OL YANGFALA OLI ASKEM

?Olsem Wanem Sipos Papa Mo Mama Blong Mi i Divos?

Wan samting we i save mekem ol yangfala oli wari moa i bitim ol narafala samting, hemia divos blong papa mo mama blong olgeta. ?Yu save mekem wanem blong winim filing ya blong harem nogud tumas from divos blong mama mo papa blong yu?

Long atikol ya

Tri samting we yu no mas mekem

1. Blemem yu wan

“Wan dei Mama i talem long mi se ol problem we hem i gat wetem papa blong mi oli stat taem mi mi bon. Hemia i mekem mi mi ting se mi nao mi stamba blong ol problem we tufala i divos from.”—Diana.

Yu no mas fogetem se: Tufala i no divos from samting we yu yu mekem, be from ol problem bitwin long tufala nomo. Yu yu no stamba blong ol problem blong tufala mo yu no save stretem ol problem ya. Hem i wok blong tufala blong stretem ol problem insaed long mared blong tufala.

“Olgeta man wanwan oli gat prapa basket blong olgeta blong karem.”—Galesia 6:5.

2. Stap kros longtaem

“Mi kros we mi kros long papa blong mi from we hem i no stap tru long mama blong mi. Bambae i had blong mi mi trastem hem bakegen.”—Rianna.

Yu no mas fogetem se: I stret nomo we yu kros mo yu harem nogud from ol samting we i hapen bitwin long papa mo mama blong yu. Be i nogud yu stap kros longtaem. Samting ya i save spolem yu long saed blong bodi mo filing. Taswe samfala oli talem se taem yu stap kros longtaem, hemia i olsem we yu dring posen mo yu wet blong narafala i kam sik from.a

“Livim fasin blong kros, mo yu lego fasin blong kros bitim mak.”—Ol Sam 37:8.

3. Ting se yu no save gat wan hapi mared

“Mi wari tumas se bambae mi mekem sem mak olsem papa blong mi. Mi wari se sipos mi mared mo mi gat pikinini, bambae mi mekem sem samting we i lidim papa mo mama blong mi blong mekem divos.”—Jessica.

Yu no mas fogetem se: From we mared blong mama mo papa blong yu i brokdaon, hemia i no min se mared blong yu tu bambae i brokdaon. Yu save lanem sam impoten samting long papa mo mama blong yu. Wan samting se, maet yu kasem save moa long ol fasin we yu wantem se hasban o waef blong yu i mas gat. Mo tu, samting we i hapen long mared blong papa mo mama blong yu i save pulum yu blong traehad moa blong wokem ol fasin we bambae oli mekem se yu kam wan gudfala hasban o waef.

“I gud man i jekem wok we hem nomo i mekem.”—Galesia 6:4.

Wan boe we i gat simen long leg blong hem, i sidaon long jea mo i yusum laptop blong hem. — Taem papa mo mama blong yu i divos mo yu mas lan long samting ya, i olsem we yu brekem wan bun long bodi blong yu mo i tekem taem blong soa i lus mo blong harem gud bakegen

Tri samting we yu save mekem

1. Tokbaot ol filing blong yu. Ol man we oli neva tokbaot ol nogud filing blong olgeta, oli save folem ol fasin we i spolem olgeta, olsem dring bitim mak o tekem drag. Yu no mas folem rod ya, i moa gud yu traem hemia:

Toktok long papa mo mama blong yu. Sipos wan long tufala o tufala tugeta i stap traem blong pulum yu blong yu tekem saed long ol trabol blong tufala, long kwaet fasin yu save eksplenem klia olsem wanem samting ya i stap spolem yu. Sipos i had blong yu toktok stret long tufala, yu save raetem leta long wan long tufala o long tufala tugeta.

Toktok long wan fren we yu trastem. Taem yu gat wan fren we i lesin gud long yu, hemia i save givhan bigwan long yu. Baebol i talem se: “Wan tru fren i soemaot lav oltaem, mo hem i wan brata we i kamtru long yu long taem blong trabol.”—Ol Proveb 17:17.

Toktok long Krieta blong yu. Oltaem, Jehova God we i “Man blong harem ol prea” i rere blong lesin long yu. (Ol Sam 65:2) Baebol i talem se yu mas ‘lego ol wari blong yu long hem, from we hem i kea long yu.’—1 Pita 5:7.

?I isi moa blong yu toktok long papa blong yu o long mama blong yu, long kwaet fasin we yu no kam kros?
?Weswan fren we yu trastem (yangfala o bigman) i save givhan long yu blong gotru long had taem ya?
?Wanem trabol we yu save prea from?

2. Jenis folem ol samting we i hapen

Taem papa mo mama blong yu i divos, maet yu mas muv i go long narafala haos, wan niufala skul, maet yu gat ol niufala fren tu, mo maet yu no gat sem amaon blong mane blong laef long hem olsem bifo. I tru, samting ya i save mekem yu yu wari mo yu harem nogud, maet yu harem se ful laef blong yu i jenis i kam nogud. ?Wanem i save mekem i isi moa blong lan long ol jenis ya? Traem tingbaot olsem wanem yu yu save jenis folem ol niufala samting we i hapen long laef blong yu.

?Wanem jenis we i bigwan moa long yu taem papa mo mama blong yu i divos?
?Yu save mekem wanem blong yu jenis sloslo folem samting ya?

“Mi mi lanem finis blong harem gud nomo long wanem samting we mi gat, nomata se laef blong mi i olsem wanem.”—Filipae 4:11.

3. Makem ol gudfala fasin blong yu wan

I tru se taem papa mo mama blong yu i divos, hemia i save mekem se yu wari bigwan. Be i save tijim yu tu blong luksave ol gudfala fasin long yu wan, mo maet i givhan long yu blong kasem sam moa gudfala fasin. Jeremy, we papa mo mama blong hem i divos taem hem i gat 13 yia, i talem se: “Taem tufala i divos, hemia i fosem mi blong mi kam bigman moa long tingting blong mi. Mi mi fastaem long brata blong mi, ale mi mas halpem Mama mo mi mas givhan tu long smol brata blong mi.”

Wan gel i halpem smol sista blong hem blong mekem homwok blong hem, mo mama i rerem kakae long kijin. — Divos blong papa mo mama blong yu i save fosem yu blong kam bigman long tingting blong yu mo givhan moa long famle

Taem trabol ya i hapen long laef blong papa mo mama blong yu, ?yu luksave wanem gudfala fasin long yu wan?
?Wanem sam fasin we yu wantem kamgud moa long olgeta?

“Olgeta tok blong Baebol oli kamaot long God fastaem, mo oli stret gud . . . blong stretem olgeta samting.”—2 Timoti 3:16.

a Blong save moa, luk haf ya “?Olsem Wanem Mi Save Kontrolem Kros Blong Mi?”

?Sam narafala yangfala oli talem wanem?

“Naoia, mi stap lan moa long divos blong papa mo mama blong mi. Long stat, mi no kasem save long samting we i stap hapen. Taem mi gat 13 mo 14 yia, mi kam kros. Naoia mi gat 18 yia, mo mi naf blong kasem save samting we i hapen mo putum tingting blong mi i stap long fiuja nomo.”—Elena.

“Taem mi gat 7 yia, papa mo mama blong mi i divos. Taem mi gat 21 yia, mi sidaon wetem papa blong mi mo mi talem long hem se mi wantem tokbaot evri samting we i hapen. Mitufala i storian blong tu aoa long ol samting we i lidim tufala blong divos mo olsem wanem i spolem mi. Mi no laekem nating divos, be mi lavem papa blong mi mo mi kasem save long hem. Storian ya i halpem mi blong gat pis long tingting blong mi mo putum tingting blong mi i stap long fiuja.”—Katelyn.