Folem Fasin Blong Ol Gudfala Enjel

1-2. (1) ?Olsem wanem yumi defren long ol enjel? (2) ?Wanem i mekem se yumi sem mak long ol enjel?

TAEM Jehova i pulum yu yu kam long trutok, yu kam insaed long wan bigfala famle blong olgeta we oli wosipim hem, we hemia i minim tu plante milian gudfala enjel. (Dan. 7:​9, 10) Taem yumi tingbaot ol enjel, yumi tingbaot se oli defren long yumi. Eksampol, oli laef longtaem moa i bitim yumi. (Job 38:​4, 7) Oli gat bigfala paoa, oli tabu, mo oli stret gud i bitim yumi. Taswe, yumi ol sinman yumi no naf blong kasem mak blong olgeta.—Luk 9:26.

² Be i gat sam samting we i mekem se yumi sem mak long ol enjel. Eksampol, yumi evriwan i naf blong soemaot ol gudfala fasin blong Jehova, mo yumi fri blong jusum samting. Mo tu, yumi wanwan i gat ol prapa nem, ol fasin, mo yumi mekem ol defdefren wok. Antap long hemia, yumi evriwan wetem ol enjel, yumi gat filing ya we yumi wantem wosipim Krieta blong yumi.—1 Pita 1:12.

3. ?Yumi save lanem wanem long eksampol blong ol gudfala enjel?

³ From we i gat plante samting we i mekem se yumi sem mak long ol enjel, gudfala eksampol blong olgeta i save leftemap tingting blong yumi mo givhan bigwan long yumi. Yes, yumi save lanem plante lesen long eksampol blong olgeta. Taswe, long stadi ya bambae yumi tokbaot olsem wanem yumi save folem fasin blong olgeta blong gat tingting daon, lavem ol man, stanap strong, mo wok had blong mekem kongregesen i stap klin.

OL ENJEL OLI GAT TINGTING DAON

4. (1) ?Ol enjel oli soemaot olsem wanem se oli gat tingting daon? (2) ?From wanem ol enjel oli gat tingting daon? (Ol Sam 89:7)

⁴ Ol gudfala enjel oli gat tingting daon. Nating se oli gat ekspiriens, oli gat bigfala paoa, mo oli waes, be oltaem oli obei long Jehova. (Sam 103:20) Taem oli stap mekem ol wok blong olgeta, oli neva tok flas from samting we oli mekem, o flas from bigfala paoa blong olgeta. Oli glad nomo blong mekem samting we Jehova i wantem, nating se ol narafala oli no save nem blong olgeta.a (Jen. 32:​24, 29; 2 King 19:35) Oli no wantem akseptem eni ona we Jehova i gat raet blong kasem. ?From wanem ol enjel oli gat tingting daon? Hemia from we oli lavem Jehova mo oli respektem hem bigwan.—Ridim Ol Sam 89:7.

5. ?Olsem wanem wan enjel i soemaot tingting daon, taem hem i stretem aposol Jon? (Mo tu, yu luk pija.)

⁵ Traem tingbaot wan stori we i soemaot klia se ol enjel oli gat tingting daon. Samwe long yia 96 K.T., wan enjel we oli no talem nem blong hem, i soemaot wan nambawan vison long aposol Jon. (Rev. 1:1) ?Long taem ya, Jon i mekem wanem? Hem i traem blong wosipim enjel ya. Be kwiktaem nomo, gudfala enjel ya i stopem hem, mo i se: “!Yu no mekem olsem! Mi tu mi wan slef nomo olsem yu mo ol brata blong yu . . . !Yu mas wosipim God nomo!” (Rev. 19:10) !Enjel ya i rili gat tingting daon! Hem i no wantem kasem ona mo glori. Kwiktaem nomo, hem i talem long Jon blong i wosipim Jehova God. Be long semtaem, hem i no luklukdaon long Jon. Nating se enjel ya i mekem wok blong Jehova longtaem moa, mo i gat moa paoa i bitim Jon, be hem i talem long Jon se tufala tugeta i olsem slef nomo. Mo taem enjel ya i stretem Jon, hem i no tok strong long hem o tritim nogud hem. Be hem i toktok kaen from hem i luksave se Jon i sapraes tumas.

6. ?Olsem wanem yumi save folem fasin blong ol enjel blong gat tingting daon?

⁶ ?Olsem wanem yumi save folem fasin blong ol enjel blong gat tingting daon? Taem yumi mekem wok blong yumi, i nogud yumi tok flas o traem blong leftemap yumi from. (1 Kor. 4:7) Mo tu, yumi no mas ting se yumi gud moa long ol narafala, from we yumi mekem wok blong Jehova longtaem moa, o yumi holem sam spesel wok. Blong talem stret, taem yumi holem plante moa wok, yumi sud mekem tingting blong yumi i stap daon moa. (Luk 9:48) Olsem ol enjel, yumi wantem givhan long ol narafala, be yumi no wantem leftemap yumi wan.

7. ?Olsem wanem yumi soemaot se yumi gat tingting daon taem yumi givim advaes o stretem wan man?

⁷ Yumi tu, yumi save soemaot tingting daon sipos yumi mas givim advaes o stretem wan Kristin o pikinini blong yumi. Samtaem, yumi mas givim ol strong advaes long narafala. Be olsem enjel ya we i toktok kaen taem i stretem Jon, yumi tu taem yumi givim strong advaes long narafala, yumi mas toktok kaen blong mekem se hem i no harem nogud. Sipos yumi no tinghae tumas long yumi wan, bambae yumi naf blong givim advaes we i stanap long Baebol, long wan fasin we i kaen mo i soemaot respek.—Kol. 4:6.

OL ENJEL OLI LAVEM OL MAN

8. (1) Folem Luk 15:​10, ?ol enjel oli soemaot olsem wanem se oli lavem ol man? (2) ?Olsem wanem ol enjel oli halpem yumi long wok blong prij? (Mo tu, yu luk pija.)

⁸ Ol enjel oli no stap longwe long ol man. Defren olgeta, oli lavem ol man. Oli glad taem wan man we i mekem bigfala sin i tanem tingting blong hem, o wan man i jenisim ol fasin blong hem mo i kam long trutok. (Ridim Luk 15:10.) Mo tu, ol enjel oli joen long wok blong talemaot Kingdom. (Rev. 14:6) Nating se oli no prij long ol man stret, be oli lidim ol brata mo sista i go long wan man we i wantem save Jehova. I tru, yumi no save talem stret se evritaem ol enjel oli lidim yumi i go long ol man, from we Jehova i save yusum sam narafala rod tu. Hem i save yusum tabu spirit blong halpem ol man we oli wantem save hem, o blong lidim yumi i go long olgeta. (Wok 16:​6, 7) Be yet, hem i yusum ol enjel blong oli halpem yumi taem yumi prij. Taswe, taem yumi talemaot gud nius, yumi save sua se ol enjel bambae oli stap blong sapotem yumi.—Yu luk bokis ya “God i Ansarem Prea Blong Olgeta.”

9. ?Olsem wanem yumi save folem fasin blong ol enjel blong lavem ol man?

⁹ ?Olsem wanem yumi save folem eksampol blong ol enjel blong lavem ol man? Taem yumi harem oli talemaot se kongregesen i tekembak wan man, yumi mas glad olsem ol enjel. Yumi save go welkamem hem mo talem long hem se yumi lavem hem. (Luk 15:​4-7; 2 Kor. 2:​6-8) Mo tu, yumi folem fasin blong ol enjel taem yumi mekem bes blong yumi long wok blong prij. (Pri. 11:6) Ol enjel oli sapotem gud yumi long wok blong talemaot gud nius. Long sem fasin, yumi tu yumi mas lukaot rod blong sapotem ol brata mo sista long wok blong prij. Eksampol, ?yumi mekem plan blong prij wetem ol pablisa we oli no gat tumas ekspiriens? ?Yumi save sapotem ol brata mo sista we oli olfala o we oli sik, blong oli save joen moa long wok blong prij?

10. ?Yumi lanem wanem long ekspiriens blong Sara?

¹⁰ ?Olsem wanem sipos yumi no naf blong mekem moa? Yumi save faenem rod yet blong wok wetem ol enjel long wok blong prij. Tingbaot ekspiriens blong Sara,b wan sista long India. Afta we hem i paenia blong samwe 20 yia, hem i kasem wan bigfala sik mo hem i no moa save kamaot long bed. I sua se hem i harem nogud tumas. Be wetem help blong ol brata mo sista mo Baebol riding, hem i naf blong gat stret tingting bakegen. I tru, from we hem i sik, hem i mas faenem sam niufala rod blong prij. Mo from we hem i no save sidaon mo raetem ol leta, hem i prij nomo long telefon. Taswe, hem i ring long ol visit blong hem, nao olgeta oli givim nem blong sam man we oli intres blong save moa long Baebol. From samting ya, long sam manis nomo, Sara i gat 70 Baebol stadi. Mo hemia i bitim wanem we hem i naf blong mekem. Taswe, hem i givimaot sam long ol Baebol stadi ya long ol narafala long kongregesen. Plante long ol Baebol stadi blong hem, naoia oli stap kam long ol miting. !I sua se ol enjel oli glad tumas blong wok wetem ol brata mo sista, olsem Sara, we oli mekem bes blong olgeta long wok blong prij!

OL ENJEL OLI SOEMAOT SE OLI STANAP STRONG

11. ?Olsem wanem ol gudfala enjel oli soemaot se oli stanap strong?

¹¹ Ol gudfala enjel oli soemaot nambawan eksampol long fasin blong stanap strong. Blong plante taosen yia, oli stanap strong nating se i no gat jastis, mo i gat plante rabis fasin. Oli luk we Setan mo plante narafala enjel we oli bin wosipim Jehova, oli tanem baksaed mo oli agensem Jehova. (Jen. 3:1; 6:​1, 2; Jud 6) Baebol i tokbaot wan gudfala enjel we blong plante dei, hem i stanap strong agensem wan rabis enjel. (Dan. 10:13) Mo tu, stat long taem blong Adam mo Iv, ol enjel oli luk we i gat smol man nomo we oli sapotem tru wosip. Nating se i olsem, ol gudfala enjel ya oli glad nomo mo oli gat strong tingting blong gohed blong wosipim Jehova. Oli save se long stret taem, Jehova bambae i finisim ol rabis fasin.

12. ?Wanem i save halpem yumi blong stanap strong?

¹² ?Olsem wanem yumi save folem fasin blong ol enjel blong stanap strong? Olsem ol enjel, tede yumi luk we i no gat jastis o yumi fesem fasin agens. Be yumi gat sem tingting olsem ol enjel se long stret taem, God bambae i finisim olgeta rabis fasin. Taswe, olsem ol enjel, yumi “no givap blong mekem ol gudfala wok.” (Gal. 6:9) Mo God i promes se bambae hem i halpem yumi blong stanap strong. (1 Kor. 10:13) I gud yumi prea from tabu spirit blong Jehova, blong yumi save gat longfala tingting mo yumi glad. (Gal. 5:22; Kol. 1:11) ?Olsem wanem sipos yu stap fesem fasin agens? I gud yu trastem Jehova fulwan, mo yu no fraet. Oltaem Jehova bambae i sapotem yu mo mekem yu yu strong.—Hib. 13:6.

OL ENJEL OLI WOK HAD BLONG MEKEM KONGREGESEN I STAP KLIN

13. ?Wanem spesel wok we ol enjel oli stap mekem long ol las dei ya? (Matiu 13:​47-49)

¹³ Long ol las dei ya, Jehova i givim wan spesel wok long ol enjel. (Ridim Matiu 13:​47-49.) Wok blong prij i pulum plante milian man raon long wol, blong oli intres long trutok. Sam long ol man ya oli kam ol Kristin, be sam narafala nogat. Baebol i talem se: “Ol rabis man we oli stap wetem ol stret man, ol enjel bambae oli go tekemaot olgeta.” Hemia i min se wok blong ol enjel i blong protektem kongregesen. ?Be hemia i min se olgeta we oli lego trutok from sam defren risen, bambae oli neva kambak? ?Mo i min se bambae i neva gat problem insaed long kongregesen? Si i save hapen. Be yumi sua se ol enjel oli stap wok had blong mekem se kongregesen i stap klin.

14-15. ?Olsem wanem yumi save folem fasin blong ol enjel mo soemaot se yumi wantem mekem kongregesen i stap klin? (Mo tu, yu luk ol pija.)

¹⁴ ?Olsem wanem yumi save folem fasin blong ol enjel blong mekem se kongregesen i stap klin? Hemia taem yumi traehad blong protektem frensip blong yumi wetem Jehova. Yumi mekem olsem, taem yumi jusum gud ol fren blong yumi mo yumi sakemaot eni samting we i save spolem frensip blong yumi wetem Jehova. Sipos yumi mekem olsem, yumi stap protektem kongregesen blong i stap klin. (Sam 101:3) Mo tu, yumi save halpem ol brata mo sista blong oli gohed blong holemstrong long Jehova. Eksampol, ?yumi save mekem wanem sipos yumi save se wan Kristin i mekem wan bigfala sin? From we yumi lavem hem, bambae yumi talem long hem blong i go toktok wetem ol elda. Be sipos hem i no wantem, yumi nao yumi mas talemaot samting ya long ol elda. !Yumi mekem olsem from yumi wantem givhan kwiktaem long Kristin ya!—Jem. 5:​14, 15.

¹⁵ Be sore tumas, samfala we oli mekem ol bigfala sin, kongregesen i mas putumaot olgeta. Sipos i olsem, yumi “mas stop blong joen” wetem olgeta.c (1 Kor. 5:​9-13) Plan ya i givhan blong kongregesen i stap klin. Antap moa, taem yumi jusum blong no joen wetem olgeta we kongregesen i putumaot, yumi soemaot se yumi kaen long olgeta. Taem yumi mekem olsem, hemia i save pulum olgeta blong oli kambak long trutok. Mo sipos oli kambak, yumi wetem Jehova mo ol enjel, yumi evriwan i glad.—Luk 15:7.

16. ?Wanem fasin blong ol enjel we yu yu wantem tumas blong folem?

¹⁶ !I wan bigfala ona we Jehova i save letem yumi blong yumi lanem sam samting long saed blong ol enjel, mo wok gud wetem olgeta! I gud yumi folem gudfala fasin blong olgeta blong gat tingting daon, lavem ol man, stanap strong, mo wok had blong mekem kongregesen i stap klin. Sipos yumi mekem olsem, yumi tu yumi save stap olsem ol famle blong Jehova blong olwe.