Oli Sutum Man i Ded Long Ol Skul ?Baebol i Talem Wanem?

Long 24 Mei 2022, wan bigfala trabol we i had blong tokbaot, i hapen long smol taon ya Uvalde, long Texas, Yunaeted Stet. Niuspepa ya The New York Times, i talem se “wan man i sutum i ded 19 pikinini mo 2 tija . . . long Robb Praemari Skul.”

Sore tumas, ol rabis samting olsem oli stap hapen oltaem. USA Today i talem se long Yunaeted Stet nomo, “las yia i gat 249 man we narafala i sutum olgeta long ol skul, mo stat long 1970, i no gat wan yia we namba i hae moa.”

?From wanem ol rabis samting olsem i hapen? ?Yumi save mekem wanem taem ol trabol olsem i hapen? ?I gat hop se raf fasin ya bambae i finis? Baebol i ansarem ol kwestin ya.

?From wanem i gat moa vaelens long wol?

• Baebol i talem se yumi stap laef long “ol las dei,” mo long taem ya ol man bambae oli “no gat lav” mo oli “wael olgeta,” i min se bambae oli mekem ol raf fasin blong spolem ol narafala. Ol man ya bambae oli “gohed blong mekem i mowas.” (2 Timoti 3:1-5, 13) Blong save moa, ridim atikol ya “?Baebol i Talemaot Finis Tingting Mo Fasin Blong Ol Man Tede?”

Plante man oli stap askem se, ‘?From wanem God i no stopem ol vaelens olsem long ol skul?’ Blong faenem ansa we Baebol i givim, ridim atikol ya “?From Wanem Trabol i Kasem Ol Gudfala Man?”

?Yumi save mekem wanem taem ol trabol olsem i hapen?

• “Olgeta tok we oli raetem bifo, oli blong tijim yumi . . . oli mekem yumi harem gud mo oli mekem se yumi save stanap strong longtaem.”—Rom 15:4.

Ol advaes blong Baebol oli save halpem yu blong stanap strong long wol ya we i fulap long vaelens. Blong save moa, ridim Wekap! ya long Inglis we taetel blong hem “Will Violence Ever End?”

Blong kasem advaes olsem wanem ol papa mo mama oli save halpem ol pikinini blong olgeta taem oli harem o luk ol nius olsem, ridim atikol ya long Inglis “Disturbing News Reports and Your Children.”

?Vaelens bambae i finis samtaem?

• “Bambae hem i tekemaot olgeta long han blong ol man we oli mekem i strong tumas long olgeta, mo long raf fasin.”—Ol Sam 72:14.

• “Bambae oli hamarem ol naef blong faet blong olgeta i kam aean blong plao, mo ol spia blong olgeta i kam ol huknaef blong katemaot ol branj. Bambae ol nesen oli no leftemap naef blong faet agensem narafala nesen, mo bambae oli no moa lanem blong faet.”—Maeka 4:3.

God bambae i mekem samting we ol man oli no naf blong mekem. Kingdom blong hem long heven bambae i distroem ol tul blong faet mo finisim vaelens fulwan. Blong lanem moa long saed blong samting we Kingdom blong God bambae i mekem, ridim atikol ya “Taem Kingdom Blong God i Rul, Ol Man Bambae Oli ‘Gat Gudfala Laef.’”