?OLSEM WANEM BLONG BREKEM SAEKOL YA?

2 | No Mas Givimbak

Baebol i Tijim Se:

“Sipos wan man i mekem i nogud long yufala, yufala i no mas givimbak. . . . Yufala i mas mekem bes blong yufala blong yufala i gat pis wetem olgeta man. Ol gudfala fren, yufala i no mas givimbak, . . . from we Baebol i talem se: ‘Jehova i talem se, “Mi bambae mi givimbak. Mi nao bambae mi givim panis.”’”—ROM 12:17-19.

Mining Blong Vas:

Nating se i nomol blong kam kros taem narafala i mekem nogud long yumi, God i no wantem se yumi givimbak. Hem i wantem se yumi wet long hem, from i no longtaem bambae hem i stretem ol nogud fasin.—Ol Sam 37:7, 10.

Samting We Yu Save Mekem:

Taem ol sinman oli givimbak, hemia i save mekem fasin blong no laekem narafala i kam mowas. From samting ya, sipos wan man i mekem i nogud long yu, yu no mas givimbak. Traem kontrolem ol filing blong yu mo ansa long kwaet fasin. Samtaem, i gud blong fogetem nomo. (Ol Proveb 19:11) Be tu, sipos i oraet yu save ripotem problem ya. Eksampol, sipos ol man oli mekem bigfala trabol long yu, yu save ripotem olgeta long ol polis o long ol narafala otoriti.

Fasin blong givimbak bambae i spolem yu nomo

?Olsem wanem sipos i nogat rod blong solvem problem ya long pis? O ?Olsem wanem sipos yu bin traem evri samting finis be i no wok? Yu no mas givimbak. Hemia bambae i mekem situesen i kam mowas. Taem yu no givimbak, hemia i brekem saekol blong no laekem narafala. Yu save trastem God blong i solvem problem ya. “Yu dipen long hem, mo hem bambae i mekem samting long bihaf blong yu.”—Ol Sam 37:3-5.

Tru Stori—ADRIÁN

Winim Filing Ya Blong Wantem Givimbak

Taem Adrián i yangfala, hem i stap faet blong givimbak nogud fasin we ol narafala i mekem long hem. Hem i talem se: “Plante taem mi yusum masket blong faet, mo samtaem mi hafded long rod we blad i kavremap bodi blong mi.”

Adrián i stat blong stadi Baebol taem hem i gat 16 yia. Hem i se: “Taem mi gohed blong stadi Baebol, mi luksave se mi mas jenisim fasin blong mi.” Hem i nidim blong lego fasin blong no laekem narafala mo stop blong yusum vaelens blong givimbak. Hem i rili laekem wanem we hem i lanem long Rom 12:17-19 long saed blong no givimbak. Hem i se: “Mi stat blong luksave se Jehova bambae i finisim ol fasin we oli no stret long stret taem blong hem, mo long rod we hem i wantem. Sloslo, mi lego ol raf fasin blong mi.”

Wan naet, wan grup blong enemi i atakem Adrián. Lida blong olgeta i singaot strong se: “!Ale! !Yu faet!” Adrián i talem se: “Mi rili wantem faet bak.” Be hem i no mekem olsem. Hem i mekem wan sot prea mo i ronwe long olgeta.

Adrián i talem se: “Long nekis dei, mi mitim lida blong grup ya. Mi wantem kilim hem, be mi prea bakegen blong Jehova i givhan long mi. Mi mi sapraes tumas taem yangfala ya i kam klosap long mi mo i talem se: ‘Plis, yu fogivim mi from samting we mi mekem yestede. Blong talem stret, mi mi wantem kam olsem yu. Mi wantem stadi Baebol.’ Taem mi harem samting ya, mi glad tumas from mi bin holemtaet kros blong mi. Taswe, mi gat janis blong stadi Baebol wetem hem.”