?Baebol i Soemaot Wanem Long Saed Blong Jehova?

1. ?From wanem yu glad tumas se Jehova i givim Baebol?

!YUMI glad tumas we Jehova i givim Baebol long yumi! Tru long Baebol, hem i givim ol waes advaes we i save halpem yumi blong dil wetem ol problem we yumi stap fesem tede. Mo tu, hem i givim wan nambawan hop blong fiuja long yumi. Be samting we i moa impoten se Jehova i yusum Baebol blong soemaot ol nambawan fasin blong hem long yumi. Taem yumi tingting dip long ol fasin ya blong hem, hemia i mekem yumi lavem hem mo yumi wantem kam fren blong hem.—Sam 25:14.

2. ?Wanem ol defren rod we Jehova i yusum blong soemaot hem long ol man?

² Jehova i wantem se olgeta man oli save hem. Bifo, Jehova i yusum ol drim, ol vison, mo ol enjel blong soemaot hem long ol man. (Nam. 12:6; Wok 10:3, 4) Sipos oli no bin raetemdaon ol drim, ol vison, mo mesej blong ol enjel, bambae yumi no save stadi long olgeta. Hemia nao from wanem Jehova i yusum ol man blong oli “raetemdaon long wan buk,” olgeta samting we hem i wantem blong yumi save. (Jer. 30:2) From we “rod blong tru God i stret gud,” yumi save trastem se rod ya we hem i yusum blong toktok long yumi, hem i beswan mo i save givhan long yumi.—Sam 18:30.

3. ?Olsem wanem Jehova i meksua se Baebol i stap gud kasem tede? (Aesea 40:8)

³ Ridim Aesea 40:8. Longtaem finis i kam, Tok blong God i givim ol waes advaes long ol gudfala man mo woman. ?Olsem wanem hemia i posibol? I tru se ol faswan hanraet oli bin raetem long ol skrol we oli save kam roten. Taswe, tede yumi no gat wan original kopi blong ol hanraet ya. Be Jehova i meksua se ol man oli mekem kopi blong tabu tok ya. Nating se ol man we oli mekem kopi blong ol tok ya oli sinman, be oli lukaot gud taem oli stap raetemdaon. Eksampol, long saed blong Hibru Haf blong Baebol, wan skola i talem se: “Yumi sua se i no gat wan narafala olfala buk we ol man oli lukaot gud moa taem oli mekem kopi blong hem.” Taswe, nomata se plante yia i pas, mo oli raetem ol tok ya long ol samting we oli save kam roten, mo ol man we oli raetem oli sinman, be yet yumi save trastem ol tok we yumi ridim long Baebol tede, from we oli soemaot klia ol tingting blong Man ya we buk ya i kamaot long hem, hemia Jehova.

4. ?Bambae yumi tokbaot wanem long stadi ya?

⁴ Jehova nao i stap givim “olgeta gudfala presen mo ol presen we oli nambawan” long yumi. (Jem. 1:17) Baebol i wan long olgeta beswan presen we Jehova i givim long yumi. Taem wan man i givim wan presen long yumi, hemia i soemaot se man ya i save gud yumi, mo ol samting we yumi nidim. Hemia i sem mak long saed blong Baebol. Taem yumi stadi gud long presen ya, bambae yumi lanem plante samting long saed blong Jehova. Yumi lanem se hem i save gud yumi, mo ol samting we yumi nidim. Long stadi ya, bambae yumi tokbaot tri fasin blong Jehova we Baebol i soemaot, hemia waes, jastis, mo lav. Fastaem bambae yumi luk olsem wanem Baebol i soemaot se God i waes.

BAEBOL I SOEMAOT SE GOD I WAES

5. ?Olsem wanem Baebol i soemaot se God i waes?

⁵ Jehova i save se yumi nidim ol waes advaes blong hem. Mo presen we hem i givim, hemia Baebol, i fulap long waes blong hem. Ol advaes blong Baebol oli gat paoa long laef blong ol man mo i save jenisim laef blong olgeta. Taem Moses i raetem ol faswan buk blong Baebol, hem i talem long ol man Isrel se: “Ol toktok ya oli no blong nating nomo, be oli minim laef blong yufala.” (Dut. 32:47) Olgeta we oli obei long ol Tok blong Baebol, oli save gat wan gudfala laef mo oli glad. (Sam 1:2, 3) Nating se oli raetem Tok blong God longtaem finis, be hem i gat paoa blong mekem laef blong ol man i kam gud moa. Eksampol, long haf ya “Baebol i Jenisim Laef Blong Ol Man,” we i stap long jw.org, yu save faenem bitim 50 laef stori we i soemaot olsem wanem Baebol i gat paoa, mo i ‘stap wok long laef blong ol man ya we oli bilif long hem’ tede.—1 Tes. 2:13.

6. ?From wanem Baebol i defren long ol narafala buk?

⁶ I no gat wan narafala buk we i olsem Tok blong God. ?From wanem? From Jehova God we i Stamba blong buk ya, hem i gat olgeta paoa, i stap olwe, mo i waes moa i bitim eni narafala man. Plante narafala buk, ol man oli gohed blong ridim nating se man we i raetem i ded finis, be plante taem advaes we i stap long ol buk ya i no moa save givhan long ol man. Be ol waes advaes long Baebol, oltaem oli wok gud, mo oli pruvum se oli save givhan long ol man nomata se oli laef long wanem taem. Taem yumi ridim tabu buk ya mo yumi tingting dip long samting we yumi lanem, Jehova i yusum tabu spirit blong halpem yumi blong luk olsem wanem yumi save folem ol advaes ya long laef blong yumi. (Sam 119:27; Mal. 3:16; Hib. 4:12) Yes, Jehova i wantem tumas blong halpem yu. Mo hemia i sud pulum yumi blong wantem ridim Baebol oltaem.

7. ?Olsem wanem Baebol i mekem ol man blong God bifo oli joen gud?

⁷ I gat wan narafala samting long Baebol we i soemaot se God i waes. Hemia se Baebol i halpem ol man blong God blong oli joen gud. Taem ol man Isrel oli go insaed long Promes Lan, oli stap long ol defdefren eria. Sam oli kam ol fisaman, samfala oli lukaot long ol animol, mo sam narafala oli wok olsem ol fama. Maet i isi blong ol man Isrel we oli laef long sem eria oli no moa tingbaot nid blong ol narafala man Isrel we oli stap long ol narafala haf blong kantri ya. Be Jehova i mekem wan arenjmen blong ol man Isrel oli save joen wanples long sam spesel taem, blong harem we ol man oli ridimaot Tok blong God mo oli eksplenem. (Dut. 31:10-13; Neh. 8:2, 8, 18) !Traem tingbaot filing blong wan man Isrel, taem hem i kamtru long Jerusalem mo i luk plante milian man blong Jehova we oli kam long ol defren pat blong kantri ya! Jehova i yusum rod ya blong halpem ol man blong hem blong oli gohed blong joen gud. Samtaem biaen, taem Kristin kongregesen i stat, i gat plante man mo woman we oli toktok defren lanwis. Sam long olgeta oli impoten mo sam nogat, sam oli rij mo sam oli pua. Be from we oli lavem Tok blong God, oli joen gud wanples blong wosipim tru God. Olgeta we oli kam ol man blong bilif, oli naf blong kasemsave long Tok blong God taem ol narafala Kristin oli givhan long olgeta, mo taem oli joen wanples long ol miting.—Wok 2:42; 8:30, 31.

8. ?Olsem wanem Baebol i mekem ol man blong God tede oli joen gud?

⁸ God ya we i waes i gohed blong yusum Baebol blong tijim ol man blong hem, mo mekem oli joen gud. Baebol i stamba blong olgeta trutok we yumi nidim blong save long saed blong Jehova. Evritaem yumi joen wanples long ol miting blong kongregesen mo long ol asembli blong harem oli ridim Baebol, oli eksplenem, mo tokbaot. Taswe Baebol i wan impoten tul we Jehova i yusum blong halpem ol man blong hem blong “oli wok blong hem we solda blong wan i joen long solda blong narawan.”—Sef. 3:9.

9. ?Yumi mas gat wanem fasin blong yumi naf blong kasemsave long Baebol? (Luk 10:21)

⁹ Traem luk wan narafala samting we i soemaot se Jehova i waes. Plante haf blong Baebol, oli raetem long wan fasin we ol man nomo we oli gat tingting daon, oli naf blong kasemsave long hem. (Ridim Luk 10:21.) Ol man long olgeta ples long wol oli stap ridim Baebol. Wan skola i talem se “plante man oli ridim Baebol moa i bitim eni narafala buk, mo oli tingting gud moa long hem i bitim ol narafala buk.” Be ol man nomo we oli gat tingting daon oli rili kasemsave mo folem samting we hem i talem.—2 Kor. 3:15, 16.

10. ?Wanem narafala rod we Baebol i soemaot se Jehova i waes?

¹⁰ I gat wan narafala rod tu we Baebol i soemaot se Jehova i waes. Jehova i yusum Baebol blong tijim yumi olsem wan grup, be tu hem i yusum blong tijim mo leftemap tingting blong yumi wanwan. Taem yumi ridim Baebol, yumi luksave se Jehova i intres long yumi wanwan. (Aes. 30:21) Taem yu fesem wan problem, ?hamas taem yu lukluk i go long Baebol mo ridim wan vas we yu harem se i stret gud long yu? Yes, oli raetem Baebol long wan fasin we plante milian man oli naf blong kasemsave long hem. ?Olsem wanem nao hem i gat ol infomesen we oli stret gud folem nid blong yu? Hemia from we man ya we i Stamba blong Baebol, hem i waes moa long ful yunives.—2 Tim. 3:16, 17.

BAEBOL I SOEMAOT SE GOD I GAT JASTIS

11. ?Olsem wanem God i soemaot se hem i mekem i sem mak long olgeta man taem oli raetem Baebol?

¹¹ Jastis i wan narafala fasin blong Jehova. (Dut. 32:4) Jastis i joen wetem fasin ya blong mekem i sem mak long olgeta man, mo hemia nao fasin blong Jehova. (Wok 10:34, 35; Rom 2:11) Yumi luksave se Jehova i mekem i sem mak long olgeta man, taem hem i mekem se oli raetem Baebol long wan lanwis we plante man oli toktok long hem long taem ya. Ol faswan 39 buk blong Baebol oli raetem long lanwis Hibru, we plante man blong God long taem ya oli naf blong kasemsave long hem. Be long taem blong ol faswan Kristin, bighaf blong ol man oli toktok lanwis Grik, taswe oli raetem ol laswan 27 buk blong Baebol long lanwis ya. Jehova i no gat tingting ya se oli mas raetem Tok blong hem long wan lanwis nomo. Tede, klosap eit milian man oli toktok plante defren lanwis. ?Taswe olsem wanem ol man ya oli save lanem moa long saed blong Jehova?

12. ?Olsem wanem Daniel 12:4 i stap kamtru long ol las dei ya?

¹² Tru long profet Daniel, Jehova i promes se long taem blong en, “tru save” we i stap long Baebol bambae i “kam plante.” Mo plante man bambae oli kasemsave long hem. (Ridim Daniel 12:4.) Wan rod we i mekem se plante man oli kasemsave long Baebol hemia tru long wok blong transletem, printim, mo seremaot ol Baebol mo ol buk we i stanap long Baebol. Baebol nao i wan buk we oli transletem mo seremaot moa i bitim ol narafala buk long wol. Ol kampani we oli stap transletem Baebol, samtaem oli salem long wan praes we i sas tumas. Be ol man blong Jehova oli stap transletem fulwan Baebol o sam haf blong hem nomo long bitim 240 lanwis, mo eni man i save gat wan kopi blong hem we i fri nomo. From samting ya, ol man blong olgeta nesen oli naf blong kasemsave long “gud nius ya blong Kingdom” bifo we en i kam. (Mat. 24:14) God ya blong jastis i wantem givim janis long olgeta man blong oli save hem, taem oli ridim Tok blong hem. Hem i mekem olsem from we hem i lavem yumi tumas.

BAEBOL I SOEMAOT SE GOD I GAT LAV

13. ?Olsem wanem Baebol i soemaot se Jehova i gat lav? (Jon 21:25)

¹³ Baebol i halpem yumi blong kasemsave long nambawan fasin ya blong Jehova, hemia lav. (1 Jon 4:8) Traem tingbaot ol samting we hem i putum i stap long Baebol, mo ol samting we hem i no putum. Hem i givim ol samting we yumi nidim blong yumi save fren gud wetem hem, mo blong lidim yumi blong gat wan hapi laef naoia, mo blong yumi save kasem laef we i no save finis. Be from we Jehova i lavem yumi, hem i no givim tumas infomesen we yumi no nidim blong mekem wok blong hem.—Ridim Jon 21:25.

14. ?Olsem wanem ol tok we i stap long Baebol oli soemaot se God i lavem yumi?

¹⁴ Jehova i soemaot lav long yumi tu, taem hem i toktok long yumi long fasin we i soemaot se hem i tinghae long yumi. Long Baebol, Jehova i no putum plante rul mo i no traem talem stret samting we yumi mas mekem o no mekem long laef blong yumi. Be hem i yusum ol laef stori, ol nambawan profet tok, mo ol gudfala advaes, blong halpem yumi blong mekem ol gudfala desisen. Long rod ya, Tok blong God i save pulum yumi blong lavem mo obei long Jehova long ful hat blong yumi.

15. (1) ?Baebol i soemaot olsem wanem se Jehova i kea long yumi? (2) Folem pija, ?smol gel, yangfala brata, mo olfala sista ya oli stap tingting dip long stori blong hu long Baebol?

¹⁵ Baebol i soemaot se Jehova i rili kea long yumi. ?Olsem wanem yumi save samting ya? Hemia from Baebol i fulap wetem stori blong ol man ‘we oli gat filing olsem yumi.’ (Jem. 5:17) Be samting we i moa impoten, hemia se taem yumi luk olsem wanem Jehova i dil wetem ol man ya, yumi naf blong kasemsave moa se “Jehova i lavem man tumas, mo i gat sore.”—Jem. 5:11.

16. Taem yumi ridim stori blong ol man long Baebol we oli mekem mastik, ?yumi lanem wanem long saed blong Jehova? (Aesea 55:7)

¹⁶ I gat wan narafala rod tu we Baebol i soemaot se Jehova i lavem yumi. Baebol i promes se God bambae i no save lego yumi taem yumi mekem mastik. Ol man Isrel oli mekem sin plante taem agensem Jehova, be taem oli soemaot se oli rili tanem tingting blong olgeta, God i fogivim olgeta. (Ridim Aesea 55:7.) Ol fas Kristin tu oli save se Jehova i lavem olgeta tumas. Jehova i pulum aposol Pol blong talem long ol Kristin se oli mas ‘fogivim mo leftemap tingting’ blong wan man we i mekem wan bigfala sin be i tanem tingting blong hem. (2 Kor. 2:6, 7; 1 Kor. 5:1-5) !I naes tumas blong luk se Jehova i no sakemaot ol man blong hem jes from we oli mekem mastik! Be from we hem i lavem olgeta, hem i halpem, i stretem, mo i tekem olgeta i kambak olsem ol fren blong hem. Mo hem i promes blong mekem sem samting ya tede long ol sinman we oli tanem tingting blong olgeta.—Jem. 4:8-10.

TINGHAE LONG “GUDFALA PRESEN” YA BAEBOL

17. ?From wanem Baebol i wan nambawan presen?

¹⁷ Jehova i bin givim wan gudfala presen long yumi. ?From wanem Tok blong hem i nambawan tumas? Olsem we yumi lanem, Baebol i soemaot se Jehova i waes, i gat jastis, mo i gat lav. Buk ya i soemaot se Jehova i wantem tumas we yumi save hem. Hem i wantem we yumi kam fren blong hem.

18. ?Olsem wanem yumi save soemaot se yumi glad long “gudfala presen” ya Baebol?

¹⁸ Yumi no wantem ting nating long “gudfala presen” ya, hemia Tok blong God. (Jem. 1:17) Taswe, i gud yumi gohed blong soemaot se yumi glad long presen ya. Yumi mekem olsem taem yumi tekem taem blong ridim mo tingting dip long ol tabu tok ya blong hem. Taem yumi mekem olsem, yumi save sua se man ya we i Stamba blong tabu buk ya, bambae i blesem yumi mo ‘bambae yumi faenem save blong God.’—Prov. 2:5.