?OLSEM WANEM BLONG BREKEM SAEKOL YA?

4 | Askem Help Blong God

Baebol i Tijim Se:

“Frut blong tabu spirit hemia lav, glad, pis, longfala tingting, kaen, gud fasin, bilif, kwaet fasin, mo bos long tingting.”—GALESIA 5:22, 23.

Mining Blong Vas:

Yumi save brekem saekol blong no laekem narafala, sipos God i halpem yumi. Tabu spirit blong hem i save halpem yumi blong gat ol fasin we i had blong yumi gat. Taswe insted blong traem winim fasin ya long prapa paoa blong yumi, i gud yumi dipen long God. Sipos yumi mekem olsem, yumi save gat sem ekspiriens olsem aposol Pol we i talem se: “Mi mi gat paoa blong fesem olgeta samting from God ya we i givim paoa long mi.” (Filipae 4:13) Mo bambae yumi save talem se: “Help we bambae mi kasem, i kam long Jehova.”—Ol Sam 121:2.

Samting We Yu Save Mekem:

“Jehova i jenisim mi fulwan, naoia mi no moa man blong faet, be mi man blong pis.”—WALDO

Prea long Jehova, blong askem tabu spirit blong hem. (Luk 11:13) Askem Hem blong i halpem yu blong gat ol gudfala fasin. Faenemaot wanem Baebol i talem long saed blong lav, pis, longfala tingting, mo bos long tingting. Hemia ol fasin we oli save halpem yu blong sakemaot fasin ya blong no laekem ol narafala. Traem gat ol fasin ya mo joen wetem olgeta we oli traehad blong gat ol fasin ya. Ol fren olsem oli save “pulum yumi blong yumi lavem ol narafala, mo blong yumi mekem ol gudfala wok.”—Hibru 10:24; futnot.

Tru Stori—WALDO

Winim Fasin Blong Faet

Waldo i fesem hadtaem taem, hem i stap gruap, taswe hem i kam man blong faet mo i no laekem ol narafala. Hem i talem se: “Oltaem mi stap faet wetem ol man blong tekem drag . . . Wan dei, wan gang i pem wan profesenol blong i kilim mi mi ded, be hem i stikim mi long naef nomo, nao mi ronwe.”

Waldo i no laekem we waef blong hem i stadi Baebol wetem ol Witnes blong Jehova. Hem i talem se: “Mi no laekem ol Witnes, mo plante taem mi stap singaot strong mo swea long olgeta. Be oltaem oli kaen long mi.”

Biaen, Waldo tu i stat blong stadi long Baebol. Hem i talem se: “I no isi blong mekem ol samting we mi stap lanem. Mi ting se bae mi neva stopem fasin blong mi blong kros mo faet.” Be samting we Waldo i lanem, i jenisim fasin blong hem.

Hem i talem se: “Wan dei Alejandro, we i stadi wetem mi, i askem mi blong ridim Galesia 5:22, 23. . . . Biaen hem i eksplenem se blong gat ol fasin ya, mi nidim tabu spirit blong God. !Hemia i jenisim tingting we mi bin gat!”

Waldo i letem God i halpem hem, nao hem i naf blong brekem saekol blong no laekem narafala. Hem i talem se: “Ol fren blong mi bifo mo ol famle, oli sapraes we fasin blong mi i jenis olsem.” Hem i talem tu se: “Jehova i jenisim mi fulwan, naoia mi no moa man blong faet, be mi man blong pis.”