Gat Pis Nating Se i Gat Faet
Gary we fastaem i wan soldia, i talem se: “Bifo, mi no kasemsave from wanem i gat plante raf fasin, i nogat jastis, mo i gat plante trabol. Be taem mi stadi Baebol, mi gat pis long tingting from mi save se wan dei, God bambae i mekem wol ya i kam wan sef ples.”
I gat sam narafala man tu we oli gat sem filing olsem Gary. Makem olsem wanem Baebol i givhan long olgeta.
BAEBOL I TALEM SE: “Yu, O Jehova, yu yu gud mo yu rere blong fogif.”—Ol Sam 86:5.
?OLSEM WANEM I GIVHAN?: “Vas ya i mekem mi sua se Jehova i gat bigfala sore. Mi save se bambae hem i fogivim mi from ol samting we mi bin mekem taem mi joen long faet.”—Wilmar, Kolombia.
BAEBOL I TALEM SE: “Mi mi stap mekem niufala heven mo wan niufala wol. Mo ol man bambae oli no moa tingbaot ol samting blong bifo, mo bambae oli no kam nating long hat blong olgeta.”—Aesea 65:17.
?OLSEM WANEM I GIVHAN?: “Ol samting we mi ekspiriensem long taem blong faet, oli mekem tingting blong mi i trabol mo mi kasem sik ya dipresen. Be vas ya i rimaenem mi se i no longtaem, Jehova bambae i tekemaot ol nogud memori mo ol rabis drim we mi stap gat. Bambae oli no moa stap long tingting mo hat blong mi. !Hemia i naes tumas!”—Zafirah, Yunaeted Stet.
BAEBOL I TALEM SE: “Long ol dei blong hem, bambae ol stret man oli olsem gras we i gru gud, mo bambae i gat pis long evri ples, go kasem we mun i no moa stap.”—Ol Sam 72:7.
?OLSEM WANEM I GIVHAN?: “Oltaem mi stap tingbaot ol tok ya. Mi save se i no longtaem ol nogud samting we oli kamaot from faet bambae oli finis. Bambae yumi no moa nid blong wari from sefti blong ol famle mo ol fren blong yumi.”—Oleksandra, Yukren.
BAEBOL I TALEM SE: “Ol dedman blong yu bambae oli laef. . . . !Yufala ya we i stap long das, yufala i wekap, yufala i singaot we yufala i glad!”—Aesea 26:19.
?OLSEM WANEM I GIVHAN?: “Bighaf blong ol famle blong mi oli ded taem i gat wan bigfala faet agensem ol traeb blong Tutsi. Be vas ya i mekem mi sua se bambae mi luk olgeta bakegen. !Mo mi luk fowod blong harem voes blong olgeta, taem oli laef bakegen!”—Marie, Ruwanda.
BAEBOL I TALEM SE: “I no longtaem, ol man nogud bambae oli lus. . . . Be ol man we oli gat tingting daon bambae oli tekem wol ya i blong olgeta, mo bambae oli glad tumas from oli gat pis we i bigwan tumas.”—Ol Sam 37:10, 11.
?OLSEM WANEM I GIVHAN?: “Nating se faet i finis, be ol rabis man oli stap yet mo i no gat jastis. Ol vas ya oli givhan bigwan long mi. Jehova i luk evri samting mo i kasemsave situesen blong mi. Hem i promes se i no longtaem olgeta nogud samting ya bambae oli lus, mo yumi no moa tingbaot olgeta.”—Daler, Tajikistan.
Ol man we magasin ya i tokbaot olgeta, naoia oli ol Witnes blong Jehova, mo olsem olgeta ya, i gat plante milian Witnes blong Jehova tu we Baebol i bin halpem olgeta blong oli gat pis long tingting. Baebol i halpem olgeta blong sakemaot filing ya blong no laekem narafala from kala blong skin, kantri, traeb, o from sam narafala risen. (Efesas 4:31, 32) Ol Witnes blong Jehova oli no joen long politik, mo oli no tekpat long eni samting we i joen wetem faet.—Jon 18:36.
Wan narafala samting we i givhan, hemia se ol Witnes blong Jehova raon long wol oli givgivhan long olgeta olsem wan famle. (Jon 13:35) Eksampol, Oleksandra we yumi tokbaot hem finis, i mas ronwe wetem sista blong hem from we i gat faet long ples blong olgeta. Hem i talem se: “Taem mitufala i krosem boda, mitufala i luk we ol Witnes blong kantri ya oli stap rere finis blong welkamem mitufala. I no isi blong laef long wan niufala kantri olsem wan refuji, be ol Witnes long ples ya oli givhan gud long mitufala.”
Mifala i invaetem yu blong kam joen long ol miting blong mifala blong lanem olsem wanem Baebol i save halpem yu blong gat pis. Yu go long jw.org blong faenem ples blong miting we i klosap long yu, o blong askem wan fri Baebol kos we ol Witnes blong Jehova oli mekem long buk ya !Enjoem Laef Olwe!