Baebol Stadi Kos We Yu Save Mekem Wetem Ol Witnes Blong Jehova
Ol Witnes blong Jehova oli wokem wan gudfala rod blong yu save lanem wanem we Baebol i tijim. Baebol stadi kos ya i save givhan long yu blong:
Gat wan hapi laef
Kam fren blong God
Lanem ol promes blong Baebol long saed blong fiuja
Long pej ya
Sipos mi mekem Baebol stadi, ?bambae oli fosem mi blong kam wan Witnes blong Jehova?
?Sipos mi bin stadi wetem ol Witnes bifo, mi save stadi bakegen?
?Oli mekem Baebol stadi olsem wanem?
Tija bambae i givhan long yu blong kasem save long ol wanwan topik blong Baebol. Sipos yu folem Baebol stadi kos ya wetem buk ya !Enjoem Laef Olwe! sloslo bambae yu lanem ol tijing blong Baebol mo olsem wanem oli save givhan long yu. Blong kasem save moa, wajem video ya.
?Mi mas pem olgeta?
Nogat. Ol Witnes blong Jehova oli folem ol tok we Jisas i talem long ol disaepol blong hem se: “Yufala i kasem fri nomo, mo yufala i mas givim fri nomo.” (Matiu 10:8) Mo tu, yu no pem ol samting we yu yusum long kos, olsem Baebol mo buk ya we nem blong hem !Enjoem Laef Olwe!
?Kos i longfala olsem wanem?
Long kos ya, i gat 60 lesen. I stap long yu nomo blong jusum sipos yu wantem go kwik o yu wantem go slo, be plante studen oli laekem blong mekem wan o tu lesen evri wik.
?Olsem wanem blong stat?
1. Fulumap fom long websaet. Mifala i yusum ol infomesen long saed blong yu, blong wan Witnes blong Jehova i save kontaktem yu, olsem yu askem.
2. Wan tija bambae i kontaktem yu. Tija bambae i eksplenem kos ya long yu, mo ansarem ol kwestin we yu gat long saed ya.
3. Yu mekem plan wetem tija blong yu. Tija i save kam luk yu stret, sipos no, yutufala i save mekem stadi long fon, video kol, leta, o imel. Klosap oltaem, stadi i blong wan aoa, be sipos yu wantem, yu save sotem o mekem i longfala moa, folem program blong yu.
?Mi save traem fastaem, blong luk sipos mi laekem stadi?
Yes. Blong mekem olsem, fulumap fom long websaet. Taem wan tija i kontaktem yu, talem long hem se yu wantem traem fastaem blong luk sipos yu laekem stadi ya. Hem bambae i yusum !Enjoem Laef Olwe! we i gat tri lesen nomo long hem, blong luk sipos yu laekem.
Sipos mi mekem Baebol stadi, ?bambae oli fosem mi blong kam wan Witnes blong Jehova?
Nogat. Ol Witnes blong Jehova oli laekem blong tijim ol man long saed blong Baebol, be mifala i neva fosem man blong joenem jos blong mifala. Mifala i soem nomo wanem we Baebol i talem. Mifala i save se wanwan man i gat raet blong jusum samting we hem i wantem bilivim.—1 Pita 3:15.
?Mi save yusum Baebol blong mi?
Yes, yu save yusum eni translesen blong Baebol. Mifala i laekem blong yusum Baebol Long Niu Wol Translesen, from we hem i klia mo ol tok blong hem i stret gud, be mifala i luksave se plante man oli laekem moa blong yusum Baebol blong olgeta.
?Mi save singaot sam narafala blong joen long stadi tu?
Yes. Yu save askem long ol famle mo ol fren blong yu we yu wantem invaetem olgeta.
?Sipos mi bin stadi wetem ol Witnes bifo, mi save stadi bakegen?
Yes. Maet yu laekem moa Baebol stadi kos blong naoia i bitim stadi blong yu bifo, from we mifala i jenisim sam samting blong mekem se i givhan moa long ol man tede. Long kos ya, i gat plante moa pija mo video, mo i gat ol kwestin tu we yu nomo yu save ansarem.
?I gat rod blong stadi Baebol mi wan, we i no gat wan tija?
Yes. Nating se bighaf blong ol studen oli lanem moa taem wan tija i givhan long olgeta, be samfala oli laekem moa blong stadi olgeta wan. Long pej ya, Ol Tul Blong Stadi Baebol, i gat wan lis blong ol fri tul we oli save givhan long yu blong stadi Baebol. Hemia sam long olgeta:
Ol Video Blong Baebol. Ol sot video ya oli eksplenem ol impoten tijing blong Baebol.
Ansa we Baebol i givim. Haf ya i ansarem plante kwestin long saed blong Baebol.
Eksplenesen Blong Ol Vas. Faenemaot mining blong ol vas mo ol tok blong Baebol we plante man oli save.