!LUKAOT GUD OLTAEM!

Fasin Blong Sutum Man i Ded i Kamaot Long Fulwol ?Baebol i Talem Wanem?

APDEIT: 27 Eprel 2023

Fasin ya blong sutum man long masket i stap kam antap moa long plante ples long wol. Hemia sam eksampol:

Long Yunaeted Stet, fasin ya we man i sutum plante man i ded wantaem, i kam antap bitim ol narafala kantri. Trabol ya i stap hapen wan taem evri wik.”—21 Eprel 2023, The Guardian.
“Long Saot Afrika, wan man i sutum ten man i ded long wan haos. Ol ten man ya oli stap long sem famle nomo, i gat seven we oli woman mo wan boe we i gat 13 yia.”—21 Eprel 2023, AP Nius.
“Long Hamburg long Jemani, wan man i sutum sikis man i ded long wan haos wosip blong ol Witnes blong Jehova, mo biaen, man ya i sutum hem wan i ded.”—10 Maj 2023, Reuters.

Baebol i leftemap tingting blong olgeta we oli safa from ol rabis fasin olsem. Blong luk wan tru eksampol, wajem video ya DeJanerio Brown: Hat Blong Mi i Brok Be Mi No Lusum Hop.

Baebol i save halpem yumi tu blong kasem save from wanem ol rabis fasin olsem oli hapen. Blong save moa long topik ya, wajem video ya ?From Wanem God i Letem Ol Man Oli Safa?

Long Julae 2022, man i sutum narafala i ded long plante ples long wol:

“Wan man i kilim i ded wan man blong politik [Shinzo Abe, we bifo hem i praeminista] long Japan. Ol manples oli harem nogud, mo ol man raon long wol oli sek, from se i no gat plante raf fasin long Japan, mo ol loa long saed blong masket oli strong.”—10 Julae 2022, The Japan Times.
“Ol man Denmak oli harem nogud from wan man i sutum i ded tri man long wan bigfala stoa, long Copenhagen.”—4 Julae 2022, Reuters.
“Saot Afrika: wan grup blong ol man oli sutum i ded 15 man long wan ba, long taon blong Soweto.”—10 Julae 2022, The Guardian.
“Long Yunaeted Stet, long wiken blong 4 Julae we i wan pablik holide blong kantri ya, bitim 220 man i ded from ol narafala oli sutum olgeta long masket.”—5 Julae 2022, CBS Nius.

?I gat hop se vaelens bambae i finis samtaem? ?Baebol i talem wanem?

Vaelens i Finis

Baebol i talem se taem ya we yumi laef long hem, hemia “ol las dei,” we ol man bambae oli wael olgeta, oli strong tumas, mo oli raf. (2 Timoti 3:1, 3) From we plante man oli raf olsem, ol man oli fraet. (Luk 21:11) Be Baebol i talem se i no longtaem vaelens bambae i finis, mo ol man “bambae oli laef long wan ples we i gat pis olwe, . . . i sefgud, . . . wan kwaet ples blong spel.” (Aesea 32:18) ?Olsem wanem vaelens bambae i finis?

God bambae i meksua se i no moa gat man nogud mo bambae i spolem ol tul blong faet.

“Ol man nogud, bambae oli katemaot olgeta long wol ya.”—Ol Proveb 2:22.
“[God] i stap finisim ol wo long olgeta ples long wol. Hem i stap brekem ol bonara mo i brebrekem ol spia. Hem i stap bonem ol kat blong faet, long faea.”—Ol Sam 46:9.

God bambae i stopem vaelens taem hem i tijim ol man blong oli gat pis.

“Bambae oli no mekem eni trabol no oli spolem eni samting long olgeta ples long bigfala hil blong mi we i tabu, from we bambae wol ya i mas fulap gud long save blong Jehova olsem we wota i kavremapgud solwota.”—Aesea 11:9.

Blong save moa long promes blong Baebol long saed blong laef long wan wol we i no moa gat fraet, ridim atikol ya long Inglis “Freedom From Fear—Is It Possible?”

Blong save moa long saed blong en blong vaelens, ridim atikol ya long Inglis “Peace on Earth at Last!”