Leta Blong Branj Ofis

Long Olgeta Gudfala Pablisa Blong Kingdom:

“God nomo i stap mekem kakae ya i gru gud.” (1 Kor. 3⁠:⁠6) !Yumi glad tumas blong luk se wok i gru bigwan long garen blong yumi! !Long sevis yia blong 2003, ol pablisa long Niukaledoni oli statem bitim 250 niufala Baebol stadi! Hemia i gud tumas. Mo namba blong ol man we oli kam long Memoriol blong 2003 i bigwan i bitim ol narafala yia. Hemia 7,069 blong trifala kantri evriwan. Niukaledoni i kasem wan niufala namba blong 5,083 mo Vanuatu i kasem wan niufala namba blong 1,679.

Jeova i blesem wok blong yumi blong wokem ol niufala Haos Kingdom. Long yia we i jes pas, yumi dediketem no bildim ol niufala Haos Kingdom long Vanuatu mo Niukaledoni, mo Haos Kingdom blong Walis tu oli mekem i kam bigwan moa. Mifala i talem bigfala tangkiu long olgeta we oli bin mekem ol nambawan wok ya. I gud yumi no fogetem blong lukaotgud long ol naesfala Haos Kingdom ya.

Wan niufala plan i stanap long saed blong wok blong prentem mo sanemaot ol buk raon long wol. Plan ya hem i blong givim wok ya blong prentem buk i go long plante defdefren Branj Ofis raon long wol. Hemia i min se ol buk blong yumi, we bifo Branj ofis blong Brooklyn i prentem, naoia oli prentem long Japan. Ol magasin blong yumi long lanwis Franis, Inglis, Bislama mo Walis, oli stap prentem long Ostrelia, wetem ol narafala smosmol buk long ol lanwis ya. Mifala i tekem janis ya tu blong talem tangkiu long yufala from presen mane we yufala i givim wetem gladhat. Hemia i mekem se neva yumi sot long ol kakae ya we yumi stap nidim moa naoia.

Taem yumi statem sevis yia blong 2004, mifala i joen wetem yufala blong prea se bambae Jeova i gohed blong ‘mekem ol kakae ya oli gru gud.’

Ol brata blong yufala,

Branj Ofis Blong Niukaledoni