?From Wanem Ol Faet Oli Stap Gohed?

SIN

God i wokem faswan papa mo mama blong yumi, Adam mo Iv, long pija blong hem. (Jenesis 1:27) Taswe tufala i naf blong soemaot ol gudfala fasin we God i gat, olsem pis mo lav. (1 Korin 14:33; 1 Jon 4:8) Nating se i olsem, Adam mo Iv i no obei long God, tufala i mekem sin. From samting ya, tufala i pasem sin mo ded i kam long yumi evriwan. (Rom 5:12) Mo from we yumi sinman, ol nogud tingting we yumi gat oli save pulum yumi blong mekem ol nogud samting.—Jenesis 6:5; Mak 7:​21, 22.

GAVMAN BLONG MAN

God i no wokem ol man blong oli rulum olgeta bakegen. Baebol i talem se: “Man we i stap wokbaot, hem tu i no naf blong lidim step blong hem.” (Jeremaea 10:23) From samting ya, ol gavman blong man oli no naf blong finisim ol faet mo raf fasin.

SETAN MO OL DIMON BLONG HEM

Baebol i talem se “fulwol i stap long paoa blong man ya we i rabis.” (1 Jon 5:19) “Man ya we i rabis” i minim Devel Setan, mo hem i wan man blong kilim man i ded. (Jon 8:44) Hem wetem ol dimon blong hem nao oli stap pulum ol man blong faet mo mekem trabol.—Revelesen 12:​9, 12.