?OLSEM WANEM BLONG BREKEM SAEKOL YA?

1 | Mekem i Sem Mak Long Evriwan

Baebol i Tijim Se:

“God i stap mekem i sem mak nomo long olgeta man. Sipos wan man i fraet long God mo i mekem samting we i stret, God i glad long hem nating se hem i blong defren nesen.”—OL WOK 10:34, 35.

Mining Blong Vas:

Jehovaa God i no jajem yumi folem kantri, laen, kala blong skin, o kalja blong yumi. Be hem i fokas moa long ol samting we oli impoten, olsem ol tingting mo ol samting we yumi laekem. I tru, “man i lukluk bodi nomo, be Jehova i lukluk samting we i stap long hat.”—1 Samuel 16:7.

Samting We Yu Save Mekem:

Nating se yumi no save samting we i stap long hat blong man, be yumi save folem fasin blong God blong mekem i sem mak long evriwan. Traem kasemsave long ol man wanwan, be no tingbaot ples o grup we hem i kamaot long hem. Sipos yu harem se yu gat ol nogud filing long narafala from ples o grup we hem i kamaot long hem, askem God blong i halpem yu blong sakemaot ol filing ya. (Ol Sam 139:23, 24) Sipos yu askem Jehova blong i halpem yu blong mekem i sem mak long evriwan, i sua se bambae hem i harem prea blong yu mo halpem yu.—1 Pita 3:12.

a Jehova i prapa nem blong God.—Ol Sam 83:18.

“Mi neva storian gud wetem wan waetman . . . Naoia mi mi memba blong wan bigfala famle long fulwol we oli gat trufala lav.”—TITUS

Tru Stori—TITUS

Winim Saekol Blong No Laekem Narafala

Titus i memba blong wan gang we oli kros from ol loa we i seraotem ol man. Hem i se: “Mifala i stap go long ol ples we oli no laekem ol blakman, olsem ol hotel mo ol ba, jes blong lukaot faet.” Titus i talem se fasin blong no laekem narafala i mekem hem i kros mo i wantem faet, mo hem i se: “Sipos mi no agri wetem wan man o woman, oltaem mi nao faswan blong statem faet.”

Titus i stat blong jenisim fasin blong hem, taem hem i stadi Baebol wetem ol Witnes blong Jehova. Fasin blong ridim Baebol i givhan long hem. Hem i laekem tumas promes ya se “bambae i no moa gat man i ded, mo bambae man i no moa sore, mo bambae i no moa gat man i krae, mo bambae man i no moa harem nogud long bodi blong hem.”—Revelesen 21:3, 4.

Fastaem, Titus i faenem i had blong lego filing ya blong no laekem narafala. Hem i se: “I rili had blong jenisim tingting mo fasin blong mi.” Be samting we hem i lanem long Ol Wok 10:34, 35, i givhan long hem. Vas ya i talem se God i stap mekem i sem mak nomo long olgeta man.

?Wanem i kamaot from? Titus i talem se: “Mi sua fulwan se ol Witnes blong Jehova oli trufala Kristin, from oli lavlavem olgeta nomata wanem kantri o kala blong skin. Bifo we mi baptaes, wan waetman long kongregesen i invaetem mi blong kakae long haos blong hem. Hemia i olsem wan merikel. Bifo mi neva storian gud wetem wan waetman, be naoia mi sidaon mo kakae wetem wan. Naoia mi mi memba blong wan bigfala famle long fulwol we oli gat trufala lav.”