Ol Kristin Mo Wo ?Baebol i Talem Wanem?

Wo long Yukren i soemaot klia se plante Kristin lida blong ol jos oli sapotem ol faet o wo. Makem toktok blong sam jos lida we oli sapotem faet ya we i stap bitwin Yukren mo Rasia:

• “Yumi wantem talem tangkiu mo soem ona long ol soldia blong yumi we oli stap difendem Yukren . . . Hat mo sapot blong mifala i stap wetem yufala oltaem, mo mifala i stap prea strong from yufala.”—Toktok blong Metropolitan Epiphanius 1 blong Kyiv long wan ripot blong The Jerusalem Post, 16 Maj 2022.

• “Bigfala lida blong Otodoks Jos long Rasia i mekem wan spesel jos sevis blong ami blong Rasia long wan Sande, mo i enkarejem olgeta blong oli difendem kantri blong olgeta. Hem i se ‘Rasia nomo i naf blong mekem olsem’ nating se Moscow i stap gohed yet blong mekem faet long Yukren.”—Reuters, 3 Eprel 2022.

?Ol Kristin oli mas joen long wo? ?Baebol i talem wanem?

Samting we Baebol i rili talem

Baebol i soemaot se olgeta we oli rili folem Jisas Kraes, oli no joen long ol wo.

• “Yu putumbak naef blong faet blong yu long ples blong hem. Man we i yusum naef blong faet, hem bambae i ded long naef blong faet.”—Matiu 26:52.

  Sipos wan man i agri blong joen long wo, ?hem i rili stap obei long ol tok blong Jisas?

• “Mi mi givim wan niufala komanmen long yufala, se yufala i mas lavlavem yufala. Olsem we mi lavem yufala, ale long sem fasin, yufala tu i mas lavlavem yufala. Sipos yufala i lavlavem yufala, bambae olgeta man oli save se yufala i disaepol blong mi.”—Jon 13:34, 35.

  Sipos wan man i stap sapotem ol wo, ?hem i rili stap soemaot lav ya we Jisas i talem se bambae i makemaot ol disaepol blong hem?

Blong save moa, ridim atikol ya long Inglis “Is War Compatible With Christianity?”

Ol Kristin mo wo tede

?I stret blong ol Kristin oli no joen long ol wo tede? Yes. Baebol i talemaot se long “ol las dei,” we hemia i minim taem blong yumi tede, bambae i gat ol man blong olgeta nesen we oli folem ol tijing blong Jisas mo bambae oli “no moa lanem blong faet.”—Aesea 2:2, 4, futnot.

• Blong faenemaot moa, ridim Wajtaoa atikol seri ya long Inglis we taetel blong hem se “How Does God View War?”

I no longtaem Jehova,a “God ya blong pis,” bambae i yusum gavman blong hem long heven blong sevem ol man we oli stap safa “long han blong ol man we oli mekem i strong tumas long olgeta, mo long raf fasin.”—Filipae 4:9; Ol Sam 72:14.

• Blong luk olsem wanem samting ya bambae i hapen, wajem video ya ?Wanem Ya Kingdom Blong God?