Advaes Blong Yusum Websaet

Faenem Ol Atikol We Oli Advetaesem

Plante brata mo sista oli stap yusum ol atikol we oli stap advetaesem long fas pej blong jw.org long wok blong prij. I isi blong fowodem ol atikol ya i go long ol narafala, mo plante taem oli eksplenem olsem wanem ol profet tok blong Baebol oli stap kamtru tede. Wan brata i talem se ol atikol we oli stap kamaot long fas pej blong websaet, “hemia stret samting we yumi nidim blong yusum naoia we fasin blong prij i jenis.”

Be ol atikol ya oli stap jenis oltaem, ?taswe olsem wanem blong faenem ol atikol ya sipos oli no moa stap long fas pej?

• Long fas pej blong jw.org, yu klik long toktok ya “Yu Luk Sam Moa.” Ale, pej ya “Ol Haf We Oli Kamaot i No Longtaem Long Fas Pej” bambae i open. Long ples ya, bambae yu save faenem ol narafala atikol tu we oli bin advetaesem i no longtaem i pas.

• Long jw.org o JW Library^®, jusum “Laebri,” afta yu go long “Ol Haf We Oli Kamaot Oltaem,” mo biaen jusum “Sam Moa Topik.” Long seksen ya, i gat plante atikol we oli bin kamaot long fas pej.