Leta Blong Branj Ofis

Ol Gudfala Pablisa Blong Kingdom:

!Yumi glad tumas blong luk se long 2007, wok blong prij i kam antap bigwan long trifala kantri ya we i stap aninit long branj ofis blong Niukaledoni! Yumi kasem niufala namba blong ol fultaem paenia long trifala kantri ya: Long manis Februari i gat 35 fultaem paenia long Vanuatu, mo long manis Eprel yumi kasem wan niufala namba blong 10 fultaem paenia long Walis mo 91 long Niukaledoni. !Jeova bambae i blesem olgeta we oli mekem wok blong hem wetem fulhat blong olgeta!

Long Niukaledoni, Walis mo Vanuatu, yumi seremaot 96,667 traket blong Kingdom Nius No. 37, “!Klosap Nao Ol Giaman Skul Oli Lus!” I nambawan tumas blong luk bigfala wok we ol pablisa oli mekem raon long wol blong givim witnes long plante milian man. Long wan kantri, taem wan sista we i no moa prij longtaem i ridim traket ya we oli givim long hem, hem i no save slip long naet. Ale long Sande, hem i go long miting mo i askem wan blong stadi Baebol wetem hem.

Wok blong seremaot traket ya i blong halpem olgeta we oli wantem save trutok blong oli lanem samting we Baebol i rili tijim. (Mat. 28:19, 20) Taswe taem yu prij, yu mas tingbaot blong raetemdaon nem blong olgeta we oli soem intres mo gobak bakegen wetem tingting ya blong statem Baebol stadi. Long niufala sevis yia ya we i jes stat, yumi save traem kasem sam narafala mak bakegen: I gud yumi sapotem ol niufala paenia, we sam long olgeta oli yang mo sam oli no stap long trutok long plante yia finis. Mo tu i gud ol papa mama oli mekem stadi long ol pikinini evri wik. Mifala i glad blong wok wetem yufala olsem wan kampani nomo we yumi joengud tugeta. Mifala i sanem Kristin lav blong mifala long yufala.

Ol brata blong yufala,

Branj ofis blong Niukaledoni