Yu Mas Gat Klia Tingting, Taem Wan Samting i Traem Fasin Blong Yu Blong Holemstrong

1. ?I minim wanem se tingting blong yumi i mas klia gud oltaem? (2 Timoti 4:5)

TAEM yumi harem nogud from wan samting, hemia i save traem fasin blong yumi blong holemstrong long Jehova mo oganaesesen blong hem. ?Olsem wanem yumi save dil wetem ol problem olsem? Yumi mas gat klia tingting oltaem mo stap wekap gud, mo stanap strong long bilif. (Ridim 2 Timoti 4:5.) Yumi mekem tingting blong yumi i klia gud oltaem taem yumi stap kwaet, yumi tingting gud, mo yumi traehad blong gat sem lukluk olsem Jehova. Taem yumi mekem olsem, ol filing blong yumi bambae oli no save gat paoa long ol tingting blong yumi.

2. ?Bambae yumi tokbaot wanem long stadi ya?

² Long las stadi, yumi bin tokbaot tri traem we maet yumi save fesem aotsaed long kongregesen. Be long stadi ya, bambae yumi tokbaot tri problem we i save hapen long kongregesen we i traem fasin blong yumi blong holemstrong long Jehova. (1) Taem wan Kristin i mekem i no stret long yumi, (2) taem Jehova i stretem yumi, mo (3) taem i had blong folem ol niufala jenis long oganaesesen. Long taem olsem, ?olsem wanem yumi save mekem tingting blong yumi i klia gud oltaem, mo holemstrong long Jehova mo oganaesesen blong hem?

TAEM WAN KRISTIN I MEKEM I NO STRET LONG YUMI

3. ?Yumi save gat wanem filing taem wan Kristin i mekem i no stret long yumi?

³ ?I bin hapen finis se wan Kristin, maet wan brata we i gat responsabiliti, i mekem i no stret long yu? Maet brata ya i no minim blong spolem yu. (Rom 3:23; Jem. 3:2) Be yet, maet fasin blong hem i mekem yu harem nogud. Maet yu no slip gud from we yu gohed blong tingbaot samting ya. Mo maet yu stap tingting tu se: ‘Sipos wan brata i mekem fasin ya, ?i tru se hemia i oganaesesen blong God?’ Hemia nao tingting we Setan i wantem se yumi gat. (2 Kor. 2:11) Ol nogud tingting olsem oli save mekem yumi lego Jehova mo oganaesesen blong hem. So sipos wan brata o sista i mekem i no stret long yumi, ?olsem wanem blong gat klia tingting oltaem mo blokem rong tingting?

4. ?Olsem wanem Josef i gat klia tingting taem oli mekem i no stret long hem, mo yumi lanem wanem from? (Jenesis 50:19-21)

⁴ No kam kros. Taem Josef i yangfala, ol bigfala brata blong hem oli mekem i no stret long hem. Oli no laekem hem nating, mo sam long olgeta oli wantem kilim hem i ded. (Jen. 37:4, 18-22) Biaen oli salem hem olsem wan slef. From samting ya, blong samwe 13 yia hem i fesem plante problem. Maet Josef i save gat tingting ya se Jehova i no lavem hem, mo se i lego hem taem i nidim help. Nating se i olsem, Josef i no kam kros, be hem i gat klia tingting mo hem i stap kwaet. Taem hem i gat janis blong givimbak long olgeta, hem i no mekem, be hem i soemaot lav mo i fogivim olgeta. (Jen. 45:4, 5) Josef i naf blong mekem olsem from hem i gat klia tingting. Hem i no tingbaot ol problem blong hem, be hem i tingbaot samting we Jehova i wantem. (Ridim Jenesis 50:19-21.) ?Yumi lanem wanem? Sipos wan man i mekem i no stret long yu, yu no mas kros long Jehova o gat tingting ya se hem i lego yu. Be i gud yu tingbaot olsem wanem hem i stap halpem yu blong stanap strong. Mo tu, taem narafala i mekem i no stret long yu, i gud yu traehad blong soemaot lav, olsem nao bambae yu no tingbaot ol slak fasin blong hem.—1 Pita 4:8.

5. ?Olsem wanem Miqueas i gohed blong gat klia tingting, taem narafala i mekem i no stret long hem?

⁵ Traem luk ekspiriens blong wan elda long Saot Amerika we nem blong hem Miqueas.b I gat wan taem we hem i filim se sam brata we oli gat responsabiliti oli mekem i no stret long hem. Hem i talem se: “Mi neva stres olsem bifo. Mi wari bitim mak. Mi no save slip long naet mo mi krae from mi no save wanem blong mekem.” Nating se i olsem, Miqueas i gohed blong gat klia tingting mo i traehad blong kontrolem ol filing blong hem. Oltaem hem i prea blong Jehova i givim tabu spirit mo paoa, blong hem i save stanap strong. Mo tu, hem i lukaotem sam save long ol buk blong yumi we oli save halpem hem. ?Yumi lanem wanem? Sipos wan brata o sista i mekem i no stret long yu, i gud yu stap kwaet mo traehad blong kontrolem eni nogud filing we maet yu save gat, from we maet yu no save stret wanem nao i mekem se man ya i talem o mekem olsem long yu. Taswe i gud yu prea long Jehova, mo askem hem blong i halpem yu blong gat sem tingting olsem brata o sista ya. Hemia i save halpem yu blong tingbaot se man ya i no minim blong mekem yu harem nogud, mo bambae yu naf blong fogivim hem. (Prov. 19:11) Tingbaot, Jehova i save situesen we yu stap fesem, mo bambae hem i givim paoa we yu nidim blong stanap strong.—2 Kron. 16:9; Pri. 5:8.

TAEM JEHOVA I STRETEM YUMI

6. ?From wanem i impoten blong tingbaot se taem Jehova i stretem yumi hemia i soemaot se hem i lavem yumi? (Hibru 12:5, 6, 11)

⁶ Taem Jehova i stretem yumi, yumi save harem nogud bitim mak. Be sipos yumi tingbaot nomo se yumi harem nogud, maet yumi save stat blong gat tingting ya se fasin we Jehova i mekem i no stret, mo se i strong tumas. Be hemia i save blokem yumi blong tingbaot samting we i moa impoten, hemia se Jehova i stretem yumi from i lavem yumi. (Ridim Hibru 12:5, 6, 11.) Mo sipos yumi letem ol filing blong yumi oli kontrolem yumi, bambae i isi blong Setan i atakem yumi. Setan i no wantem se yumi akseptem fasin stretem, mo antap moa hem i wantem se yumi lego Jehova mo kongregesen. Sipos oli bin stretem yu, ?olsem wanem yu save gohed blong gat klia tingting?

7. (1) Folem pija, ?from we Pita i akseptem fasin stretem, Jehova i mekem wanem long hem? (2) ?Yumi lanem wanem long eksampol blong Pita?

⁷ Akseptem fasin stretem, mo mekem sam jenis sipos i nidim. Plante taem Jisas i stretem Pita long fored blong ol narafala aposol. (Mak 8:33; Luk 22:31-34) !Maet hemia i mekem Pita i sem bitim mak! Be hem i gohed blong holemstrong long Jisas. Hem i akseptem taem oli stretem hem mo i lanem samting from ol mastik blong hem. From samting ya, Jehova i blesem Pita, mo i givim moa responsabiliti long hem long kongregesen. (Jon 21:15-17; Wok 10:24-33; 1 Pita 1:1) ?Yumi lanem wanem long eksampol blong Pita? Yumi mekem i gud long yumi wan mo ol narafala, taem yumi no tingbaot nomo se yumi sem from oli stretem yumi, be yumi akseptem mo yumi mekem sam jenis. Taem yumi mekem olsem, Jehova mo ol brata bambae oli glad blong yusum yumi moa.

8-9. ?Afta we oli stretem Bernardo, hem i harem olsem wanem? ?Wanem i halpem hem blong i stretem tingting blong hem?

⁸ Traem tingbaot Bernardo, wan brata long Mosambik we oli bin tekemaot wok blong elda long hem. ?Long taem ya, hem i harem olsem wanem? Hem i talem se: “Mi mi kros from we mi no laekem we oli stretem mi.” Hem i wari long tingting we ol narafala long kongregesen oli save gat long saed blong hem. Hem i se: “I tekem sam manis blong mi save gat stret tingting mo trastem Jehova mo oganaesesen blong hem bakegen.” ?Wanem i halpem Bernardo blong i gat stret tingting?

⁹ Bernardo i stretem tingting blong hem. Hem i talem se: “Taem mi bin stap olsem wan elda, mi yusum Hibru 12:7 blong halpem ol narafala blong oli gat stret tingting long fasin blong Jehova blong stretem olgeta. Be naoia mi stap tingbaot se, ‘?Hu nao i nidim blong folem advaes ya?’ Hemia olgeta man blong Jehova, inkludum mi.” Biaen, Bernardo i mekem sam moa samting blong i save trastem Jehova mo oganaesesen blong Hem bakegen. Hem i spenem moa taem blong ridim Baebol mo tingting dip long hem. Nating se hem i wari yet from tingting we ol brata mo sista oli save gat long hem, be hem i prij wetem olgeta mo i tekpat long ol miting. Samtaem biaen, oli putumap Bernardo bakegen i kam wan elda. Olsem Bernardo, sipos oli stretem yu, yu no mas tingbaot nomo se yu sem, be i gud yu akseptem mo yu mekem sam jenis.c (Prov. 8:33; 22:4) Long rod ya, yu save sua se Jehova bambae i blesem yu from yu holemstrong long hem mo oganaesesen blong hem.

TAEM I HAD BLONG FOLEM OL NIUFALA JENIS LONG OGANAESESEN

10. ?Wanem jenis i kamaot we i traem fasin blong ol man Isrel blong holemstrong?

¹⁰ Taem i gat ol niufala jenis long oganaesesen, hemia i save traem fasin blong yumi blong holemstrong. Sipos yumi no lukaot gud, bambae yumi save lego Jehova. Eksampol, traem tingbaot olsem wanem ol samting oli jenis taem Loa blong Moses i kamaot. Bifo, ol hed blong famle oli stap mekem wok olsem pris. Oli bildim ol olta mo mekem sakrefaes i go long Jehova long bihaf blong ol famle blong olgeta. (Jen. 8:20, 21; 12:7; 26:25; 35:1, 6, 7; Job 1:5) Be taem Loa ya i kamaot, ol hed blong famle oli mas lego wok ya, from Jehova i putumap ol pris long laen blong Eron nao blong oli mekem sakrefaes. Stat long taem ya, sipos wan hed blong famle we i no kamaot long laen blong Eron i stat blong mekem wok olsem wan pris, hem i mas ded.d (Lev. 17:3-6, 8, 9) ?Hemia nao from wanem Kora, Datan, Abiram, mo ol 250 jif ya oli agensem Moses mo Eron? (Nam. 16:1-3) Yumi no sua. Nating se i olsem, Kora mo ol man we oli joen wetem hem oli no holemstrong long Jehova. Sipos i gat wan jenis long oganaesesen we i traem fasin blong yu blong holemstrong, ?yu save mekem wanem?

11. ?Yumi lanem wanem long eksampol blong ol Livaet we oli kamaot long laen blong Kohat?

¹¹ Sapotem fulwan ol jenis long oganaesesen. Long taem we ol man Isrel oli stap long draeples, ol man long laen blong Kohat oli gat wan spesel wok blong mekem. Evritaem we ol man Isrel oli muvum kamp blong olgeta, sam man long laen blong Kohat oli karem bokis blong kontrak mo oli go fastaem long ol man. (Nam. 3:29, 31; 10:33; Jos. 3:2-4) !Hemia i wan privilej! Be taem ol man Isrel oli kasem Promes Lan, ol samting oli jenis. Oli no moa nid blong muvum Bokis ya oltaem. Taswe, long taem we Solomon i rul olsem king, sam man long laen blong Kohat oli wok olsem ol man blong singsing, sam oli gad long get, mo sam oli lukaot long ol stohaos. (1 Kron. 6:31-33; 26:1, 24) I no gat wan ples we i talem se ol laen blong Kohat oli komplen o askem blong mekem wan narafala wok, from we bifo oli bin mekem wan spesel wok. ?Yumi lanem wanem? Yu mas sapotem fulwan ol jenis we oganaesesen blong Jehova i mekem, inkludum eni jenis we i afektem asaenmen blong yu. I gud yu glad long eni asaenmen we yu kasem. Tingbaot se i no asaenmen blong yu we i mekem se yu yu sas long ae blong Jehova. Jehova i tinghae moa long fasin blong yu blong obei i bitim eni asaenmen we yu gat.—1 Saml. 15:22.

12. ?Zaina i filim olsem wanem taem asaenmen blong hem i jenis?

¹² Tingbaot eksampol blong Zaina, wan sista long Medel Is, we asaenmen blong hem i jenis, mo i lusum wan privilej we hem i laekem tumas. Hem i bin wok long Betel bitim 23 yia mo naoia oli talem long hem blong i go mekem wok blong spesel paenia. Hem i talem se: “Mi mi sek nogud taem oli se asaenmen blong mi i jenis. Mi harem se mi nating nomo mo mi stap tingting se: ‘?Mi mekem wanem i rong?’” Antap long hemia, sam brata mo sista long kongregesen oli stap talem sam samting we i mekem hem i harem nogud moa, oli se: “Sipos yu bin mekem gud wok blong yu, bambae oganaesesen i gohed blong letem yu wok long Betel.” Blong smoltaem, tingting blong Zaina i foldaon we i mekem se hem i stap krae evri naet. Be hem i talem se: “Mi neva gat tu tingting long saed blong oganaesesen o long lav blong Jehova.” ?Wanem i halpem Zaina blong i gohed blong gat stret tingting?

13. ?Wanem i halpem Zaina blong winim ol nogud filing blong hem?

¹³ Zaina i naf blong winim ol nogud filing blong hem. ?Wanem i halpem hem? Hem i ridim ol haf long ol buk blong yumi we oli laenapgud wetem situesen blong hem. Haf ya “!Yu Save Winim Tingting We i Foldaon!” we i stap long Wajtaoa blong 1 Februari 2001, i halpem hem bigwan. Haf ya i eksplenem olsem wanem man ya we i raetem Baebol, Mak, i gat ol sem filing olsem taem asaenmen blong hem i jenis. Zaina i talem se: “Eksampol blong Mak i olsem wan meresin we i halpem mi blong winim tingting we i foldaon.” Mo tu, Zaina i stap klosap long ol fren blong hem. Hem i no stap hem wan, mo hem i no stap sore long hem wan. Long en, hem i talem se tabu spirit blong Jehova i stap wok long oganaesesen blong Hem mo olgeta we oli stap lidim ol wok oli kea bigwan long hem. Be tu, hem i luksave se oganaesesen blong God i mas mekem samting we i beswan blong wok blong Jehova i save go gud.

14. ?Vlado i faenem i had blong folem wanem jenis, mo wanem i halpem hem?

¹⁴ Vlado, wan elda we i gat 73 yia mo hem i blong Slovenia, i faenem i had taem kongregesen blong hem i joen wetem wan nara kongregesen, mo oli klosem Haos Kingdom we hem i bin stap go long hem. Hem i talem se: “Mi no kasemsave from wanem oli wantem klosem naesfala Haos Kingdom ya. Mi harem nogud from mifala i jes fiksimap Haos Kingdom ya nomo. Mi mi wan kapenta, mo mi bin wokem sam niufala samting blong Haos Kingdom ya. Mo naoia we bambae mifala i joen wetem nara kongregesen, i gat plante jenis we i no isi long mifala ol olfala.” ?Wanem i halpem Vlado blong sapotem niufala arenjmen ya? Hem i talem se: “Oltaem i gat ol blesing taem yumi folem ol jenis we oganaesesen blong Jehova i mekem. Mo ol niufala jenis ya oli rerem yumi from bigfala jenis we bambae i hapen long fiuja.” ?Yu yu faenem i had blong folem wan jenis we i kamaot taem tu kongregesen i mas joen wanples o from wan asaenmen i jenis? Yu save sua se Jehova i kasemsave ol filing blong yu. Taem yu sapotem ol jenis ya mo yu holemstrong long Jehova mo oganaesesen we hem i yusum, yu save sua se bambae hem i blesem yu.—Sam 18:25.

TINGTING BLONG YU I MAS KLIA GUD OLTAEM LONG OLGETA SAMTING

15. ?Yumi save mekem wanem blong gat klia tingting oltaem, taem i gat ol problem long kongregesen?

¹⁵ Taem yumi stap kam klosap moa long en blong sistem blong wol ya, bambae yumi fesem plante problem insaed long kongregesen. Ol problem ya oli save traem fasin blong yumi blong holemstrong long Jehova. Taswe yumi mas gat klia tingting oltaem. Sipos wan Kristin i mekem i no stret long yu, i nogud yu kam kros. Sipos oli stretem yu, i nogud yu tingbaot nomo se yu sem, be yu akseptem mo yu mekem sam jenis. Mo taem oganaesesen blong Jehova i mekem sam jenis we i afektem yu, i gud yu rere blong akseptem mo obei long ol daereksen.

16. ?Olsem yu save gohed blong trastem Jehova mo oganaesesen blong hem?

¹⁶ Yu save gohed blong trastem Jehova mo oganaesesen blong hem taem ol samting oli traem fasin blong yu blong holemstrong. Be blong mekem olsem, yu mas gohed blong gat klia tingting oltaem, we i min se, yu mas stap kwaet, yu tingting gud, mo yu traehad blong gat sem lukluk olsem Jehova. I gud yu stadi long fasin blong ol man long Baebol we oli naf blong dil wetem ol situesen we i sem mak olsem blong yu, mo tingting dip long eksampol blong olgeta. Prea long Jehova blong i halpem yu. Mo yu no mas stap longwe long kongregesen. Long rod ya, nomata wanem i hapen, Setan bambae i no save seraotem yumi long Jehova mo oganaesesen blong Hem.—Jem. 4:7.