Jos Mo Wo Long Yukren ?Baebol i Talem Wanem?

Ridim ol ripot ya long saed blong ol lida blong jos mo wo long Yukren:

• “Lida blong Otodoks Jos long Rasia, Patriarch Kirill, i no talem wan tok nating agensem faet we Rasia i mekem. . . . Jos blong hem i talemaot ol giaman stori long saed blong Yukren, mo Putin i yusum olgeta olsem eskius blong mekem wo agens long olgeta.”—EUobserver, 7 Maj 2022.

• “Patriarch Kirill . . . i talem strong se i stret nomo we kantri blong hem i faet agensem Yukren. Hem i talem se faet ya i wan haf blong faet we Rasia i mekem agensem sin.”—AP News, 8 Maj 2022.

• “Long Mande, lida blong Otodoks Jos long Yukren, Metropolitan Epiphanius 1 blong Kyiv, i blesem ol man blong hem blong oli ‘faet agensem ol man Rasia we oli kam long Yukren’ . . . [Hem] i talem tu se i no wan sin blong kilim ol soldia blong Rasia i ded.”—Jerusalem Post, 16 Maj 2022.

• “Mifala [Ukrainian Council of Churches and Religious Organizations (UCCRO)] i sapotem Ami blong Yukren mo ol narafala we oli halpem ami ya. Mifala i blesem olgeta taem oli faet blong protektem Yukren long ol enemi blong hem, mo mifala i prea from olgeta.”—Ol tok blong UCCRO,a 24 Februari 2022.

?Wanem tingting blong yu? ?I stret blong ol jos we oli talem se oli stap folem Jisas Kraes, oli pulum ol memba blong olgeta blong oli faet? ?Baebol i talem wanem?

Jos i sapotem wo long ol yia we oli pas

Ol stori long histri oli soemaot se plante taem ol jos oli agri long wo, oli talem se i stret, mo oli pulum ol man blong oli faet. Long semtaem, oli giaman se oli stap traehad blong mekem pis. Long ol yia ya, ol Witnes blong Jehova oli stap halpem ol man blong luksave se jos i gat tu fes. Hemia sam tok we i kamaot long ol buk blong ol Witnes:

• “The Crusades—A ‘Tragic Illusion’” i soemaot olsem wanem Katolik Jos i kilim fulap man i ded long nem blong God mo Kraes.

• “Katolik Jyos Long Afrika” i tokbaot wan eksampol we i soemaot se jos i no naf blong blokem ol faet bitwin long ol laen, mo tu, ol faet blong kilimaot wan ful laen.

• Ol atikol olsem “?Ol Jos Oli Stamba Blong Ol Rao Mo Faet?,” “Religion’s Role in Man’s Wars,” mo “Religion Takes Sides” oli eksplenem olsem wanem ol lida blong Katolik, Otodoks, mo Protestan Jos, oli sapotem tugeta saed blong plante wo.

?I stret blong ol jos we oli talem se oli Kristin oli sapotem wo?

Samting we Jisas i tijim: “Yu mas lavem neba blong yu olsem we yu lavem yu wan.” (Matiu 22:39) “Yufala i mas gohed blong lavem ol enemi blong yufala.”—Matiu 5:44-47.

Samting we Jisas i talem: “Kingdom blong mi i no blong wol ya. Sipos Kingdom blong mi i blong wol ya, bambae ol man blong mi oli faet finis blong blokem ol man ya.” (Jon 18:36) “Man we i yusum naef blong faet, hem bambae i ded long naef blong faet.”—Matiu 26:47-52.

Tingbaot: Sipos i rong blong ol Kristin oli faet blong protektem Jisas, ?i stret blong oli faet from wan narafala risen? Ridim atikol ya “Is War Compatible With Christianity?” blong luk olsem wanem ol Kristin bifo oli folem eksampol mo tijing blong Jisas.

?Wanem bambae i hapen long ol jos we oli joen long wo?

Baebol i talem se God i no akseptem ol jos we oli talem se oli wok long nem blong Kraes, be oli no folem ol tijing blong hem.—Matiu 7:21-23; Taetas 1:16.

• Buk blong Revelesen i soemaot se God i putum fol long ol jos from ded “blong olgeta man we ol man oli kilim olgeta i ded long wol.” (Revelesen 18:21, 24) Blong kasem save from wanem i olsem, ridim atikol ya “?Hu Ya Bigfala Babilon?”

• Jisas i soemaot se olgeta jos we God i no akseptem olgeta bambae oli lus from ol rabis wok blong olgeta, olsem we ol man “oli katemdaon [ol tri we oli roten mo oli karem rabis frut] mo oli sakem i go long faea.” (Matiu 7:15-20) Blong kasem save olsem wanem samting ya bambae i hapen, ridim “!Klosap Nao Ol Giaman Skul Oli Lus!”

Ol foto stat long lefsaed i go long raetsaed: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images