?Olsem Wanem Blong Givim Advaes?

1. ?Hu i mas givim advaes long narafala, mo from wanem? Yu eksplenem.

?YU YU laekem blong givim advaes? Samfala oli glad blong givim advaes. Sam narafala oli fraet o oli harem se oli no naf blong givim advaes. Nating se i olsem, yumi evriwan i mas givim advaes long ol narafala. ?From wanem? From we Jisas i talem se bambae ol man oli luksave ol disaepol blong hem from we oli lavlavem olgeta. (Jon 13:35) Wan rod blong soemaot lav ya, hemia taem yumi givim advaes long ol brata mo sista. Taem yumi ‘tok stret long narafala blong givim advaes,’ hemia i save mekem yumi ‘kam ol gudfala fren.’—Prov. 27:9.

2. ?Ol elda oli mas naf blong mekem wanem, mo from wanem? (Mo tu, yu luk bokis ya “Givim Advaes Long Miting Blong Medel Wik.”)

² Ol elda oli mas save olsem wanem blong givim ol gudfala advaes long ol narafala. Jehova mo Jisas i putumap ol man ya blong lukaot gud long kongregesen. (1 Pita 5:​2, 3) Oli mekem olsem taem oli givim ol advaes we i kamaot long Baebol, tru long ol tok we oli mekem long kongregesen. Mo tu, oli mas givim advaes long yumi wanwan, mo hemia i minim olgeta ya tu we oli lego kongregesen. ?Olsem wanem ol elda mo yumi evriwan, i save givim gudfala advaes long ol narafala?

3. (1) ?Olsem wanem yumi save lanem blong givim gudfala advaes? (Aesea 9:6; mo tu, yu luk bokis ya “Folem Fasin Blong Jisas Taem Yu Givim Advaes.”) (2) ?Bambae yumi tokbaot wanem long stadi ya?

³ Yumi save lanem olsem wanem blong givim gudfala advaes long ol narafala, taem yumi stadi gud long eksampol blong ol man long Baebol, mo beswan eksampol hemia Jisas. Wan long ol taetel we oli givim long hem, hemia “Nambawan Advaesa.” (Ridim Aesea 9:6.) Long stadi ya, bambae yumi tokbaot samting we yumi save mekem, taem ol narafala oli kam askem advaes long yumi, mo samting we yumi save mekem taem yumi mas givim advaes long ol narafala, nating se oli no askem. Mo tu, bambae yumi tokbaot from wanem i impoten blong givim advaes long stret taem mo long fasin we i stret.

TAEM NARAFALA I ASKEM ADVAES LONG YUMI

4-5. Taem narafala i askem advaes long yu, ?wanem kwestin we yu mas askem yu wan fastaem? Talem wan eksampol.

⁴ ?Wanem tingting blong yu taem narafala i askem advaes long yu? Maet yu glad tumas from we hem i trastem yu, mo yu wantem givhan long hem kwiktaem. Be fastaem i gud yu askem yu wan se: ‘?Mi mi stret man blong givim advaes long saed ya?’ Sipos yu luksave se yu no naf blong givim advaes, beswan rod we yu save givhan long hem, hemia blong sanem hem i go long wan narafala man we i save givim gudfala advaes we i stret long hem.

⁵ Traem tingbaot sipos wan gudfala fren blong yu i kasem wan strong sik. Nao hem i talem long yu se hem i mekem risej mo i faenem sam tritmen we i stret long sik blong hem, mo hem i askem long yu se weswan tritmen nao i gud moa. Maet yu luk se wan long ol tritmen ya we hem i talem i gud moa. Be from we yu yu no wan dokta, beswan rod we yu save givhan long hem, hemia blong halpem hem blong i faenem wan narafala we i gat moa save long sik blong hem, mo i save givhan gud long hem.

6. ?From wanem i gud we yumi wet smol bifo we yumi advaes?

⁶ Nating sipos yumi harem se yumi naf blong givim advaes long wan we i askem, be maet i gud yumi wet smol bifo we yumi givim advaes long hem. ?From wanem? Ol Proveb 15:28 i talem se: “Stret man i tingting dip bifo we i ansa.” ?Be olsem wanem sipos yumi ting se yumi save finis samting we bambae yumi talem? Long taem olsem tu, i gud we yumi tekem taem blong mekem risej, prea, mo tingting dip. Hemia bambae i mekem yumi sua fulwan se advaes we bambae yumi givim, i laenap wetem tingting blong Jehova. Traem luk eksampol blong profet Natan.

7. ?Yumi lanem wanem long eksampol blong profet Natan?

⁷ King Deved i talem long profet Natan se hem i wantem bildim wan tempol blong Jehova. Kwiktaem nomo, Natan i talem long Deved se i stret nomo we hem i mekem olsem. Be fastaem, Natan i sud tekem taem blong faenemaot tingting blong Jehova. ?From wanem? From we Jehova i no wantem Deved blong i bildim tempol. (1 Kron. 17:​1-4) Eksampol ya i soemaot se yumi “no mas hariap blong toktok,” sipos narafala i askem advaes long yumi.—Jem. 1:19.

8. ?From wanem yumi mas tingting gud fastaem bifo we yumi givim advaes?

⁸ Traem tingbaot wan narafala risen from wanem yumi mas tingting gud fastaem, bifo we yumi givim advaes long narafala. Hemia from we sipos yumi givim rong advaes long narafala, nao hem i mekem wan desisen we i kasem trabol from, maet yumi tu yumi save harem se yumi gat fol. Taswe, i impoten we yumi tingting gud bifo we yumi givim advaes.

GIVIM ADVAES NATING SE NARAFALA I NO ASKEM

9. ?Ol elda oli mas sua long wanem bifo we oli givim advaes? (Galesia 6:1)

⁹ Sam samtaem, ol elda oli mas tekem faswan step blong givim advaes long wan brata o sista we i stat blong “folem wan rod we i no stret.” (Ridim Galesia 6:1.) Maet brata o sista ya i stap mekem ol desisen we oli no waes, we i save lidim hem blong mekem wan bigfala sin. Mak blong ol elda i blong givhan long hem blong i gohed blong stap long rod we i lidim hem blong kasem laef. (Jem. 5:​19, 20) Be bifo we oli givim advaes long hem, fastaem oli mas jekem sipos i tru we hem i stat blong folem wan rod we i no stret, o hem i jes mekem wan desisen we i defren long ol narafala. Hemia from we Jehova i letem yumi wanwan i mekem ol desisen folem tingting blong yumi we i save stikim yumi. (Rom 14:​1-4) Be sipos ol elda oli luksave se i tru we hem i stap folem wan rod we i no stret, ?olsem wanem oli save givim advaes long hem?

10-12. ?Wan elda i mas mekem wanem bifo we hem i givim advaes? Talem wan pijatok. (Mo tu, yu luk ol pija.)

¹⁰ I no isi blong ol elda oli givim advaes long narafala taem hem i no askem. ?From wanem? Aposol Pol i talem se maet wan man i save stat blong folem wan rod we i no stret, be hem i no luksave. Taswe, bifo we ol elda oli givim advaes long hem, oli mas mekem sam samting fastaem blong hem i save lesin long advaes blong olgeta.

¹¹ Traem tingbaot pijatok ya: Wan fama i wantem planem wan sid long wan strong graon. Bifo we hem i planem sid ya, fastaem hem i mas brebrekem graon mo i mekem i kam sofsof. Biaen, hem i planem sid ya. Mo afta, hem i wotarem blong mekem se sid ya i gru. Long sem fasin, bifo we wan elda i givim advaes, fastaem hem i mas rerem graon, hemia i min se hem i rerem hat blong man we bambae i kasem advaes. Eksampol, taem elda ya i faenem wan stret taem blong toktok long hem, i gud hem i soemaot se hem i kea long hem mo i talem long hem se i gat wan samting we hem i wantem se tufala i tokbaot. Sipos man we i givim advaes i soemaot se hem i gat lav mo i kaen, bambae i isi blong ol narafala oli folem advaes blong hem.

¹² Taem elda ya i stap storian wetem man ya, hem i save gohed blong mekem hat blong man ya i kam sofsof, taem i talem long hem se yumi evriwan i mekem mastik, mo sam samtaem yumi nidim we narafala i givim advaes long yumi. (Rom 3:23) Elda ya i mas toktok long fasin we i kwaet mo i soemaot respek, taem hem i yusum Baebol blong soemaot long man ya, samting we hem i bin mekem we i soemaot se hem i stap folem wan rod we i no stret. Taem man ya i luksave se hem i mekem wan mastik, elda ya i save “planem sid,” we hemia i minim se hem i eksplenem long hem samting we hem i mas mekem blong stretem mastik blong hem. Biaen, elda ya i save “wotarem” sid ya, hemia taem hem i talem ol gudfala tok long hem from ol gudfala samting we hem i mekem, mo i prea wetem hem.—Jem. 5:15.

13. ?Olsem wanem ol elda oli meksua se wan brata o sista i kasemsave gud long advaes we hem i kasem?

¹³ Samtaem, wan brata o sista i no kasemsave fulwan long advaes we hem i kasem. Taswe, ?ol elda oli mas mekem wanem blong meksua se hem i kasemsave gud long advaes ya? Long kaen fasin, ol elda oli save askem ol gudfala kwestin long hem blong luk sipos hem i kasemsave long advaes we hem i kasem, mo se hem i save samting we hem i mas mekem blong folem advaes ya.—Pri. 12:11.

GIVIM ADVAES LONG STRET TAEM MO LONG FASIN WE I STRET

14. ?I stret we yumi givim advaes taem yumi kros? Yu eksplenem.

¹⁴ Yumi evriwan i sinman, taswe sam samtaem yumi save talem o mekem wan samting we i mekem narafala i harem nogud. (Kol. 3:13) Baebol i talem se samtaem ol narafala oli save mekem yumi kros. (Efes. 4:26) Be yumi no mas givim advaes long narafala taem yumi kros. ?From wanem? From we “taem man i kros, hem i no save mekem samting we i stret long fes blong God.” (Jem. 1:20) Sipos yumi givim advaes taem yumi kros, bambae yumi save mekem problem i kam bigwan moa. ?Be hemia min se yumi neva mas talemaot ol tingting mo filing blong yumi long man we i mekem yumi kros? Si yumi save mekem olsem, be yumi mas wet kasem we tingting blong yumi i kam kwaet. Yumi save lanem samting long eksampol blong Elihu, we i givim gudfala advaes long Job.

15. ?Yumi lanem wanem long eksampol blong Elihu? (Mo tu, yu luk pija.)

¹⁵ Elihu i spenem plante dei blong lesin long Job, taem hem i stap traehad blong pruvum long trifala giaman fren blong hem se samting we oli stap talem i no tru. Elihu i sore tumas long Job. Be hem i kros tu long Job, from we hem i stap tingbaot hem wan tumas mo i stap talem ol samting long saed blong Jehova we oli no tru. Nating se i olsem, Elihu i wet go kasem we i stret taem blong hem blong toktok. Mo taem hem i givim advaes long Job, hem i toktok kaen mo wetem respek. (Job 32:2; 33:​1-7) Eksampol blong Elihu i tijim yumi long wan impoten trutok, hemia se i moa gud we yumi givim advaes taem tingting blong yumi i kwaet, mo yumi toktok long wan fasin we i soemaot respek mo lav.—Pri. 3:​1, 7.

GOHED BLONG GIVIM ADVAES MO LESIN LONG ADVAES

16. ?Yu lanem wanem long Ol Sam 32:8?

¹⁶ Stamba vas blong stadi ya i talem se: ‘Jehova i givim advaes, we ae blong hem i stap oltaem long yumi.’ (Ridim Ol Sam 32:8.) Hemia i soemaot se bambae hem i gohed blong givhan long yumi. Hem i no givim advaes nomo long yumi, be hem i halpem yumi tu blong folem advaes blong hem. !Hemia i wan gudfala eksampol we yumi save folem! Taem yumi givim advaes long narafala, yumi mas gohed tu blong leftemap tingting blong olgeta mo halpem olgeta blong mekem ol waes desisen.

17. Taem ol elda oli givim ol stret advaes we i stanap long Baebol, ?hemia i mekem yumi harem olsem wanem? Yu eksplenem. (Aesea 32:​1, 2)

¹⁷ Naoia i impoten moa we yumi givim gudfala advaes long ol narafala, mo yumi lesin long ol advaes we yumi kasem. (2 Tim. 3:1) Ol elda we oli givim ol stret advaes we i stanap long Baebol, “oli olsem ol wota we oli stap ron long ples we i no gat wota.” (Ridim Aesea 32:​1, 2.) Yumi talem tangkiu long ol fren we oli no fraet blong givim advaes long yumi. Ol toktok blong olgeta i olsem “ol gol apol long ol silva plet.” (Prov. 25:11) I gud we yumi evriwan i gohed blong lanem olsem wanem blong givim advaes long ol narafala, mo blong lesin long ol gudfala advaes we yumi kasem.