?OLSEM WANEM BLONG BREKEM SAEKOL YA?

3 | Sakemaot Tingting Blong No Laekem Narafala

Baebol i Tijim Se:

“Yufala i mas jenisim tingting blong yufala blong yufala i jenis fulwan, olsem nao bambae yufala i save pruvum long yufala wan se wil blong God i gud, i stret gud, mo hem i glad long hem.”—ROM 12:2.

Mining Blong Vas:

Ol samting we yumi stap tingbaot oli impoten long God. (Jeremaea 17:10) I tru se yumi no mas talem o mekem samting we i save spolem narafala, be hemia i no naf. Fasin blong no laekem narafala i stat insaed long tingting mo hat blong yumi. Taswe yumi mas kwik blong sakemaot eni filing o tingting blong no laekem narafala. Sipos yumi mekem olsem, bambae yumi “jenis fulwan” mo brekem saekol blong no laekem narafala.

Samting We Yu Save Mekem:

Skelem tingting o filing we yu gat long ol narafala, speseli ol man blong narafala ples. Askem yu wan se: ‘?Wanem tingting blong mi long olgeta? ?Filing blong mi i olsem from samting we mi save? ?O mi jajem olgeta from we oli defren?’ No wajem ol muvi, entatenmen, o sosol media we oli promotem vaelens mo fasin blong no laekem narafala.

Tok blong God i save halpem yumi blong sakemaot filing ya blong no laekem narafala, long hat mo tingting blong yumi

I no isi blong kasemsave ol tingting mo filing blong yumi. Be Tok blong God i save halpem yumi blong “faenemaot ol tingting mo ol plan we i stap long hat.” (Hibru 4:12) So gohed blong ridim Baebol. Komperem ol tijing blong hem wetem tingting blong yu, mo traem bes blong mekem tingting blong yu i laenap wetem tingting blong God. Tok blong God i save halpem yumi blong brekemdaon fasin blong no laekem narafala we i ‘olsem strongfala haos’ long tingting mo hat blong yumi.—2 Korin 10:4, 5.

Tru Stori—STEVEN

Tingting Blong Hem i Jenis

Steven mo famle blong hem oli fesem fasin agens long ol waetman. From samting ya, hem i joenem wan grup blong politik we i faet from raet blong olgeta. Mo biaen, hem tu i stap joen long ol faet. Steven i talem se: “Wanwan taem, mifala i go wajem ol muvi we oli soemaot ol man Afrika, taem oli wok slef long Amerika bifo. Taem mifala i luk we ol waetman oli stap kilim olgeta mo mekem i nogud long olgeta, mifala i kros tumas. Nao mifala i girap mo faetem ol waet yangfala we oli stap long haos sinema. Biaen, mifala i go lukaot ol waetman we oli stap raonabaot long mifala, blong kilim olgeta.”

Tingting blong Steven i jenis fulwan taem hem i stat blong stadi Baebol wetem ol Witnes blong Jehova. Hem i talem se: “Mi bin joen plante wetem ol man we oli no laekem narafala from kala blong skin, taswe mi mi sek long plante samting we ol Witnes oli mekem. Wan taem, wan Witnes we i waetman i go ovasi mo i lego ol pikinini blong hem wetem wan famle we i blak. Mo tu, wan famle we i waet i tekem wan yangfala we i blakman i go stap wetem olgeta, from we hem i no gat ples blong slip.” Steven i luksave se ol Witnes blong Jehova oli ol trufala Kristin from we lavlavem olgeta olsem we Jisas i talem.—Jon 13:35.

?Wanem i givhan long Steven blong lego fasin ya blong no laekem narafala? Vas long Rom 12:2 i halpem hem. Hem i talem se: “Mi kasem save se mi mas jenisim tingting blong mi. Mi mas mekem tingting blong mi i kam niuwan olgeta, olsem nao bambae mi gat pis wetem ol man. Antap long hemia, mi mas luksave se fasin blong laef ya i beswan.” Naoia bitim 40 yia finis we Steven i lego fasin ya blong no laekem narafala mo hem i enjoem laef ya.