Leta Blong Branj Ofis
Ol Gudfala Pablisa Blong Kingdom:
Long stat blong sevis yia, plante pablisa oli joen long wok blong fultaem paenia. Long manis Mei, yumi kasem niufala namba blong 66 fultaem paenia long Niukaledoni mo 27 long Vanuatu. Taswe i gat plan blong mekem tu kos blong Paenia Skul long tufala kantri ya, wetem niufala buk blong kos ya we oli jenisim sam samting long hem.
Plante bigbigfala wok oli stap gohed blong talemaot gud nius long teritori blong yumi. Taswe i gat 5,271 man oli kam long Memoriol long Niukaledoni, 1,943 long Vanuatu, mo 366 long Walis mo Futuna. Namba blong ol man we oli kam long Memoriol i tri taem antap long namba blong ol pablisa. Long Niukaledoni, ol pablisa oli mekem samwe long 2,000 Baebol stadi evri manis, long Walis mo Futuna, oli mekem bitim 110, mo long Vanuatu, klosap 700. Plante man we oli intres oli raet i kam long branj ofis, blong askem Baebol stadi.
Long Normandie, Niukaledoni, oli stap mekem bigfala wok blong riperem Haos Asembli. Oli fiksimap ruf mo jenisim evri rafta long vranda. I gat plante moa wok blong mekem yet. Mo tu, plante kongregesen oli stap mekem bes blong olgeta blong fiksimap haos wosip blong olgeta mo mekem i stap gud. Long yia ya, i gat plante projek long Niukaledoni (Koumac, Voh, Pouembout, Montravel) mo long Walis, blong riperem ol Haos Kingdom. Taswe, i nidim plante moa volontia. Long Vanuatu tu, i gat sam Haos Kingdom we ol brata oli mas fiksimap yet, olsem Port-Vila mo Luganville. Mifala i talem bigfala tangkiu from help blong yufala wetem wok mo mane blong yufala. Mo mifala i wantem talem tangkiu tu long olgeta we oli bin yusum taem mo gudhan blong olgeta long ol yia we oli pas, blong wok long haos asembli blong yumi, mo long ol defren Haos Kingdom we oli stap long ol teritori blong branj ofis blong yumi.
Long Wallkill, New York, Yunaeted Stet, plante man oli kam luk niufala ples blong printim ol buk. Hemia faswan taem blong wan olfala sista i kam lukluk, nao biaen hem i talem se: “!Visit ya i rili mekem mi mi sapraes mo pulum intres blong mi! Mi gat plante samting blong talem long ol brata sista long ples blong mi. Sipos Jeova i wantem, bambae mi kambak evri yia.”
!I gud tumas blong luk ol gudfala wok ya we oli mekem wok blong Kingdom i gohed moa! Mo tu, mifala i talem bigfala tangkiu from gudfala fasin blong yufala blong givim presen mane blong sapotem wok ya. (Prov. 3:9, 10) Bambae Jeova i gohed blong blesem traehad blong yumi blong wok tugeta blong “leftemap nem blong hem i go antap oltaem.”—Efes. 1:12.
Ol brata blong yufala,
Branj Ofis Blong Niukaledoni