol gudfala fasin, from we relijen i pulum olgeta blong mekem olsem. Hsu-Yun, wan man we i laef long Taewan i talem se: “Relijen blong mi i tijim mi se sipos man i stap mekem ol gudfala samting taem hem i laef, bambae hem i kasem blesing afta we hem i ded. Mo sipos hem i stap mekem ol nogud samting, bambae hem i safa from.”

?OL GUDFALA FASIN I RILI GIVHAN?

Long en blong dei, woman ya i stap holem pikinini blong hem, i luk taet mo i no glad.

Taem yumi mekem i gud long ol narafala, i tru se bambae yumi kasem plante gudfala samting. Be plante we oli traehad blong mekem i gud long ol narafala, oli luk se ol narafala oli no mekem i gud long olgeta. Shiu Ping we i laef long Hong Kong i talem se: “Long ekspiriens blong mi, mi lanem se i no oltaem we bae yu kasem ol samting we i gud. Mi traem bes blong mi blong kea long famle blong mi mo gat ol gudfala fasin, be mared blong mi i brok, mo hasban blong mi i lego mi wetem boe blong mi.”

Plante oli faenemaot se i no evriwan we oli stap go long jos, we oli gat ol gudfala fasin. Etsuko, wan woman we i laef long Japan i talem se: “Mi joenem wan relijen mo mi kam wan daerekta blong oganaesem ol aktiviti blong ol yangfala. Mi sek taem mi luk se ol man blong jos oli mekem ol rabis fasin, oli hanggri from paoa, mo oli misyusum mane blong jos.”

“Mi traem bes blong mi blong kea long famle blong mi mo gat ol gudfala fasin, be mared blong mi i brok, mo hasban blong mi i lego mi wetem boe blong mi.”—SHIU PING, HONG KONG

Samfala we oli strong long jos blong olgeta mo oli traehad blong mekem ol gudfala samting, oli harem nogud taem nogud samting i hapen long olgeta. Van we i wan woman Vietnam i harem olsem, hem i talem se: “Evri dei mi pem ol frut, flaoa, mo ol kakae, mo mi kam putum long olta blong ona long famle we i ded, from mi bilif se hemia bambae i mekem se mi gat wan gudfala fiuja. Nating se blong plante yia mi mekem ol gudfala fasin mo mi folemgud fasin blong wosip, be stil hasban blong mi i kasem wan rabis sik, mo tu, gel blong mi i ded taem hem i stap stadi long wan narafala kantri.”

GAT OL GUDFALA FASIN I NO NAF

Gat ol gudfala fasin i impoten, be i no naf blong givim wan fiuja we i sef. ?From wanem? Makem samting we Tabu Buk i talem.

I NO EVRIWAN WE I MEKEM OL GUDFALA FASIN

“Wan man blong mekem sin nomo i save spolem plante gudfala samting.”—PRIJA 9:18.

Nating se yu traem blong mekem ol gudfala fasin, be olgeta we oli tingbaot olgeta nomo, oli save spolem yu. Eksampol, long taem blong pandemik yu folemgud ol advaes blong ol otoriti mo yu traem blong no joen wetem ol narafala. ?Be wanem bambae i hapen sipos sam man oli no obei? Aksen blong olgeta i save spolem helt blong olgeta we oli traem blong mekem samting we i stret.

OL MAN OLI SAVE MESTEM MO MEKEM I RONG

“I gat wan rod i stap we man i ting se i stret nomo, be long en, hem i lidim man i go long ded.”—OL PROVEB 14:12.

Plante man oli mekem ol samting we oli ting se i stret blong mekem be biaen oli faenem se oli rong. Nating se oli wantem mekem i stret, be sipos samting ya i rong, bambae hem i stil kasem trabol from.

YUMI NO SAVE FIUJA BLONG YUMI

“Yufala i no save se tumoro laef blong yufala bambae i olsem wanem.”—JEMES 4:14.

Nating se wan man i wan gudfala man, be nogud samting i save kasem hem. Eksampol, long taem blong COVID-19 pandemik, plante volontia oli ded taem oli stap halpem ol narafala. O makem ekspiriens blong Liting, wan woman long Jaena we papa blong hem i ded long wan aksiden long trak. Hem i talem se: “Mi no kasemsave from wanem wan gudfala man olsem i ded. Papa blong mi i wok had, i gat tingtingdaon mo i tok tru oltaem. Hem nomo i ded long aksiden ya.”

Ol gudfala fasin nomo oli no naf blong mekem se yu gat wan gudfala fiuja. ?So wanem i save givhan? Blong ansarem kwestin ya, yumi nidim wan samting we yumi save trastem blong i lidim yumi blong gat wan fiuja we i sef. ?Weples yumi save faenem wan samting olsem?

a Blong tokbaot paoa blong tijing blong Confucius, go long japta 7, long paragraf 31-35, blong buk ya Mankind’s Search for God we ol Witnes blong Jehova oli wokem, mo i stap tu long websaet ya www.jw.org