Kwestin

?I no longtaem, Jehova bambae i putum wanem “tingting” long hat blong ol nesen?

Revelesen 17:​16, 17 i tokbaot stat blong bigfala trabol, i se: “Ol ten hon we yu luk mo wael animol ya, bambae oli no laekem nating prostitut ya, mo bambae oli tekemaot olgeta samting we hem i gat, mo oli livim hem i stap neked nomo. Mo bambae oli kakae ol mit blong hem, mo bambae oli bonem hem fulwan long faea. Oli mekem olsem, from we God i putum tingting ya long hat blong olgeta, blong oli mekem samting we hem i wantem. Yes hemia blong oli gat wan tingting nomo, mo oli givim paoa blong olgeta long wael animol ya blong hem i rul.” Bifo, ol buk blong yumi oli talem se “tingting” ya we Jehova bambae i putum long hat blong ol nesen, hemia blong oli distroem ol giaman skul.

Be save ya i jenis. “Tingting” we Jehova bambae i putum long hat blong ol nesen, hemia blong oli givim “paoa blong olgeta long wael animol ya blong hem i rul.” Blong kasemsave olsem wanem samting ya bambae i kamtru, i gud yumi ansa long ol kwestin ya.

?Profet tok ya i stap tokbaot hu? Hem i stap tokbaot wan “prostitut” we oli singaot hem tu se “Bigfala Babilon,” we hem i pijarem olgeta giaman skul long wol. Mo tu, hem i tokbaot “wan wael animol we kala blong hem i laet red,” we hem i pijarem Yunaeted Nesen. Taem oganaesesen ya i stanap long yia 1919, oli singaotem se Ligofnesen mo wok blong hem i blong putum pis long wol. (Rev. 17:​3-5) Profet tok ya i tokbaot tu “ol ten hon,” we oli pijarem olgeta gavman we oli sapotem wael animol ya.

?Wanem i soemaot se prostitut ya mo wael animol we kala blong hem i laet red, tufala i fren gud tugeta? Prostitut ya i “sidaon antap” long wael animol ya, we i min se hem i stap sapotem hem mo i traem blong kontrolem hem mo talem samting we hem i mas mekem.

?Wanem bambae i hapen long prostitut ya? Wael animol ya wetem ol ten hon ya we oli stap sapotem hem, “bambae oli no laekem nating prostitut ya.” Bambae oli tekemaot evri samting we hem i gat, mo oli soemaot klia olgeta nogud fasin blong hem. Mo biaen, bambae oli spolem gud hem stret olsem we Jehova i bin talemaot finis. (Rev. 17:1; 18:8) Hemia nao en blong olgeta giaman skul. Be bifo we samting ya i hapen, Jehova bambae i pulum ol nesen blong mekem wan samting we i neva hapen bifo long histri blong ol man.

?Jehova bambae i pulum ol nesen blong mekem wanem? Bambae hem i putum “tingting blong hem” long hat blong ol ten hon ya, blong “oli givim paoa mo raet blong olgeta blong rul, i go long wael animol ya [we kala blong hem i laet red,]” hemia Yunaeted Nesen. (Rev. 17:13) ?Hemia i minim wanem? ?I min se ol gavman blong man nomo bambae oli jusum blong givim paoa mo raet blong olgeta i go long wael animol ya? !Nogat! Profet tok ya i soemaot se God nao bambae i pulum olgeta blong mekem olsem. (Prov. 21:1; skelem wetem Aesea 44:28.) Hemia bambae i no hapen sloslo, bambae i hapen kwiktaem nomo. Biaen, wael animol ya bambae i spolem fulwan olgeta giaman skul long wol.

?Afta long taem ya, wanem bambae i hapen? Yumi no mas ting se bambae yumi luk ol ripot long nius we i talem se sloslo ol gavman oli stap sapotem Yunaeted Nesen. Defren olgeta, kwiktaem nomo Jehova bambae i mekem se olgeta gavman oli givim paoa blong olgeta blong rul, i go long wael animol ya. Taem samting ya i hapen, yumi save se i no longtaem bigfala trabol bambae i stat. !Be naoia we yumi stap wet long ol samting ya, “i gud yumi stap wekap mo yumi yusum gud tingting blong yumi,” from we kwiktaem nomo ol samting ya oli save hapen!—1 Tes. 5:6.