STADI 20
Revelesen i Tokbaot Samting We Bambae i Hapen Long Ol Enemi Blong God
“Oli hivimap olgeta oli kam wanples long ples ya we long lanwis Hibru, oli singaot se Amagedon.”—REV. 16:16.
SINGSING 150 Yu Lukaot God Hem Bambae i Sevem Yu
BIGFALA TINGTINGa
1. ?Buk blong Revelesen i tokbaot wanem long saed blong ol man blong God?
BUK blong Revelesen i tokbaot se Kingdom blong God i stap rul long heven, mo oli bin sakemaot Setan i aot long heven. (Rev. 12:1-9) Hemia i min se naoia long heven i gat pis, be long wol bambae yumi kasem plante problem. ?From wanem? From we Setan i kros tumas, mo hem i stap atakem ol man we oli mekem wok blong Jehova long wol ya.—Rev. 12:12, 15, 17.
2. ?Wanem bambae i halpem yumi blong gohed blong holemstrong long Jehova?
2 ?Olsem wanem yumi save gohed blong holemstrong long Jehova nating se Setan i stap atakem yumi? (Rev. 13:10) Wan samting we i save halpem yumi, hemia blong tingbaot samting we bambae i hapen long fiuja. Eksampol, long buk blong Revelesen, aposol Jon i tokbaot sam long ol blesing we bambae yumi kasem i no longtaem. Wan long ol blesing ya, hemia se ol enemi blong God bambae oli lus. Naoia i gud yumi luk samting we buk blong Revelesen i tokbaot long saed blong ol enemi ya, mo samting we bambae i hapen long olgeta.
“Ol SAEN” WE OLI TOKBAOT OL ENEMI BLONG GOD
3. ?Wanem sam long ol saen we Revelesen i tokbaot?
3 Faswan vas long buk blong Revelesen i talem klia se ol samting we bambae yumi ridim, oli “ol saen” we oli pijarem sam samting. (Rev. 1:1) Sam japta we i kam biaen, i tokbaot sam wael animol we i pijarem ol enemi blong God. Eksampol, i gat “wan wael animol i kamaot long solwota.” Hem i gat “ten hon mo seven hed.” (Rev. 13:1) Afta long hem i gat “wan narafala wael animol i kamaot long graon.” Wael animol ya i toktok olsem wan bigfala algita “mo hem i mekem faea tu i aot long heven i kamdaon long wol.” (Rev. 13:11-13) Biaen yumi luk wan narafala “wael animol we kala blong hem i laet red,” mo wan prostitut i sidaon antap long hem. Ol trifala wael animol ya oli representem ol enemi blong Jehova God, we longtaem finis oli stap agensem hem mo Kingdom blong hem. Taswe i impoten se yumi mas save olgeta.—Rev. 17:1, 3.
FO BIGFALA WAEL ANIMOL
“Oli kamaot long solwota.” (Dan. 7:1-8, 15-17) Oli pijarem ol wol paoa we oli rul mo mekem i nogud long ol man blong God stat long taem blong Daniel. (Haf 4, 7)
4-5. ?Olsem wanem ol tok blong Daniel 7:15-17 oli halpem yumi blong kasemsave mining blong ol saen ya?
4 Bifo we yumi faenemaot se ol enemi ya oli hu, fastaem yumi mas kasemsave se ol wael animol ya mo prostitut ya oli representem wanem. Beswan rod blong kasemsave, hemia blong letem Baebol hem wan i eksplenem. Plante samting we buk blong Revelesen i tokbaot, eksplenesen blong olgeta i stap finis long ol narafala buk blong Baebol. Eksampol, profet Daniel i luk wan drim, mo hem i luk “fo bigfala wael animol oli kamaot long solwota.” (Dan. 7:1-3) Daniel i tokbaot mining blong olgeta, hem i se ol wael animol ya oli representem fo “king,” o gavman. (Ridim Daniel 7:15-17.) Eksplenesen ya i klia mo i halpem yumi blong kasemsave se ol wael animol we buk blong Revelesen i tokbaot, oli minim ol gavman tu.
5 Naoia bambae yumi luk sam saen we buk blong Revelesen i tokbaot. Taem yumi tokbaot olgeta, bambae yumi luk olsem wanem Baebol i halpem yumi blong kasemsave mining blong olgeta. Fastaem bambae yumi tokbaot ol wael animol ya, mo luk se oli representem hu. Biaen, bambae yumi luk samting we i hapen long olgeta. Mo laswan, bambae yumi luk se ol samting ya oli minim wanem long yumi.
SAMTING WE I SOEMAOT KLIA OL ENEMI BLONG GOD
WAEL ANIMOL WE I GAT SEVEN HED
Hem i “kamaot long solwota” mo hem i gat seven hed, ten hon, mo ten smol hat blong king. (Rev. 13:1-4) Hem i pijarem olgeta politik paoa we oli bin rul kam kasem naoia. Ol seven hed ya oli pijarem seven wol paoa we oli bin rul mo mekem i nogud long ol man blong God. (Haf 6-8)
6. ?Wael animol we i gat seven hed we Revelesen 13:1-4 i tokbaot, i minim wanem?
6 ?Wael animol we i gat seven hed i minim wanem? (Ridim Revelesen 13:1-4.) Yumi makem se wael animol ya i luk olsem wan leped, be leg blong hem i olsem blong bea, mo maot blong hem i olsem blong laeon, mo hem i gat ten hon. Ol samting ya i stap tu long ol fo animol we Daniel japta 7 i tokbaot. Be Revelesen i tokbaot wan animol nomo, we i gat evri samting ya long hem. Wael animol ya i no representem wan gavman nomo o wan wol paoa. Jon i talem se wael animol ya i stap rul antap “long ol man blong olgeta traeb, mo blong olgeta grup blong man, mo blong olgeta lanwis, mo blong olgeta kantri.” So hemia i min se hem i strong moa i bitim eni narafala gavman. (Rev. 13:7) Taswe, wael animol ya i representem evri politik paoa we oli bin stat rul bifo kam kasem tede.b—Pri. 8:9
7. ?Ol seven hed blong wael animol ya oli representem wanem?
7 ?Ol seven hed ya wanwan oli representem wanem? Revelesen japta 17 i halpem yumi blong faenem ansa blong kwestin ya, from hem i tokbaot pija blong wael animol we Revelesen japta 13 i bin tokbaot. Revelesen 17:10 i se: “I gat seven king: Faef oli foldaon finis, wan i stap naoia, mo narawan i no kamtru yet, be taem hem i kamtru, hem i mas stap blong smoltaem nomo.” Long olgeta politik paoa we Setan i yusum, seven long olgeta oli olsem “hed” from we oli gat bigfala paoa. Hemia ol wol paoa we oli rul antap long ol man blong God mo oli mekem i nogud long olgeta. Long taem blong aposol Jon, faef long ol wol paoa ya oli rul finis, olsem: Ijip, Asiria, Babilon, Media Mo Pesia, mo Gris. Mo namba sikis wol paoa, hemia Rom, we i stap rul yet taem Jon i kasem vison blong revelesen. Taswe naoia, ?laswan wol paoa hem i hu?
8. ?Hu i olsem namba seven hed blong wael animol?
8 Olsem we bambae yumi luk, ol profet tok long buk blong Daniel oli save halpem yumi blong faenemaot namba seven hed blong wael animol ya. ?Wanem wol paoa i stap rul long ol las dei ya, o long “dei blong Masta”? (Rev. 1:10) Hemia Yunaeted Kingdom mo Yunaeted Stet Blong Amerika, o yumi save talem se Inglan mo Amerika we tufala i gat bigfala paoa long wol. Taswe i stret nomo we yumi talem se Inglan mo Amerika nao i namba seven hed blong wael animol ya we Revelesen 13:1-4 i tokbaot.
WAEL ANIMOL WE I GAT TU HON OLSEM HON BLONG SIPSIP
Hem i “kamaot long graon” mo “i toktok olsem wan bigfala algita.” Hem i mekem “faea tu i aot long heven i kamdaon” mo hem i stap mekem ol bigfala saen olsem ol “giaman profet.” (Rev. 13:11-15; 16:13; 19:20) Wael animol ya we i gat tu hon i pijarem Inglan mo Amerika, mo oli singaot hem se giaman profet from we hem i stap lidim ol man long wol ya oli go krangke, mo i talem long olgeta blong oli “wokem wan pija blong wael animol” ya we i gat seven hed mo ten hon.(Haf 9)
9. ?Wael animol we i gat “tu hon olsem hon blong sipsip” i representem wanem?
9 Revelesen japta 13 i talem tu se namba seven hed ya, hemia Inglan mo Amerika, i gat fasin olsem wan wael animol we i gat “tu hon olsem hon blong sipsip, be hem i toktok olsem wan bigfala algita.” Wael animol ya i “wokem ol bigbigfala saen, mo hem i mekem faea tu i aot long heven i kamdaon long wol, stret long fes blong ol man.” (Rev. 13:11-15) Revelesen japta 16 mo 19 i tokbaot wael animol ya se i olsem wan “giaman profet.” (Rev. 16:13; 19:20) Daniel i tokbaot wan samting we i klosap sem mak. Hem i se, wol paoa blong Inglan mo Amerika bambae i “distroem gud ol ples.” (Dan. 8:19, 23, 24, fut.) Hemia nao samting we i hapen long Wol Wo II. Ol saentis blong Inglan mo Amerika oli joen tugeta blong wokem tu atomik bom we i finisim wo long taem ya. Taem Inglan mo Amerika i wokem ol bom ya, hemia i olsem we oli mekem “faea tu i aot long heven i kamdaon long wol.”
WAEL ANIMOL WE KALA BLONG HEM I LAET RED
Wan prostitut, hemia Bigfala Babilon, i stap sidaon antap long wael animol ya. Baebol i tokbaot wael animol ya se hem i namba eit king. (Rev. 17:3-6, 8, 11) Fastaem, prostitut ya i kontrolem wael animol ya, be biaen wael animol ya i spolem gud hem. Prostitut ya i pijarem blong olgeta giaman skul long wol. Tede wael animol ya i pijarem Yunaeted Nesen we i stap sapotem olgeta politik sistem blong wol ya. (Haf 10, 14-17)
10. ?“Pija blong wael animol” i representem wanem? (Revelesen 13:14, 15; 17:3, 8, 11)
10 Biaen i gat wan narafala wael animol bakegen. Hem i klosap sem mak olsem wael animol ya we i gat seven hed, be kala blong hem i laet red. Oli singaot hem se “pija blong wael animol” mo buk blong Revelesen i tokbaot hem se i “namba 8 king.”c (Ridim Revelesen 13:14, 15; 17:3, 8, 11.) Jon i talem se fastaem “king” ya i stap, biaen hem i no moa stap, mo biaen hem i stap bakegen. Hemia i stret gud long Yunaeted Nesen, we i stap sapotem ol politik sistem blong wol ya. Fastaem hem i stap olsem Ligofnesen. Biaen, long Wol Wo II hem i no moa stap. Mo sam taem biaen, hem i stanap bakegen olsem Yunaeted Nesen.
11. ?Ol wael animol ya oli mekem wanem, mo from wanem yumi no nid blong fraet long olgeta?
11 Ol wael animol ya o ol gavman, oli talem ol giaman toktok blong pulum ol man blong oli agensem Jehova mo ol man blong hem. Jon i se i olsem we “oli go long evri ples long wol blong hivimap ol king” blong oli kam faet long Amagedon, we hemia “bigfala dei blong God Ya We i Gat Olgeta Paoa.” (Rev. 16:13, 14, 16) Be yumi no nid blong fraet. God blong yumi, Jehova, bambae i tekem aksen kwiktaem blong sevem olgeta man we oli sapotem rul blong hem.—Esik. 38:21-23.
12. ?Wanem bambae i hapen long ol wael animol ya?
12 ?Wanem i hapen long ol wael animol ya? Revelesen 19:20 i givim ansa se: “Be hem i holem wael animol mo giaman profet ya. Giaman profet ya nao i mekem ol bigfala saen long fes blong wael animol ya, blong lidim ol man we oli kasem mak blong wael animol mo olgeta we oli wosipim pija blong hem, oli go krangke. Nao man ya i slingim tufala we tufala i laef nomo, i go long bigfala lek blong faea, we salfa i stap laet long hem.” Nating se ol wael animol o ol gavman ya oli stap rul yet tede, be God bambae i distroem olgeta blong olwe.
13. ?Ol gavman bambae oli traem fosem ol Kristin blong mekem wanem?
13 ?Hemia i minim wanem long yumi tede? Yumi ol Kristin, yumi mas holemstrong long God mo Kingdom blong hem. (Jon 18:36) Blong mekem olsem yumi mas stap nutrol mo no joen long ol politik blong wol ya. Be i no isi blong mekem olsem, from ol gavman blong wol oli wantem se yumi sapotem olgeta fulwan, tru long ol samting we yumi talem mo mekem. Olgeta we oli sapotem ol gavman ya, oli kasem mak blong wael animol. (Rev. 13:16, 17) Eniman we i kasem mak blong wael animol, Jehova bambae i no glad long hem mo bambae hem i no kasem laef olwe. (Rev. 14:9, 10; 20:4) Taswe i impoten tumas blong stap nutrol, nating se ol gavman oli traem fosem yumi blong sapotem olgeta.
BIGFALA PROSTITUT YA BAMBAE I SEM BIGWAN
14. Folem Revelesen 17:3-5 ?wanem narafala samting we i mekem aposol Jon i sapraes tumas?
14 Aposol Jon i talem se hem i luk wan narafala samting we i mekem hem i “sapraes tumas.” ?Wanem samting ya? Hem i luk wan woman i sidaon antap long wan long ol wael animol ya. (Rev. 17:1, 2, 6) Woman ya hem i “bigfala prostitut” mo oli singaot hem se “Bigfala Babilon.” Woman ya i stap mekem “enikaen doti fasin blong seks” wetem “olgeta king blong wol.”—Ridim Revelesen 17:3-5.
15-16. ?Hu ya “Bigfala Babilon,” mo olsem wanem yumi save samting ya?
15 ?Hu ya “Bigfala Babilon”? Woman ya i no representem wan politik oganaesesen from we Revelesen i talem se hem i stap mekem enikaen doti fasin blong seks wetem ol lida blong politik blong wol ya. (Rev. 18:9) Mo from we buk blong Revelesen i talem se hem i sidaon antap long wael animol ya, hemia i soem se hem i traem blong kontrolem ol rula ya. Antap long hemia, hem i no representem ol griri bisnes long wol blong Setan. From we buk blong Revelesen i tokbaot olgeta long wan narafala japta, mo i singaot olgeta se “ol bisnesman blong wol ya.”—Rev. 18:11, 15, 16.
16 Long Baebol, tok ya “prostitut” i save minim ol man we oli talem se oli wosipim God, be long semtaem oli stap wosipim ol aedol o oli frengud wetem wol ya. (1 Kron. 5:25; Jem. 4:4) Mo Baebol i tokbaot ol man we oli rili wosipim God se oli olsem “wan yang gel we i klin, i no save man yet.” (2 Kor. 11:2; Rev. 14:4) Long taem bifo, taon ya Babilon i stamba ples blong ol giaman wosip. Taswe i stret nomo we Bigfala Babilon i representem olgeta giaman skul we oli stap mekem enikaen giaman wosip. Yes, Bigfala Babilon hem i olgeta giaman skul long wol.—Rev. 17:5, 18; yu luk atikol ya long jw.org “?Hu Ya Bigfala Babilon?”
17. ?Wanem bambae i hapen long Bigfala Babilon?
17 ?Wanem bambae i hapen long Bigfala Babilon? Revelesen 17:16, 17 i givim ansa i se: “Ol ten hon we yu luk mo wael animol ya, bambae oli no laekem nating prostitut ya, mo bambae oli tekemaot olgeta samting we hem i gat, mo oli livim hem i stap neked nomo. Mo bambae oli kakae ol mit blong hem, mo bambae oli bonem hem fulwan long faea. Oli mekem olsem, from we God i putum tingting ya long hat blong olgeta, blong oli mekem samting we hem i wantem.” Yes, Jehova bambae i mekem ol nesen oli yusum wael animol ya we kala blong hem i laet red, hemia Yunaeted Nesen, blong atakem ol giaman skul mo spolem olgeta fulwan.—Rev. 18:21-24.
18. ?Olsem wanem yumi save meksua se yumi no sapotem nating Bigfala Babilon?
18 ?Hemia i minim wanem long yumi? Yumi mas gohed blong mekem “wosip we i klin mo i no gat doti long hem.” (Jem. 1:27) Yumi no mas letem Bigfala Babilon i gat paoa long yumi, tru long ol giaman tijing, ol giaman lafet, ol nogud fasin, mo fasin blong wok wetem ol rabis spirit. Mo yumi mas gohed blong wonem ol narafala blong oli “mas kamaot long hem,” olsem nao bambae oli no joen wetem hem long ol sin blong hem taem God i spolem hem.—Rev. 18:4.
JAJMEN BLONG BIGFALA ENEMI BLONG GOD
ALGITA WE I RED OLSEM FAEA
Setan i givim paoa long wael animol ya. (Rev. 12:3, 9, 13; 13:4; 20:2, 10) Bambae oli sakem Setan we i bigfala enemi ya blong Jehova, i go long abys blong 1,000 yia. Afta long taem ya, bambae oli slingim hem i go long “lek ya blong faea mo salfa.” (Haf 19-20)
19. ?Hu ya bigfala “algita we i red olsem faea”?
19 Buk blong Revelesen i tokbaot tu “wan bigfala algita we i red olsem faea.” (Rev. 12:3) Bigfala algita ya i faet agensem Jisas mo ol enjel blong hem. (Rev. 12:7-9) Hem i atakem ol man blong God mo i givim paoa long ol wael animol we oli pija blong ol gavman blong man. (Rev. 12:17; 13:4) ?Hu ya bigfala algita ya? Hemia “snek ya blong bifo we oli singaot hem se Devel mo Setan.” (Rev. 12:9; 20:2) Hem nao i stap kontrolem olgeta enemi blong Jehova.
20. ?Wanem bambae i hapen long bigfala algita ya?
20 ?Wanem bambae i hapen long bigfala algita ya? Revelesen 20:1-3 i eksplenem se bambae wan enjel i slingim Setan i go long abys, hemia i olsem we hem i go stap long kalabus. Setan bambae i stap long abys “gogo 1,000 yia i pas, blong hem i no moa pulum olgeta nesen oli go krangke.” Afta long taem ya, bambae oli slingim Setan wetem ol dimon blong hem oli go long “lek ya blong faea mo salfa.” (Rev. 20:10) Traem tingbaot taem ya we Setan mo ol dimon blong hem oli no moa stap. !Wol ya bambae i nambawan tumas!
21. ?From wanem yumi glad long samting we yumi ridim long buk blong Revelesen?
21 !Yumi harem gud tumas blong kasemsave long mining blong ol saen we buk blong Revelesen i tokbaot! Stadi ya i givhan long yumi blong luksave ol enemi blong Jehova, mo luk samting we bambae i hapen long olgeta. Yes, “man we i ridim profet tok ya long bigfala voes mo olgeta we oli harem tok ya . . . oli glad.” (Rev. 1:3) ?Be afta we ol enemi blong God oli lus, ol man we oli stap tru long God bambae oli kasem wanem blesing? Bambae yumi tokbaot samting ya long nekis stadi.
SINGSING 23 Jehova i Stat Blong Rul
a Buk blong Revelesen i yusum ol saen blong soemaot ol enemi blong God. Buk blong Daniel i halpem yumi blong kasemsave se ol saen ya oli minim wanem. Long stadi ya, bambae yumi luk sam profet tok we i stap long buk blong Daniel, we oli klosap sem mak long ol profet tok we i stap long buk blong Revelesen. Long rod ya, bambae yumi naf blong luksave ol enemi blong God, mo luk samting we bambae i hapen long olgeta.
b Wan narafala samting we i soemaot se wael animol ya we i gat seven hed i representem evri politik paoa, hemia from we hem i gat “ten hon.” Long Baebol, plante taem namba ten i minim samting we i fulwan.
c Wael animol ya i no gat ol “smol hat blong king” olsem we faswan wael animol i gat. (Rev. 13:1) Hemia from we hem i ‘kamaot long ol seven,’ narafala king mo hem i kasem paoa long olgeta blong rul.—Yu luk atikol ya long jw.org “?Wael Animol We i Red We i Red Long Revelesen Japta 17 i Minim Wanem?”