Yang Man—?Olsem Wanem Blong Winim Tras Blong Ol Narafala?

1. ?Wanem i tru long saed blong ol yangfala brata blong yumi?

YANGFALA brata, yu save mekem plante samting blong givhan long kongregesen. Plante long yufala i strong mo i gat paoa. (Prov. 20:29) Kongregesen i save yusum yu long plante samting. Maet yu luk fowod long taem ya we bambae yu kam man blong givhan. Be maet ol narafala oli ting se yu yang tumas, o se yu no gat ekspiriens blong mekem ol impoten wok. Nating se yu yang, i gat sam samting we yu save mekem naoia blong winim tras mo respek blong olgeta long kongregesen.

2. ?Bambae yumi tokbaot wanem long stadi ya?

² Long stadi ya, bambae yumi fokas long laef blong King Deved. Mo tu, bambae yumi tokbaot Asa mo Jehosafat we tufala i king blong Juda. Bambae yumi tokbaot sam jalens we trifala i fesem, riaksen blong trifala, mo lesen we ol yangfala brata oli save lanem long eksampol blong olgeta.

LANEM LESEN LONG KING DEVED

3. ?Wanem wan samting we ol yangfala oli save mekem blong givhan long ol olfala?

³ Taem Deved i yangfala, hem i lanem sam skils we ol narafala oli laekem. I klia se hem i bigman long spirit, mo hem i lanem blong plei miusik, mo hem i yusum skils ya blong mekem i gud long Sol, king ya we God i putumap. (1 Saml. 16:16, 23) ?Yangfala man, yu yu gat sam skils we i save givhan long ol narafala long kongregesen? Plante long yufala i gat. Eksampol, maet yu luk sam olfala we oli glad tumas taem ol yangfala oli givhan long olgeta blong yusumgud tablet mo fon, blong oli save mekem prapa stadi blong olgeta mo blong yusum long ol miting. Save blong yu long teknoloji bambae i givhan long ol olfala olsem.

4. Olsem Deved, ?ol yangfala brata oli mas lanem blong gat wanem fasin? (Yu luk pija long fran pej.)

⁴ Evri dei, Deved i soem se hem i save mekem ol wok mo se ol narafala oli save trastem hem. Eksampol, taem hem i yangfala, hem i lukaotgud long ol sipsip blong papa blong hem. Hemia wan wok we i gat denja long hem. Deved i eksplenem long King Sol se: “Masta blong mi, taem mi stap lukaot long ol sipsip blong papa blong mi, wan laeon i kam tekemaot wan sipsip mo i karem i go. Biaen wan bea i mekem sem mak. Mi mi folem hem mo mi kilim hem, nao mi tekemaot sipsip ya long maot blong hem.” (1 Saml. 17:34, 35) Deved i filim se hemia responsabiliti blong hem blong lukaotgud long ol sipsip ya, mo hem i no fraet blong go sevem olgeta. Ol yangfala brata oli save folem eksampol blong Deved, taem oli mekemgud eni wok we narafala i givim long olgeta.

5. Folem Ol Sam 25:14, ?wanem impoten samting we ol yangfala brata oli save mekem?

⁵ Yangfala Deved i traehad blong frengud wetem Jehova. Frensip ya i impoten moa i bitim fasin blong Deved blong no fraet mo skils blong hem blong plei hap. Jehova i no God blong Deved nomo, be hem i Fren blong hem tu, wan gudfala fren. (Ridim Ol Sam 25:14.) Yangfala brata, impoten samting we yu save mekem, hemia blong traehad blong frengud moa wetem Papa blong yu long heven, olsem nao yu save kasem sam moa wok long kongregesen.

6. ?Wanem nogud tingting we samfala oli gat long Deved?

⁶ Deved i mas winim ol nogud tingting we ol narafala oli gat long hem. Tingbaot, taem hem i wantem go faet agensem Golaeat, King Sol i wantem stopem hem, i se: “Yu yu wan yang boe nomo.” (1 Saml. 17:31-33) Bifo long hemia, brata blong Deved i tok long hem se hem i no stap mekemgud wok blong hem. (1 Saml. 17:26-30) Be Jehova i no luk Deved se i yang tumas o i no save mekemgud wok. Hem i savegud yangfala man ya. Mo taem Deved i dipen long Fren blong hem Jehova blong i givim paoa long hem, hem i kilim Golaeat i ded.—1 Saml. 17:45, 48-51.

7. ?Yu save lanem wanem long stori blong Deved?

⁷ ?Yu save lanem wanem long ekspiriens ya? Yumi lanem se yumi mas gat longfala tingting. Maet i tektaem blong ol man we oli save yu taem yu smol, oli tingbaot se naoia yu wan yang man. Be yu save sua se Jehova i no lukluk bodi nomo, be hem i go moa. Hem i savegud yu mo wanem yu naf blong mekem. (1 Saml. 16:7) Mekem frensip blong yu wetem God i kam strong moa. Deved i mekem olsem taem hem i lukluk gud ol kriesen blong Jehova. Hem i tingting dip long ol wok ya, blong i kasemsave long God we i krietem olgeta. (Sam 8:3, 4; 139:14; Rom 1:20) Wan nara samting we yu save mekem, hemia blong lukluk i go long Jehova blong i givim paoa long yu. Eksampol, ?sam fren long skul oli jikim yu from we yu yu wan Witnes Blong Jehova? Sipos i olsem, prea long Jehova blong i givhan long yu blong dil wetem jalens ya. Mo yu folem ol advaes we yu faenem long Tok blong hem, long ol buk we oli tokbaot Baebol, mo long ol video. Bambae yu trastem Jehova moa sipos yu luk we hem i stap halpem yu blong winim ol jalens. Antap moa, taem ol narafala oli luk se yu stap dipen long Jehova, bambae oli trastem yu.

8-9. ?Wanem i halpem Deved blong i wet wetem longfala tingting bifo we i rul? ?Ol yangfala brata oli save lanem wanem long eksampol blong hem?

⁸ Tingbaot wan narafala jalens we Deved i fesem. Afta we oli makemaot hem blong i kam king, hem i mas wet plante yia bifo we hem i rul long Juda. (1 Saml. 16:13; 2 Saml. 2:3, 4) Long ol yia ya, ?wanem i halpem hem blong i wet wetem longfala tingting? Deved i fokas long samting we hem i save mekem, i bitim we tingting blong hem i foldaon nao i no mekem wan samting. Eksampol, taem hem i stap haed long teritori blong ol man Filistia, hem i tekem janis ya blong faet agensem ol enemi blong Isrel. Taem hem i mekem olsem, hem i stap protektem ol boda blong teritori blong Juda.—1 Saml. 27:1-12.

⁹ ?Ol yangfala brata oli save lanem wanem long eksampol blong hem? Yusum evri janis we yu gat blong givhan long ol brata. Tingbaot ekspiriens blong Ricardo.b Stat taem hem i yang nomo, hem i wantem tumas blong kam wan fultaem paenia. Be hem i no rere yet. Nating se i olsem, hem i no givap o i kam kros, be hem i spenem plante taem moa long wok blong prij. Hem i se: “Taem mi tingtingbak, mi luk se i stret nomo blong mi mekem sam moa progres. Mi fokas blong visitim ol man we oli intres, mo blong mekem gud ol visit. Mo tu mi statem faswan Baebol stadi blong mi. Taem mi kamgud moa long wok ya, mi no moa fraet.” Naoia Ricardo i wan gudfala fultaem paenia mo man blong givhan.

10. Bifo we Deved i mekem wan impoten desisen, ?hem i mekem wanem?

¹⁰ Tingbaot wan nara stori blong Deved. Taem we hem mo ol man blong hem oli stap haed, oli lego ol famle blong olgeta i stap nao oli go faet. Taem oli stap longwe, ol enemi oli kam stilim olting blong olgeta wetem ol famle blong olgeta. Deved i save gat tingting ya se hem i gat ekspiriens blong faet, taswe hem i save wokem wan gudfala plan blong go sevem ol famle ya. Be hem i no mekem. Hem i lukluk i go long Jehova blong i lidim hem. Wetem help blong pris ya Abiata, Deved i askem long Jehova se: “?I stret blong mi biaenem grup blong ol raskol ya?” Jehova i ansa se Deved i mas go, mo i talem se bambae hem i winim olgeta. (1 Saml. 30:7-10) ?Yu save lanem wanem long stori ya?

11. ?Yu save mekem wanem bifo we yu mekem desisen?

¹¹ Lukaotem advaes bifo we yu mekem desisen. Toktok wetem ol perens blong yu. Yu save kasem ol gudfala advaes tu long ol elda we oli gat ekspiriens. Jehova i trastem ol man ya we hem i putumap, mo yu tu yu save trastem olgeta. Jehova i luk olgeta olsem ol “presen” long kongregesen. (Efes. 4:8) Bambae yu kasem blesing sipos yu folem bilif blong olgeta, mo yu lesin long ol waes advaes we oli givim. Naoia bambae yumi tokbaot samting we yumi save lanem long King Asa.

LANEM LESEN LONG KING ASA

12. ?Wanem ol gudfala fasin blong King Asa taem hem i stat blong rul?

¹² Taem King Asa i yang, hem i gat tingting daon mo i no fraet. Tingbaot, taem hem i tekem ples blong papa blong hem, Abaejah, hem i mekem wan kampen agensem wosip blong ol aedol. Mo tu, “hem i talem long Juda blong i lukaotem Jehova we i God blong ol olfala blong olgeta, mo blong i obei long Loa mo komanmen blong God.” (2 Kron. 14:1-7) Mo taem Jeraha blong Itiopia i kam wetem 1,000,000 soldia blong faet agensem Juda, Asa i waes blong askem help blong Jehova, hem i se: “O Jehova, yu yu no wari sipos olgeta we yu stap givhan long olgeta oli plante, o oli no gat paoa. Givhan long mifala, O Jehova, God blong mifala, from we mifala i stap dipen long yu.” Ol gudfala toktok ya oli soemaot se Asa i trastem Jehova bigwan blong i sevem hem mo ol man blong hem. Asa i trastem Papa blong hem long heven, mo “Jehova i winim ol man Itiopia.”—2 Kron. 14:8-12.

13. ?Wanem i hapen long Asa afta, mo from wanem?

¹³ Maet yu agri se hemia wan bigfala jalens taem Asa i fesem wan ami blong 1,000,000 soldia, be hem i winim jalens ya. Be sore tumas, taem hem i fesem wan narafala jalens we i smol moa, hem i no askem help blong Jehova. Taem rabis King Bahasa blong Isrel i mekem Asa i fraet, hem i girap i go askem help long king blong Siria. !Wan disasta i kamaot from desisen ya! Tru long profet Hanani, Jehova i talem long Asa se: “From we yu dipen long king blong Siria be yu no dipen long Jehova we i God blong yu, ol ami blong king blong Siria oli no moa stap long han blong yu, oli ronwe finis.” Blong talem stret, stat long taem ya, oltaem Asa i fesem ol faet. (2 Kron. 16:7, 9; 1 King 15:32) ?Hemia i tijim yu long wanem lesen?

14. ?Olsem wanem blong dipen long Jehova? Mo folem 1 Timoti 4:12, ?bambae yu soemaot wanem?

¹⁴ Gohed blong gat tingting daon mo gohed blong dipen long Jehova. Taem yu baptaes, yu soem se yu bilif strong long Jehova mo yu trastem hem. Mo Jehova i glad blong givim janis long yu blong kam wan memba blong famle blong hem. Naoia impoten samting i blong gohed blong dipen long Jehova. Maet i isi blong dipen long Jehova taem yu mas mekem ol bigfala desisen we i save jenisim laef blong yu, ?be olsem wanem long ol smosmol desisen? !I impoten tumas blong trastem Jehova taem yu mekem ol desisen, i minim tu ol pleplei, wok, mo ol samting we yu wantem kasem long laef! Yu no mas dipen long prapa waes blong yu. Be yu lukaotem ol rul blong Baebol we oli stret long situesen blong yu, mo yu folem ol rul ya. (Prov. 3:5, 6) Sipos yu mekem olsem, bambae yu mekem Jehova i glad, mo bambae olgeta long kongregesen oli respektem yu.—Ridim 1 Timoti 4:12.

LANEM LESEN LONG KING JEHOSAFAT

15. Folem 2 Kronikel 18:1-3; 19:2, ?wanem mastik we King Jehosafat i mekem?

¹⁵ I tru, olsem mifala, yu tu yu no stret gud olgeta, mo samtaem bambae yu mekem mastik. Be samting ya i no mas blokem yu blong yu mekem bes blong yu long wok blong Jehova. Tingbaot eksampol blong King Jehosafat. Hem i gat plante gudfala fasin. Taem hem i yang, “hem i lukaotem God blong papa blong hem, mo i folem komanmen blong hem.” Mo tu, hem i sanem ol prins oli go long olgeta ples long ol taon blong Juda blong tijim ol man long saed blong Jehova. (2 Kron. 17:4, 7) Be samtaem Jehosafat i mestem nao i mekem ol nogud desisen tu. Wan taem, hem i mekem wan nogud desisen, ale Jehova i yusum wan man blong hem blong stretem hem. (Ridim 2 Kronikel 18:1-3; 19:2.) ?Wanem lesen we yu save lanem long stori ya?

16. ?Yu save lanem wanem long ekspiriens blong Rajeev?

¹⁶ Akseptem advaes mo folem. Maet olsem plante yangfala man, i had blong yu putum ol impoten samting oli stap fasples long laef blong yu. Be yu no letem tingting blong yu i foldaon. Makem ekspiriens blong yang Brata Rajeev. Hem i tokbaot yangtaem blong hem, i se: “Long ol yia ya, samtaem mi harem se mi no save wanem blong mekem. Olsem plante narafala yangfala, mi mi intres moa long spot o blong gat gudtaem, i bitim we mi go long ol miting o go prij.” ?Wanem i halpem Rajeev? Wan elda we i wari long hem, i givim sam advaes long hem. Rajeev i talem se: “Hem i halpem mi blong tingting gud long rul we i stap long 1 Timoti 4:8.” Rajeev i gat tingting daon mo i folem advaes ya, nao i jekem ol samting we oli sud impoten moa long laef blong hem. Hem i se: “Mi jusum blong putum ol samting long spirit oli stap fasples long laef blong mi.” ?Wanem i kamaot from? Rajeev i eksplenem se: “Sam yia afta we mi kasem advaes ya, mi kasem mak blong kam man blong givhan.”

MEKEM PAPA BLONG YU LONG HEVEN I PRAOD

17. ?Wanem filing blong ol olfala long ol yangfala man we oli mekem wok blong Jehova?

¹⁷ !Ol olfala oli rili tinghae long yufala ol yangfala man, from we yufala i mekem wok blong Jehova wetem olgeta, “we solda blong wan i joen long solda blong narawan”! (Sef. 3:9) Oli laekem strong tingting mo paoa mo glad we yufala i soem, taem yufala i mekem ol wok we oli givim long yufala. Oli rili glad mo trastem yufala.—1 Jon 2:14.

18. Olsem Ol Proveb 27:11 i soem, ?wanem filing blong Jehova long ol yangfala man we oli mekem wok blong hem?

¹⁸ Yangfala brata, neva foget se Jehova i lavem yu mo i trastem yu. Hem i talemaot finis se long ol las dei, bambae plante yangfala man oli glad nomo blong kam, olsem ol ami. (Sam 110:1-3) Hem i save se yu lavem hem mo yu wantem mekem bes blong yu long wok blong hem. Taswe yu mas gat longfala tingting long ol narafala mo long yu tu. Taem yu mekem mastik, akseptem trening mo disiplin we yu kasem, mo yu luk olgeta olsem we oli kam long Jehova. (Hib. 12:6) Mekemgud ol wok we oli givim long yu. Mo antap long hemia, mekem Papa blong yu long heven i praod long yu long evri samting.—Ridim Ol Proveb 27:11.