OL YANGFALA OLI ASKEM
Afta Long Baptaes, ?Mi Mas Mekem Wanem?—Pat 2: Folem Stret Fasin Oltaem
Baebol i talem se “Jehova bambae i no holembak eni gudfala samting long olgeta we oli stap wokbaot folem stret fasin oltaem.” (Ol Sam 84:11) ?I minim wanem blong “wokbaot folem stret fasin oltaem”? Hemia i min se yu soemaot long laef blong yu se yu stap holem promes we yu mekem, taem yu givim laef blong yu long Jehova. (Prija 5:4, 5) Afta long baptaes, ?olsem wanem yu save wokbaot folem stret fasin oltaem?
Long atikol ya
Stanap strong taem yu kasem problem
Stamba vas: “Yumi mas gotru long plante trabol, blong yumi save go insaed long Kingdom blong God.”—Ol Wok 14:22.
?I minim wanem? Yumi save se olgeta Kristin oli stap fesem ol problem long laef blong olgeta. Sam problem, olsem taem man i jikim yu o i agensem yu, oli kamaot from we yu yu wan Kristin. Sam narafala problem, olsem sot long mane o sik, oli kasem olgeta man.
Samting we yu save ekspektem: Wanwan taem, bambae i gat ol jenis long laef blong yu, mo samtaem yu no laekem ol jenis ya. Baebol i talem se ol trabol i save kasem yumi evriwan, nating se yumi Kristin o nogat.—Prija 9:11.
Samting we yu save mekem: From we yu save se bambae yu fesem trabol, i gud yu rere naoia. Ol trabol ya oli givim janis long yu blong mekem bilif i strong, mo dipen moa long Jehova. (Jemes 1:2, 3) Sloslo bambae yu gat sem filing olsem aposol Pol, taem hem i talem se: “Mi mi gat paoa blong fesem olgeta samting from God ya we i givim paoa long mi.”—Filipae 4:13.
TRU STORI. “Smoltaem afta we mi mi baptaes, ol brata blong mi oli lego Kristin bilif blong olgeta, mama mo papa blong mi tufala i sik, mo biaen mi tu mi sik. I isi blong mi mi lego evri samting mo fogetem promes we mi mekem long God bifo long baptaes, se bambae mi putum wosip blong hem i stap long fasples long laef blong mi. Be, blong talem stret, promes ya nao i halpem mi blong winim ol trabol we mi fesem.”—Karen.
Advaes: Traem save gud Josef. Yu save ridim stori blong laef blong hem long Jenesis japta 37 mo japta 39 kasem 41. Traem tingbaot: ?Wanem hadtaem we Josef i sek long hem, mo hem i mekem wanem? ?Olsem wanem Jehova i givhan long Josef?
Samting blong halpem yu moa
Ridim:
Daonlodem:
Blokem ol nogud fasin we oli save pulum yu
Stamba vas: “Ol samting blong traem man i save kam strong long hem taem hem i wantem tumas wan samting, nao samting ya i pulum hem, mo i trikim hem.”—Jemes 1:14.
?I minim wanem? Sipos yumi no kontrolem ol samting we yumi wantem, oli save lidim yumi blong mekem samting we i rong.
Samting we yu save ekspektem: Afta long baptaes, “ol samting we bodi i wantem” bambae oli pulum yu yet. (2 Pita 2:18) Mo tu, bifo we yu mared, maet yu wantem mekem doti fasin long saed blong seks.
Samting we yu save mekem: Mekem tingting blong yu i strong bifo we wan nogud fasin i pulum yu. Olsem nao, bambae yu no letem ol samting we bodi i wantem i bos long yu. Tingbaot tok blong Jisas se: “I no gat man we i save kam slef blong tu masta wantaem.” (Matiu 6:24) I gud yu jusum Jehova olsem masta blong yu. Nomata se wan nogud fasin i pulum yu strong, be yu save jus blong no folem filing blong yu.—Galesia 5:16.
Advaes: Luksave ol gudfala fasin mo ol slak fasin blong yu. Jusum ol fren we oli pulum yu blong soemaot ol gudfala fasin blong yu. I gud yu no joen wetem ol man o go long ol ples o stap long ol situesen, we oli pulum yu blong mekem i no stret.—Ol Sam 26:4, 5.
Samting blong halpem yu moa
Ridim:
“?Olsem Wanem Mi Save Blokem Ol Traem?”
“?Olsem Wanem Mi Save Stop Blong Tingbaot Seks?”
“How to Resist Peer Pressure”
Holem strong tingting blong wok had
Stamba vas: “Gohed blong wok had . . . gogo kasem en. Olsem nao, bambae yufala i no kam les.”—Hibru 6:11, 12.
?I minim wanem? Man we i no putum tingting i stap strong long wok blong hem, i save slodaon mo kam les.
Samting we yu save ekspektem: Afta long baptaes, ating yu glad tumas mo i olsem we faea i laet long yu. Yu harem se yu lavem Jehova tumas. Be sloslo, yu luk se i had blong gohed blong obei long evri samting we Jehova i talem, nao tingting blong yu i save kam slak mo yu no moa glad tumas.—Galesia 5:7.
Samting we yu save mekem: Gohed blong mekem ol samting we i stret, nating se samtaem yu harem se yu no wantem. (1 Korin 9:27) Long semtaem, traehad blong save moa Papa blong yu long heven mo prea long hem oltaem blong kam klosap moa long hem. Mo tu, traem fren gud wetem olgeta we oli lavem Jehova mo wok blong hem.
Advaes: Yu no mas fogetem se Jehova i lavem yu tumas, mo hem i rere oltaem blong halpem yu. Sipos yu kam slak blong smoltaem, yu no mas ting se Jehova i kros long yu. Baebol i talem se: “Hem i stap givim paoa long man we i taed mo i mekem se olgeta we oli no gat paoa, oli kam strong we oli strong.” (Aesea 40:29) Biaen, bambae hem i blesem yu from we yu traehad blong gat strong tingting bakegen.
Samting blong halpem yu moa
Ridim:
“Yangfala—Wok Had Blong God i Sevem Yu”
“How Can I Make Worship of God Enjoyable?”
Wajem:
Stamba poen: !Sipos yu wokbaot folem stret fasin oltaem, bambae yu mekem Jehova i glad! (Ol Proveb 27:11) Bambae hem i glad se yu jus blong stap long saed blong hem, mo bambae hem i givim evri samting we yu nidim blong agensem ol atak blong Setan.