Stadi Wetem Mak Ya Blong Serem Save We Yu Lanem Long Narafala

Taem yumi mekem prapa stadi blong yumi, yumi harem gud. Be yumi harem gud moa taem yumi serem ol gudfala poen we yumi lanem, blong leftemap tingting blong narafala. Ol Proveb 11:25 i talem se: “Man we i stap mekem ol narafala oli harem gud, bambae ol narafala oli mekem hem tu i harem gud.”

Taem yumi serem save we yumi lanem wetem narafala, bambae save ya i kam klia moa long tingting blong yumi mo yumi no save fogetem. Sipos yumi tingbaot se save ya bambae i givhan long ol narafala, bambae yumi wantem tumas blong serem long olgeta.—Wok 20:35.

Traem hemia: Long ol wik we i kam, i gud yu tekem janis blong tokbaot save we yu lanem long wan narafala. Maet yu save tokbaot long wan famle blong yu, long wan long kongregesen, long wan man we yu wok wetem, long wan fren long skul, long wan neba, o long wan man we yu mitim hem long wok blong prij. Taem yu stap tokbaot save ya we yu lanem long hem, i gud yu traem talem long prapa toktok blong yu, mo yu talem long wan fasin we i isi mo i klia.

Tingbaot: Yu serem save we yu lanem, blong leftemap tingting blong narafala be i no blong leftemap yu wan.—1 Kor. 8:1.