?From Wanem i Gud Blong Lukaotem Advaes?

1. ?Olsem wanem yumi save mekem ol waes desisen mo mekem ol plan blong yumi oli go gud? (Ol Proveb 13:10; 15:22)

YUMI evriwan i wantem mekem ol waes desisen. Mo yumi evriwan i wantem se ol plan blong yumi oli go gud. Blong mekem olsem, Tok blong God i talem se yumi mas lukaotem advaes.—Ridim Ol Proveb 13:10; 15:22.

2. ?Jehova i promes blong mekem wanem long yumi?

² Beswan Man we yumi save askem waes mo advaes long hem, hemia Papa blong yumi Jehova. Hem i promes blong givhan long yumi, i se: “Bambae mi givim advaes long yu, we ae blong mi bambae i stap oltaem long yu.” (Sam 32:8) Ol tok ya oli soemaot se Jehova i no givim advaes nomo long yumi, be hem i soemaot se hem i intres long yumi wanwan, mo i halpem yumi blong folem ol advaes blong hem.

3. ?Bambae yumi tokbaot wanem long stadi ya?

³ Long stadi ya, bambae yumi yusum Tok blong God blong faenem ansa blong ol fofala kwestin ya: (1) ?Wanem fasin we mi mas gat sipos mi wantem se ol gudfala advaes i givhan long mi? (2) ?Hu i save givim gudfala advaes long mi? (3) ?Olsem wanem mi save soemaot se mi rili wantem blong kasem advaes? (4) ?From wanem mi no mas askem ol narafala blong mekem ol desisen blong mi?

?WANEM FASIN WE MI MAS GAT?

4. ?Yumi mas gat wanem fasin blong ol gudfala advaes i save givhan long yumi?

⁴ Yumi mas gat tingting daon sipos yumi wantem se ol gudfala advaes i givhan long yumi. Yumi mas luksave se yumi wan nomo, yumi no gat ol save mo ekspiriens we yumi nidim blong mekem ol waes desisen. Sipos yumi no gat tingting daon, Jehova bambae i no save givhan long yumi. From samting ya, bambae yumi no save lesin long ol advaes we yumi ridim long Tok blong God, sem mak olsem we wota i no save fas long ston, be i glis nomo i go. (Maeka 6:8; 1 Pita 5:5) Be sipos yumi gat tingting daon, bambae yumi kwik blong lesin long ol advaes we yumi kasem we i stanap long Baebol, mo ol advaes ya bambae i save givhan long yumi.

5. ?Wanem sam bigfala wok we King Deved i mekem we hem i save flas from?

⁵ Traem tingbaot samting we yumi save lanem long eksampol blong King Deved. Ol bigfala wok we hem i mekem, oli save mekem se hem i kam flas. Plante yia bifo we hem i kam king, ol man oli save gud hem from we hem i gat gudhan blong plei miusik. King tu i askem long hem blong i kam plei long haos blong hem. (1 Saml. 16:​18, 19) Stat long taem we Jehova i makemaot Deved blong i kam king, Hem i givim tabu spirit long Deved blong mekem se hem i gat paoa. (1 Saml. 16:​11-13) Plante man oli presem Deved from we hem i kilim i ded ol enemi blong olgeta, olsem bigfala man Filistia ya, Golaeat. (1 Saml. 17:​37, 50; 18:7) Sipos Deved i flas from ol bigfala wok we hem i mekem, hem i save gat tingting ya se hem i no nid blong lesin long ol advaes we ol narafala oli givim. Be Deved i no gat tingting olsem.

6. ?Wanem i soemaot se Deved i glad blong lesin long ol advaes? (Mo tu, yu luk pija.)

⁶ Afta we Deved i kam king, hem i joen plante wetem ol man we oli save givim gudfala advaes long hem. (1 Kron. 27:​32-34) Yumi no sapraes long samting ya, from we bifo we hem i kam king, oltaem hem i stap lesin long ol gudfala advaes we ol narafala oli givim. Hem i lesin long ol advaes we ol man oli givim, be i no hemia nomo. Hem i lesin tu long advaes blong wan woman, hemia Abigel. Abigel i waef blong Nabal, wan man we i flas, i no respektem narafala, mo i no stap talem tangkiu long narafala. From we Deved i gat tingting daon mo i lesin long advaes we Abigel i givim, hemia i blokem hem blong i no mekem wan bigfala mastik.—1 Saml. 25:​2, 3, 21-25, 32-34.

7. ?Wanem ol lesen we yumi save lanem long eksampol blong Deved? (Prija 4:13) (Mo tu, yu luk ol pija.)

⁷ Yumi save lanem sam lesen long eksampol blong Deved. Maet yumi gat gudhan blong mekem sam samting, o yumi gat wan impoten wok o posisen. Nating se i olsem, yumi no mas gat tingting ya se yumi save evri samting mo yumi no nidim blong kasem advaes. Mo olsem Deved, yumi mas glad blong lesin long ol gudfala advaes, nomata hu i givim advaes ya. (Ridim Prija 4:13.) Sipos yumi mekem olsem, bambae yumi no mekem ol bigfala mastik we i save mekem se yumi mo ol narafala i harem nogud.

?HU I SAVE GIVIM GUDFALA ADVAES LONG MI?

8. ?From wanem Jonatan i naf blong givim gudfala advaes long Deved?

⁸ Traem tingbaot wan narafala lesen we yumi save lanem long eksampol blong Deved. Hem i lesin long ol advaes we hem i kasem long ol narafala we oli fren gud wetem Jehova, mo we oli kasemsave gud tu long samting we hem i stap fesem. Eksampol, taem Deved i wantem faenemaot sipos King Sol bambae i glad blong mekem pis wetem hem, Deved i lesin long advaes blong Jonatan, we i boe blong Sol. ?From wanem Jonatan i naf blong givim gudfala advaes long hem? Hemia from we Jonatan i fren gud wetem Jehova, mo hem i save gud Sol. (1 Saml. 20:​9-13) ?Olsem wanem yumi save folem eksampol blong Deved?

9. ?Hu nao i save givim gudfala advaes long yumi? Yu eksplenem. (Ol Proveb 13:20)

⁹ Taem yumi nidim advaes, i gud yumi askem long wan we i fren gud wetem Jehova, mo i save gud tu long samting we yumi stap fesem.a (Ridim Ol Proveb 13:20.) Eksampol, sipos wan yangfala brata i stap lukaotem wan sista blong i mared wetem, ?bambae hu nao i save givim gudfala advaes long hem? Sipos hem i askem advaes long wan fren blong hem we i no mared, maet bambae fren ya i save givim gudfala advaes long hem sipos advaes ya i stanap long Baebol. Be sipos hem i askem advaes long wan kapol we oli save gud hem, mo we tufala i mekem wok blong Jehova tugeta blong plante yia, bambae tufala i save givim advaes we i stret gud long hem. Hemia from we tufala i save tokbaot ol advaes blong Baebol, be i no hemia nomo, bambae tufala i save tokbaot tu ol lesen we tufala i lanem long mared blong tufala.

10. ?Naoia bambae yumi tokbaot wanem?

¹⁰ Yumi tokbaot finis fasin we yumi mas gat mo hu nao i save givim gudfala advaes long yumi. Naoia bambae yumi tokbaot from wanem yumi mas soemaot se yumi rili wantem blong kasem advaes, mo sipos i stret blong askem ol narafala blong mekem ol desisen blong yumi.

?OLSEM WANEM MI SAVE SOEMAOT SE MI RILI WANTEM BLONG KASEM ADVAES?

11-12. (1) ?Samtaem yumi save mekem wanem? (2) ?King Rehoboam i mekem wanem taem hem i gat wan impoten desisen blong mekem?

¹¹ Samtaem, wan man i askem advaes long narafala, be blong talem stret, hem i mekem desisen finis se bambae hem i mekem wanem. Hem i askem narafala nomo blong luk sipos oli agri wetem desisen blong hem. Be sipos wan man i mekem olsem, hemia i soemaot se hem i no rili wantem blong kasem advaes. I gud wan man olsem i lanem lesen long samting we i hapen long King Rehoboam.

¹² Rehoboam i tekem ples blong King Solomon mo i kam king blong Isrel. Taem Rehoboam i kam king, ol man long nesen ya oli gat plante samting finis, be oli harem se Solomon i bin mekem i strong tumas long olgeta. Ale, oli kam luk Rehoboam mo oli plis long hem blong hem i mekem wok blong olgeta i kam isi moa. Rehoboam i askem long olgeta blong oli givim taem long hem, blong hem i tingting long desisen we bambae hem i mekem. Fastaem hem i mekem i gud, hem i askem advaes long ol man we oli olfala moa long hem, we oli bin givhan long Solomon. (1 King 12:​2-7) Be biaen, hem i sakemaot advaes blong olgeta. ?From wanem? Maet hemia from we Rehoboam i mekem desisen finis long samting we bambae hem i mekem, mo i wantem se narafala i agri nomo wetem hem. Taswe, taem hem i askem advaes long ol yangfala man mo hem i luk se advaes we oli givim i stret long tingting blong hem, hem i glad. (1 King 12:​8-14) Ale, Rehoboam i ansa long ol man Isrel folem advaes ya we ol yangfala man oli talem. From samting ya, nesen blong Isrel i seraot, mo stat long taem ya, Rehoboam i gohed blong kasem plante trabol.—1 King 12:​16-19.

13. ?Olsem wanem blong save sipos yumi rili wantem blong kasem advaes?

¹³ ?Yumi save lanem wanem long eksampol blong Rehoboam? Yumi lanem se yumi mas soemaot se yumi rili wantem blong kasem advaes. ?Olsem wanem blong save sipos yumi rili wantem blong kasem advaes? Yumi save askem yumi wan se: ‘Taem mi askem advaes long narafala, ?mi mi kwik blong sakemaot advaes ya sipos i no stret long tingting blong mi?’ Traem tingbaot wan eksampol.

14. ?Yumi mas tingbaot wanem taem yumi kasem advaes? Talem wan eksampol. (Mo tu, yu luk pija.)

¹⁴ Traem tingbaot se wan brata i gat janis blong kasem wan wok we i save givim gudfala pei long hem. Bifo we hem i agri blong mekem wok ya, hem i askem advaes long wan elda, mo i eksplenem se wok ya bambae i mekem se hem i stap longwe long famle blong hem blong plante manis. Ale, elda ya i mekem brata ya i tingbaot stamba trutok ya long Baebol, se hem i gat impoten wok ya blong lukaot gud long famle blong hem long saed blong spirit. (Efes. 6:4; 1 Tim. 5:8) Brata ya i kwik blong sakemaot advaes blong elda ya, mo i go askem tingting blong ol narafala brata from we hem i wantem harem nomo advaes we i stret long tingting blong hem. ?Yu ting se brata ya i rili wantem blong kasem advaes? ?O hem i mekem desisen blong hem finis mo i stap lukaotem man blong i agri wetem hem nomo? Yumi mas tingbaot se hat blong yumi i save giaman long yumi. (Jer. 17:9) Samtaem, advaes we yumi no wantem harem, hemia nao advaes we yumi nidim.

?I STRET BLONG MI ASKEM NARAFALA BLONG I MEKEM OL DESISEN BLONG MI?

15. ?Yumi mas lukaot gud se yumi no mekem wanem, mo from wanem?

¹⁵ Jehova i wantem se yumi wanwan i mekem ol prapa desisen blong yumi. (Gal. 6:​4, 5) Olsem we yumi tokbaot finis, wan man we i waes bambae i lukaotem advaes long Tok blong God mo askem advaes long olgeta we oli bigman long Kristin fasin, bifo we hem i mekem wan desisen. Be yumi mas lukaot gud se yumi no askem narafala blong i mekem ol desisen blong yumi. Maet samfala oli mekem olsem, taem oli askem stret long wan we oli trastem se: “?Bambae yu yu mekem wanem sipos yu stap long ples blong mi?” Maet sam narafala oli no askem stret, be oli mekem sem desisen we narafala i mekem, nating se oli no tingting gud fastaem.

16. ?Wanem i hapen long kongregesen blong Korin? ?Hu nao i mas mekem desisen sipos bambae oli kakae mit we oli givim finis i go long ol aedol o nogat? (1 Korin 8:7; 10:​25, 26)

¹⁶ Traem tingbaot desisen we ol fas Kristin long kongregesen blong Korin oli mas mekem, long saed blong mit we maet ol man oli givim finis i go long ol aedol. Pol i talem long ol Kristin ya se: “Yumi save se wan aedol i nating nomo, mo i gat wan tru God nomo.” (1 Kor. 8:4) From samting ya, samfala long kongregesen oli ting se i oraet nomo blong kakae mit we maet ol man oli givim finis i go long ol aedol, mo biaen oli salem long maket. Sam narafala oli mekem desisen se bambae oli no kakae ol mit olsem, from we hemia bambae i mekem tingting blong olgeta we i stap jajem olgeta i kam doti. (Ridim 1 Korin 8:7; 10:​25, 26.) Hemia wan desisen we wanwan man i mas mekem. Pol i neva talem long olgeta long Korin blong oli mekem desisen blong ol narafala, o blong oli mekem sem desisen we narafala i mekem. Hemia from we olgeta wanwan oli mas “talemaot olgeta fasin blong [olgeta] long God.”—Rom 14:​10-12.

17. ?Wanem i save hapen sipos yumi folem nomo desisen we ol narafala oli mekem? Talem wan eksampol. (Mo tu, yu luk ol pija.)

¹⁷ Tede, ?wanem samting i save hapen we i klosap sem mak? Traem tingbaot desisen we yumi mas mekem long saed blong ol smosmol haf blong blad. Wanwan Kristin i mas mekem prapa desisen blong hem se bambae hem i tekem ol smosmol haf blong blad o nogat.b Maet yumi faenem i had blong kasemsave gud long ol smosmol haf blong blad, be yumi wanwan i mas mekem prapa desisen blong yumi long saed ya. (Rom 14:4) Sipos yumi folem nomo desisen we narafala i mekem, bambae yumi no save trenem tingting blong yumi we i save stikim yumi. Yumi save trenem tingting blong yumi nomo, sipos yumi yusum tingting blong yumi blong mekem prapa desisen blong yumi folem ol stamba trutok blong Baebol. (Hib. 5:14) Taswe, ?wetaem i stret blong yumi askem advaes long wan Kristin we i bigman long tingting? Yumi save askem advaes nomo sipos yumi mekem prapa risej blong yumi, be yumi no kasemsave gud yet olsem wanem ol stamba trutok blong Baebol oli joen wetem desisen blong yumi.

GOHED BLONG LUKAOTEM ADVAES

18. ?Jehova i givim wanem long yumi?

¹⁸ Jehova i soemaot se hem i trastem yumi, taem hem i letem yumi blong yumi mekem ol prapa desisen blong yumi. Hem i givim Tok blong hem Baebol long yumi, blong i lidim yumi. Mo hem i givim ol gudfala fren long yumi, we oli save halpem yumi blong kasemsave olsem wanem blong folem ol stamba trutok blong Baebol. Yes, hem i soemaot se hem i wan Papa we i lukaot gud long yumi. (Prov. 3:​21-23) ?Olsem wanem yumi save soemaot se yumi glad long ol samting we hem i givim long yumi?

19. ?Olsem wanem yumi save gohed blong mekem Jehova i glad?

¹⁹ Ol papa mo mama oli glad tumas taem oli luk we ol pikinini blong olgeta oli kam bigman, mo oli lanem blong yusum gud tingting blong olgeta, oli waes, mo oli kam ol man blong Jehova we oli glad blong givhan long ol narafala. Long sem fasin, Jehova i glad tumas taem hem i luk we yumi gohed blong kam bigman long tingting, yumi lukaotem advaes, mo yumi mekem ol desisen we oli soemaot se yumi lavem hem.