Wan Leta Blong Hed Kampani
YUMI stap klosap nomo long niufala wol. Taem yumi stap wet long dei blong Jeova, i impoten tumas we yumi wekapgud. (Sef. 3:8) Profet Daniel i talem se: “God . . . i save soemaot ol samting we i haed mo we i paspas. Mo hem i soemaot . . . finis ol samting ya we bambae i kamtru long [“laswan haf blong ol dei,” NW ].” (Dan. 2:28) !I wan bigfala ona blong laef long en blong taem ya mo blong kasem save long ol tokhaed we Jeova i stap soemaot!
Sloslo, Jeova i talemaot plan blong hem tru long ‘slef we i stret mo i waes,’ se long trabol taem ya blong ol “las dei,” bambae hem i hivimap “wan bigfala kampani” blong ol man blong wosip long olgeta ples long wol. (Mat. 24:45, NW; Rev. 7:9, NW; 2 Tim. 3:1, NW ) Aesea 2:2, 3 (NW ) i tokbaot se samting ya we i stap hapen long ful wol, bambae i kamaot long “laswan haf blong ol dei.” Evri yia, wok ya blong hivimap ol man i stap gohed nomo, nating se ol trabol mo raf fasin oli fulap long wol ya.
Stat long Jenuware kasem Disemba 2004, plante samting i mekem yumi luksave moa se yumi mas obei long ol tok ya blong Jisas, se: “Yufala i mas lukaot gud . . . Yufala i mas rere.” (Mat. 24:42, 44) Tru tumas, ol samting we oli stap hapen long wol oli gat bigfala mining long tingting blong ol Kristin, from we oli luksave ol “saen blong taem ya,” mo samting ya i pusum olgeta blong wok. (Mat. 16:1-3) Olsem Tok blong Jeova i talem, bambae hem i gohed blong stap wetem ol man blong hem we hem i hivimap blong oli mekem wok blong hem, nomata wanem kaen fasin agens oli fesem.
Nating we sam man oli traehad blong blokem no stopem wok blong talemaot Kingdom, be ol brata blong yumi oli gohed blong talemaot trutok mo joen wanples. (Wok 5:19, 20; Hib. 10:24, 25) Long Rasia, long Jun 2004, wan kot blong apil long Moscow i sapotem desisen we wan narafala kot i bin mekem blong putum tabu long wok blong ol Witnes blong Jeova mo blong tekemaot raet we oli gat folem loa blong wok olsem wan skul long taon ya. Be samting ya i no mekem ol brata oli fraet, oli save wanem samting God i askem olgeta blong mekem, mo oli obei long hem olsem Bigfala Rula blong olgeta, bitim we oli obei long ol man. (Wok 5:29) Yumi trastem se bambae Jeova i lidim ol man blong wok blong hem, nating se ol enemi oli yusum loa blong agensem olgeta.
Long ol yia we oli jes pas, long Ripablik blong Jojia, ol brata oli fesem ol trabol we oli lusum olting blong olgeta, ol grup blong man oli kilim nogud olgeta, mo ol man oli bonem ol buk blong olgeta stret long fes blong olgeta. Be long olgeta samting we ol man oli yusum blong mekem faet agens long olgeta, i no gat wan we i save win. (Aes. 54:17) Long sevis yia blong 2004, gavman blong Jojia i luksave ol Witnes blong Jeova bakegen se oli wan skul. Ol man oli no moa blokem olgeta taem oli mekem ol asembli, mo naoia oli letem ol buk mo magasin oli kam insaed long kantri. Ripot i soemaot se i gat niufala namba blong ol pablisa mo blong ol man we oli kam long Memoriol.
Long Amenia, Eritrea, Ripablik blong Korea, Ruanda, mo Tukmenistan, plante brata oli go long kalabus from bilif blong olgeta. Nating se ol man oli mekem i nogud long olgeta, be ol brata ya oli save risen we Baebol i talem long saed blong ol trabol we oli kasem, mo hemia i givhan long olgeta blong oli holemstrong long bilif mo lukluk i go long Jeova blong i sevem olgeta.—1 Pita 1:6; 2 Pita 2:9.
Taem yufala i lukluk Ripot Blong Sevis Yia 2004 long Wajtaoa blong Februari 1, 2005, bambae yufala i glad long gudfala fasin blong Jeova. (Sam 31:19; 65:11) Mifala i hop se ripot ya bambae i leftemap tingting blong yufala, blong yufala i gohed blong wokbaot long fasin we i mekem God i glad.—1 Tes. 4:1.
Yumi gohed blong mekem ol bigfala traehad blong kasem ol defdefren man wetem trutok. Olsem nao, oli wokem ol vidio kaset, ol DVD, mo blong halpem ol man we oli blaen mo we sora blong olgeta i fas long saed blong spirit, oli wokem ol buk long lanwis we ol nambut oli toktok long hem, mo ol buk we i gat ol spesel raeting we ol blaen man oli save filim wetem fingga blong olgeta. Plante pablisa we oli talemaot Kingdom oli lanem ol narafala lanwis blong ol man blong ol defren kantri we oli laef long teritori blong kongregesen blong olgeta.
Antap moa, plante handred smosmol grup oli stat long ol ples we i hadwok tumas blong yumi kasem olgeta. Wan branj ofis i lukaot long bitim 300 smosmol grup olsem, mo i gat bitim 7,000 pablisa oli stap long ol grup ya. !Hemia i soemaot se bambae i gat plante niufala kongregesen long fiuja! Antap moa, i gat 16,760,607 man we oli kam long Memoriol long sevis yia ya, mo bitim 10 milian long olgeta oli no Witnes yet. Hemia i soemaot klia se i gat plante kakae long garen we oli rere blong yumi pikimap.
Yumi talem tangkiu long Jeova from ol rij blesing blong hem mo from we hem i lavem yumi mo i keagud long yumi evri dei. (Prov. 10:22; Mal. 3:10; 1 Pita 5:7) Taem yumi joengud mo yumi stap gohed long “laswan haf blong ol dei” ya, yumi trastem Jeova mo yumi bilif long hem. Nomata wanem problem we yumi fesem, vas blong yia 2005 i mas leftemap tingting blong yumi. Hem i talem se: ‘Jeova i stap givhan long mi.’ (Sam 121:2) Plis yufala i mas save se mifala i lavem yufala mo mifala i stap prea from yufala.
Ol brata blong yufala,
Hed Kampani Blong Ol Witnes Blong Jeova