Nogud Samting We i Hapen Long Faet
Samting we ol man oli ekspiriensem long taem blong faet, i moa nogud i bitim eni narafala trabol we man i fesem. Ol Soldia mo ol man we oli stap long ol ples we i gat faet, oli kasemsave samting ya.
OL SOLDIA
“Evri dei mi luk ol man oli kasem ol bigfala kil o oli ded. Mi harem se mi no sef.”—Gary, Briten.
“Mi kasem kil long baksaed mo fes blong mi, from we oli sutum mi. Mo mi luk plante oli ded, ol pikinini mo ol olfala. Faet i mekem se yu no moa harem nogud taem yu luk we narafala i safa o i ded.”—Wilmar, Kolombia.
“Taem yu luk oli sutum wan man long fored blong yu, hemia wan samting we i had blong fogetem. Oltaem bambae yu tingbaot taem ya we hem i stap singaot bigwan mo i stap krae.”—Zafirah, Yunaeted Stet.
OL MAN
“Mi harem se bambae mi neva save glad bakegen. Oltaem mi fraet se mi, o wan famle, o fren blong mi bambae i ded.”—Oleksandra, Yukren.
“Mifala i fraet taem mifala i stap laen blong tekem kakae stat long 2 klok long moning kasem 11 klok long naet, from we bolet i save kasem yu enitaem nomo.”—Daler, Tajikistan.
“Perens blong mi i ded long taem blong faet. Taswe mi stap mi wan nomo, i no gat man blong lukaot mo kea long mi.”—Marie, Ruwanda.
Ol man ya we yumi jes tokbaot olgeta oli safa from faet, be naoia olgeta evriwan oli gat pis. Mo oli sua se wan dei bambae i no moa gat ol faet. Wajtaoa ya i yusum Baebol blong eksplenem olsem wanem samting ya bambae i hapen.