?Kruked Fasin Blong Ol Gavman Bambae i Finis Samtaem?

Kruked fasin blong sam haeman long gavman i wan problem long fulwol, mo i stap spolem fulap man.a Long taem blong COVID-19 pandemik, oli faenemaot se ol haeman long plante kantri oli stap kam rij, from mane we oli sud yusum blong halpem ol man blong winim pandemik. Kruked fasin ya i mekem se plante man oli no kasem kea we oli nidim long saed blong helt, mo fulap man oli safa mo oli ded from.

Trabol we i kamaot from kruked fasin blong gavman i stap kasem plante ples long wol. David Cameron we i praeminista blong Briten bifo, i talem se: “Kruked fasin i olsem wan bigfala net blong spaeda we olgeta kantri oli fas long hem.”

Be yumi save sua se i no longtaem kruked fasin blong olgeta gavman bambae i finis. ?From wanem yumi save sua? Makem ol tok blong Baebol long saed blong samting we God bambae i mekem.

?Olsem wanem yumi save se God bambae i finisim kruked fasin?

Long Baebol, God i talem se: “Mi, Jehova, mi laekem jastis, mi no laekem nating fasin blong stil mo fasin we i no stret.”b (Aesea 61:8) Taem ol man oli safa from kruked fasin blong narafala, God i save. (Ol Proveb 14:31) Hem i promes se: “From we ol man oli spolem olgeta we oli harem nogud, . . . bambae mi girap blong tekem aksen.”—Ol Sam 12:5.

?God bambae i mekem wanem? Bambae hem i no traem fiksimap ol gavman blong man, be gavman blong hem long heven, hemia “Kingdom blong God,” bambae i tekem ples blong olgeta. (Mak 1:14, 15; Matiu 6:10) Baebol i talem se: “God blong heven bambae i stanemap wan kingdom we . . . i smasem mo i finisim olgeta kingdom ya, mo hem nomo bambae i stanap olwe.” (Daniel 2:44) Long rod ya, God bambae i finisim kruked fasin we yumi luk tede.

Wan gavman we i no mekem kruked fasin

?Olsem wanem yumi save se Kingdom blong God bambae i no save kam nogud? Tingbaot hemia:

1. 1. Paoa. Kingdom ya i kasem paoa blong hem from God Ya We i Gat Olgeta Paoa.—Revelesen 11:15.

   ?From wanem samting ya i impoten? Ol gavman blong man oli dipen long mane we oli kasem long ol sitisen blong kantri, blong oli save mekem wok blong olgeta. Hemia i givim janis long sam lida blong oli tekem mane aninit long tebol, stilim ol man, o kontrolem ol samting blong oli winim mane from. Be oltaem Kingdom blong God bambae i naf blong givim ol samting we ol man oli nidim, from we God Ya We i Gat Olgeta Paoa i sapotem Kingdom ya.—Ol Sam 145:16.

2. 2. Rula. God i putumap Jisas Kraes olsem Rula blong Kingdom ya.—Daniel 7:13, 14.

   ?From wanem samting ya i impoten? Nating se sam man oli rul gud, be narafala i save gat paoa long olgeta nao oli mekem samting we i rong. (Prija 7:20) Jisas i defren, hem i blokem olgeta we oli wantem pem hem blong mekem kruked fasin. (Matiu 4:8-11) Mo tu, oltaem lav we hem i gat long ol man i pulum hem, mo hem i wantem tumas blong mekem i gud long olgeta.—Ol Sam 72:12-14.

3. 3. Ol loa. Ol loa blong Kingdom blong God oli stret olgeta, mo taem man i obei long olgeta, hem i harem gud.—Ol Sam 19:7, 8.

   ?From wanem samting ya i impoten? Plante taem i had blong kasem save long ol loa blong man, oli strong tumas, o ol man we oli brekem loa oli no kasem panis. Hemia i givim janis long ol man blong oli mekem kruked fasin. Be ol loa blong God oli isi blong folem mo oli givhan long ol man. (Aesea 48:17, 18) Mo tu, ol loa ya oli no agensem ol aksen nomo, be ol tingting tu we oli pusum man blong mekem aksen ya. (Matiu 22:37, 39) I tru, God i save lukluk wanem i stap long hat blong ol man wanwan, mo hem i sore long man taem i stret blong mekem olsem.—Jeremaea 17:10.

Mifala i invaetem yu blong lanem moa long promes blong Baebol, long saed blong wan fiuja we kruked fasin blong ol gavman bambae i finis.

• Ridim atikol ya long Inglis o Franis “God’s Kingdom—A Government With No Corruption,” blong kasem save long tri moa risen from wanem Kingdom blong God i no save kam nogud.

• Wajem video ya ?Wanem Ya Kingdom Blong God? blong lanem moa long saed blong gavman blong God mo samting we bambae hem i mekem long wol.

• Traem fri Baebol kos blong mifala blong luk olsem wanem ol promes blong Baebol oli save givhan long yu.