?Ol Faet Bambae Oli Finis Olsem Wanem?

GOD BAMBAE I FINISIM OL GAVMAN BLONG MAN

God bambae i finisim ol gavman blong man long taem blong faet ya we Baebol i singaot se Amagedon.a (Revelesen 16:16) Long taem ya, “ol king blong evri ples long wol” bambae oli joen tugeta blong “faet long bigfala dei blong God Ya We i Gat Olgeta Paoa.” (Revelesen 16:14) Yes, God bambae i yusum faet ya Amagedon, blong finisim olgeta faet long wol.

Kingdom o gavman blong God bambae i tekem ples blong ol gavman blong man. Kingdom ya i stap long heven mo long fiuja bambae hem i rulum wol ya blong olwe. (Daniel 2:44) God i jusum Boe blong hem Jisas Kraes, blong i rul long Kingdom ya. (Aesea 9:​6, 7; Matiu 28:18) Hemia i semfala Kingdomb ya we Jisas i tijim ol man blong hem blong oli prea from. (Matiu 6:​9, 10) Long fiuja, olgeta man long wol bambae oli joen tugeta aninit long wan gavman nomo, mo Jisas nao bambae i rulum olgeta.

Ol rula blong wol ya oli stap yusum paoa blong olgeta blong kasem samting we olgeta nomo oli wantem, be Jisas i no olsem, hem i kaen mo i mekem i sem mak long olgeta man. Taswe, ol man oli no nid blong wari se narafala bambae i tritim nogud olgeta from kala blong skin blong olgeta, kantri blong olgeta, o bakgraon blong olgeta. (Aesea 11:​3, 4) Long taem ya, ol man bambae oli no nid blong faet blong kasem jastis. ?From wanem? From we Jisas bambae i kea long nid blong wanwan man. Baebol i talem se: “Bambae hem i sevem ol puaman we oli stap krae from help, mo olgeta we oli no gat nem, mo olgeta we i no gat helpa. . . . Bambae hem i tekemaot olgeta long han blong ol man we oli mekem i strong tumas long olgeta, mo long raf fasin.”—Ol Sam 72:​12-14.

Kingdom blong God bambae i mekem se i no moa gat ol tul blong faet long olgeta ples long wol. (Maeka 4:3) Mo tu, bambae i spolem ol rabis man we oli gohed blong faet o we oli stap spolem ol narafala. (Ol Sam 37:​9, 10) Evri man, woman, mo pikinini, bambae oli harem se oli sef nomata weples oli go long hem.—Esikel 34:28.

Taem Kingdom blong God i rulum fulwol, evri man bambae oli gat wan gudfala laef. Kingdom bambae i finisim ol samting we i mekem se ol man oli stap faet olsem fasin pua, kakae i sot, mo i no gat i naf haos. Mo bambae i mekem se evri man oli gat i naf kakae, mo prapa haos blong olgeta.—Ol Sam 72:16; Aesea 65:​21-23.

Kingdom ya bambae i tekemaot tu ol nogud samting we faet i mekem long bodi, tingting, mo filing blong ol man. Mo olgeta we oli ded, bambae oli laef bakegen long wol ya. (Aesea 25:8; 26:19; 35:​5, 6) Ol famle bambae oli joen tugeta mo ol nogud memori we oli gat long saed blong ol faet, bambae oli kam olsem ‘ol samting blong bifo we oli lus olgeta.’—Revelesen 21:4.

GOD BAMBAE I TEKEMAOT SIN

Kingdom bambae i mekem ol man oli joen wanples blong wosipim tru God ya Jehova,c we i “God blong lav mo pis.” (2 Korin 13:11) Ol man bambae oli lanem blong laef tugeta long pis. (Aesea 2:​3, 4; 11:9) Mo olgeta we oli obei long God bambae oli kam stret gud olgeta, oli no moa slef blong sin.—Rom 8:​20, 21.

GOD BAMBAE I FINISIM SETAN MO OL DIMON BLONG HEM

Kingdom blong God bambae i finisim Setan mo ol dimon blong hem, we olgeta nao oli stap pulum ol man blong faet. (Revelesen 20:​1-3, 10) Taem oli no moa stap, “bambae i gat pis long evri ples.”—Ol Sam 72:7.

Yu save trastem se promes ya blong God blong finisim ol faet, bambae i kamtru. Yes, God i wantem tumas blong stopem ol faet mo hem i naf blong mekem samting ya.

• God i waes mo i gat paoa blong finisim ol faet mo ol rabis fasin. (Job 9:4) I no gat wan samting we i strong tumas, we God i no save mekem.—Job 42:2.

• God i no laekem blong luk we ol man oli safa. (Aesea 63:9) Mo tu, hem “i no laekem nating eni man we i laekem faet.”—Ol Sam 11:5.

• God i neva giaman mo oltaem hem i holemtaet ol promes blong hem.—Aesea 55:​10, 11; Taetas 1:2.