1924​—Wan Handred Yia Bifo

OLI YUSUM RADIO BLONG PRIJ

Blong bitim wan yia, ol brata long Betel oli bin wok had blong bildim WBBR radio stesen long Staten Aelan, long taon blong Niu Yok. Afta we oli klinim eria ya, oli bildim wan bigfala haos blong ol wokman mo wan narafala haos blong putum ol tul. Taem wok ya i finis, ol brata oli stat blong karem ol tul blong yusum long radio. Be fastaem, oli nidim blong winim sam problem.

Ol brata oli luk se i had blong putum antena blong stesen ya, from we longfala blong antena ya hem i 91 meta, mo i mas hang bitwin tu pis wud we longfala blong tufala i 61 meta. Oli traem faswan taem, be i no wok. Be from we ol brata oli trastem Jehova, wok blong olgeta i go gud. Calvin Prosser, we i wok long projek ya, i talem se: “Sipos long faswan taem we mifala i hangem antena ya mo i wok, ating bambae mifala i praod mo talem se, ‘!Luk samting we mifala i mekem!’” Yes ol brata oli presem Jehova from i bin halpem olgeta, be i gat wan narafala problem.

Radio brodkasting ya i wan niufala samting, mo i had blong faenem mo pem ol tul blong hem. Nating se i olsem, ol brata oli faenem wan tul klosap, we sam man oli bin bildim i stap. Mo oli yusum wan telefon i bitim we oli pem wan maekrofon. Wan naet long manis Februari, ol brata oli mekem desisen blong traem testem ol samting ya. Oli nidim wan rikoding blong oli save traem long hem, ale ol brata oli sing long ol singsing blong Kingdom. Wan long ol brata ya hemia Ernest Lowe, mo hem i tokbaot fani samting we i hapen long taem ya. Hem i talem se taem ol brata oli stap singsing, oli kasem wan fon kol long Jaj Rutherford,b we i harem singsing ya long radio long Brooklyn, we hemia i samwe 25 kilometa longwe long olgeta.

Brata Rutherford i talem se: “!Stopem krangke saon ya, harem olsem se yufala i stap singsingaot!” Ol brata oli harem nogud smol, ale kwiktaem nomo oli stopem program ya. Be oli save se radio ya i wok gud, mo oli rere blong statem wan program blong radio.

Long 24 Februari 1924, taem oli stap mekem faswan program, Brata Rutherford i talem se bambae oli yusum radio stesen ya blong “mekem wok ya we Kraes we i King, i askem olgeta blong mekem.” Hem i talem se risen we oli mekem radio stesen ya, i blong “halpem ol man blong oli kasemsave long Baebol mo long impoten taem ya we yumi stap laef long hem.”

Faswan program we oli mekem i go gud nomo. Oli yusum radio stesen ya WBBR blong 33 yia, blong mekem ol man oli harem ol program blong ol man blong Jehova.

OLI TOK STRONG AGENSEM OL LIDA BLONG SKUL

Long Julae 1924, ol Baebol Studen oli joen long wan bigfala asembli long Columbus, Ohio. Long taem ya, ol deleget raon long wol oli kam, mo oli harem ol tok long lanwis Arabik, Inglis, Franis, Jemani, Grik, Hangari, Itali, Lituenia, Polis, Rasia, long ol lanwis blong Skandinavia, mo Yukren. Mo sam haf blong program ya oli mekem tru long radio, mo oli mekem plan blong ol man blong raetem niuspepa oli kam evri dei, blong raetem ripot long saed blong bigfala asembli ya.

Long Tasde 24 Julae, bitim 5,000 brata mo sista oli goaot blong prij long taon ya we asembli i stap long hem. Oli givimaot klosap 30,000 buk mo oli statem plante taosen Baebol stadi. Wajtaoa i singaot dei ya se “beswan taem blong asembli.”

Wan narafala samting we i hapen long asembli ya, hemia long 25 Julae, taem Brata Rutherford i no fraet blong ridimaot wan pepa we i tok agensem ol lida blong skul. Hem i talem se ol lida blong politik, relijen, mo bisnes, oli stap stopem ol man blong oli no lanem trutok long saed blong Kingdom blong God, we bambae God i yusum blong blesem ol man. Mo tu, hem i talem se ol man ya oli rong from oli sapotem League of Nations mo oli talem se hemia nao fasin blong God blong rulum wol. Ol Baebol Studen oli nidim strong tingting blong talemaot mesej ya long ol man.

Wajtaoa i tokbaot gudfala samting we i kamaot from asembli ya, i se: “Smol grup blong ami blong Masta we oli joen wanples long Asembli ya long Columbus, oli gobak we oli gat strong bilif . . . , mo i mekem se oli gat strong tingting blong prij, nating se ol man oli agensem olgeta.” Leo Claus, we i joen tu long asembli ya, i talem se: “Asembli ya i mekem mifala i glad tumas blong talemaot mesej ya long ol man long teritori blong mifala.”

Long Oktoba, ol Baebol Studen oli stat blong seremaot plante kopi blong traket ya Ecclesiastics Indicted, we i gat ol strong tok blong Brata Rutherford i stap long hem. Long wan smol taon long Oklahoma, U. S. A., Frank Johnson i finis blong seremaot ol traket, mo hem i mas wet 20 minit blong sam brata mo sista oli kam pikimap hem. Be hem i no save stap long klia ples, from we ol man blong taon ya oli kros long hem from i prij, mo oli wantem kilim hem. Ale hem i mekem desisen blong go haed insaed long wan jej we i stap klosap. Taem hem i go insaed, hem i luk se i emti, ale hem i putum sam kopi blong traket ya insaed long Baebol blong man we i stap prij, mo i putum wanwan kopi tu long ol jea, mo kwiktaem nomo hem i aot. Hem i gat smoltaem yet i stap, ale hem i go insaed long tu moa jej, mo i mekem sem samting bakegen.

Biaen, Frank i gobak kwiktaem long ples we oli mas pikimap hem. Ale, hem i go haed biaen long wan fuel stesen, mo i stap wajem ol man ya we oli stap lukaot hem blong kilim hem. Oli draev i kam pasem ples we hem i stap long hem, be oli no luk hem. Stret afta we oli pas i go, ol brata mo sista we oli prij klosap, oli kam pikimap hem mo oli aot.

Wan long ol brata ya i talem se: “Taem mifala i stap aot long taon, mifala i pas bitim tri jej. Mo i gat samwe 50 man olsem we oli stap stanap aotsaed long fored blong jej ya. Sam oli stap ridim traket, sam narafala oli stap holem i go antap, blong pasta blong olgeta i save luk. !I gud se mifala i aot kwiktaem, bifo we problem i kamaot! Be mifala i talem tangkiu long Jehova God blong mifala, from we hem i protektem gud mifala, mo i halpem mifala blong save wanem blong mekem blong seremaot traket ya, we long semtaem oli no kasem mifala.”

WAN EKSAMPOL BLONG STRONG TINGTING LONG WOK BLONG PRIJ

Long ol narafala kantri tu, ol Baebol Studen oli gat strong tingting blong prij. Long not blong Franis, Józef Krett i prij long ol man Polan we oli kam blong wok long maen. Oli mekem plan blong hem i givim wan tok we taetel blong hem se, “Laef Bakegen Long Ded i No Longtaem.” Taem oli givimaot invetesen long ol man long taon ya, wan lokol pris i talem long ol man blong hem se oli no mas go. Be samting we i hapen i defren. !Bitim 5,000 man oli go lesin long tok ya, mo pris ya tu i go! Brata Krett i askem blong pris ya i kam difendem bilif blong hem, be hem i no wantem. Ale, afta long tok ya, Brata Krett i givimaot evri buk we hem i gat, from hem i luksave se ol man ya oli tosta from Tok blong God.—Amos 8:11.

Long Afrika, Claude Brown i karem gud nius i go long Gold Coast, we naoia oli singaot se Gana. Ol tok we hem i mekem mo ol buk we hem i seremaot, i mekem se trutok i spred kwiktaem long kantri ya. John Blankson, we i stadi blong kam wan man blong meresin, i kam lesin long wan tok blong Brata Brown. Mo kwiktaem nomo hem i luksave se hem i faenem trutok. John i tingtingbak mo i se: “Trutok i mekem mi glad tumas, mo mi glad blong tokbaot trutok ya long ol narafala fren we mifala i skul tugeta from meresin.”

Wan dei taem John i kasemsave se tijing blong Triniti i no kamaot long Baebol, hem i go insaed long wan Anglikan jej mo i kwestinim wan pris from tijing blong Triniti. Nao pris ya i ronem hem, mo i singaot strong long hem se: “Yu yu no wan Kristin, yu stap joenem ol Devel ya. !Yu kamaot long ples ya!”

Taem John i kasem haos, hem i raetem wan leta i go long pris ya, i invaetem hem blong i kam mitim hem long wan pablik ples blong tufala i save tokbaot tijing blong Triniti. Nao pris ya i raet i gobak long John se hem i mas go long ofis blong prinsipol blong skul. Mo long ples ya, tija i askem long John sipos hem nao i bin raetem leta i go long pris.

Ale, John i ansa se: “Yes, mi ya.”

Nao tija ya i talem se John i mas raetem wan leta i go long pris ya blong talem sore. Ale, John i raetem leta ya se:

“Masta, tija blong mi i askem mi blong raetem wan leta blong talem sore long yu, be mi save mekem olsem nomo sipos yu talemaot se tijing blong yu i giaman.”

Tija ya i sapraes, mo i askem se: “Blankson, ?hemia nao samting we yu wantem raetem?”

Hem i se: “Yes, tija. Mi no mekem wan samting i rong, so hemia nomo samting we mi save raetem.”

Ale, tija ya i se: “Bae mifala i sakemaot yu long skul, from yu no save stap long skul ya sipos yu stap gohed blong tok agensem pris blong wan jej we gavman i stap sapotem.”

Nao John i se: “Be tija, . . . taem yu stap tijim mifala, mo i gat sam poen we mifala i no kasemsave gud long hem, ?mifala i askem kwestin, no?”

Tija i se: “Yes, i tru.”

Ale John i talem long hem se: “Be tija, hemia nao samting we i hapen. Pris ya i stap tijim mifala long saed blong Baebol mo mi askem wan kwestin long hem. Mo sipos hem i no naf blong ansarem kwestin ya, ?from wanem mi mas raet blong talem sore long hem?”

Oli no sakemaot Blankson long skul. Mo hem i no raetem wan leta blong talem sore.

LUKLUK I GO LONG FIUJA

Wajtaoa i tokbaot gudfala samting we i kamaot from wok we oli mekem long yia ya, i se: “Yumi save talem olsem Deved we i se: ‘Bambae yu givim paoa long mi blong mi go faet.’ (Ol Sam 18:39) Ol samting we i hapen long yia ya, i rili leftemap tingting blong yumi, from yumi luk olsem wanem Jehova i bin halpem yumi blong mekem wok blong hem. Ol gudfala man blong hem oli glad tumas blong talemaot gud nius.”

Samtaem long yia ya, ol brata oli mekem plan blong i gat wan moa radio stesen. Ale, oli bildim wan moa radio stesen klosap long Chicago. Niufala stesen ya oli singaotem se TOK, from we bambae oli yusum blong talemaot Tok blong God. Long taem ya nao, oli yusum ol tul we oli gat moa paoa, blong mekem se ol man we oli stap longwe we longwe, iven long not blong Kanada, oli save harem mesej blong Kingdom.

Long yia 1925, Jehova i halpem ol Baebol Studen blong oli kasemsave long Revelesen japta 12. Niufala save ya i mekem se samfala oli lego trutok. Be plante narafala oli glad blong kasemsave klia long ol samting we oli stap hapen long heven, mo olsem wanem hemia i save gat paoa long ol man blong God long wol.