1 | Prea “Lego Ol Wari Blong Yufala Long Hem”

BAEBOL I TALEM SE: “Lego ol wari blong yufala long [God], from we hem i kea long yufala.”—1 PITA 5:7.

Hemia i Minim Wanem

Jehova God i wantem se yumi talemaot long hem evri samting we i mekem yumi wari o harem nogud. (Ol Sam 55:22) I no gat wan problem we i bigwan tumas o i smol tumas blong tokbaot long prea. Sipos samting ya i impoten long yumi, hemia i impoten long Jehova tu, from we hem i kea long ol filing blong yumi. So blong gat pis long tingting, i impoten blong prea.—Filipae 4:6, 7.

Hemia i Givhan Olsem Wanem

Taem tingting blong yumi i trabol, yumi save harem se yumi stap yumi wan. Maet ol narafala oli no kasemsave samting we yumi stap gotru long hem. (Ol Proveb 14:10) Be taem yumi talemaot ol filing blong yumi long God, yumi sua se hem i glad blong lesin mo i kasemsave long yumi. Jehova i luk yumi mo i save ol trabol we yumi stap fesem, taswe hem i wantem se yumi talemaot long hem eni samting we yumi stap wari long hem.—2 Kronikel 6:29, 30.

Taem yumi prea long Jehova hemia i givhan long yumi blong luk se Jehova i kea long yumi. Yumi save harem olsem man we i raetem Ol Sam we i prea se: “Yu yu luk finis ol trabol blong mi. Yu save gud samting we i mekem mi mi harem nogud bitim mak.” (Ol Sam 31:7) Taem yumi save se Jehova i luk ol samting we yumi stap gotru long hem, hemia i givhan long yumi blong gohed blong stanap strong long taem blong trabol. Be hem i no jes luk ol trabol blong yumi nomo. Hem i kasemsave ol filing blong yumi, mo i yusum Baebol blong leftemap tingting blong yumi.

Baebol i Givhan Long Julian

Wari i Spolem Mi

“Mi stap wari oltaem mo mi kasem sik ya we man i no save kontrolem ol tingting mo fasin blong hem (obsessive-compulsive disorder OCD). Samtaem mi wari we mi no ekspektem nomo. Bambae i gat wan taem we mi harem gud, mo biaen mi stat blong harem nogud be mi no save from wanem. Mo mi harem nogud taem mi stap wetem ol narafala, from mi fraet long tingting we oli gat long mi.

“Ol fren blong mi we oli save problem blong mi, oli rili givhan long mi. Blong talem stret, samtaem oli talem sam samting we i no givhan. Be mi glad we oli traehad blong halpem mi.

“Samtaem wari mo sik ya OCD, i mekem se i had blong mi prea. Mi mas fosem mi wan blong mi save fokas mo toktok long Jehova. Taem mi tingbaot wan samting, kwiktaem nomo tingting blong mi i jenis i go long sam nara samting mo i had blong fokas. From we mi no save kontrolem ol tingting blong mi, i had blong mi putumgud ol toktok blong mi mo talemaot ol filing blong mi long Jehova.”

Baebol i Givhan Long Mi

“Long Baebol stadi blong mi, mi lanem se i no nid blong mekem ol longfala prea blong God i akseptem olgeta. Samtaem, taem mi harem se mi no save talemaot ol filing blong mi, mi jes prea se: ‘Jehova, plis givhan long mi.’ Mi sua se Jehova i kasemsave long samting we mi askem, from hem i givim samting we mi nidim. Narafala samting we i givhan, hemia help we mi kasem long dokta. Mi glad se tufala rod ya i givhan long mi, from naoia mi haremgud moa. Nating we mi mas traehad blong askem help long God, be mi mekem from mi sua se hem i kea mo i lavem mi.”