?Baebol i Agri Blong Man i Slip Wetem Man Bakegen?

Ansa we Baebol i givim

Taem God i wokem man long wol ya, hem i wokem man mo woman. Hem i wantem se man i maredem woman, ale tufala i save slip tugeta. (Jenesis 1:27, 28; Levitikas 18:22; Ol Proveb 5:18, 19) Baebol i tok agensem fasin ya we man i slip wetem wan narafala man no woman we i no waef blong hem. (1 Korin 6:18) Hemia i min se man i no mas mekem seks wetem wan narafala we i no waef blong hem, i no mas pleplei wetem ol tabu haf blong bodi blong hem, mo i no mas yusum maot no as blong mekem seks wetem hem.

Baebol i agensem fasin ya we man i slip wetem man bakegen, mo woman i slip wetem woman. Be hem i no talem se yumi mas agensem ol man we oli stap mekem rabis fasin ya, mo Baebol i no agri long olgeta we oli stap spolem ol man olsem. Defren olgeta, Baebol i talem se evri Kristin oli ‘mas gat respek long evri man.’—1 Pita 2:17, Good News Translation.

?Man i save bon wetem fasin ya?

Baebol i no tokbaot wan man se taem hem i bon, hem i gat tingting ya finis blong mekem seks wetem man. Be Baebol i tokbaot se yumi evriwan yumi bon wetem fasin ya we yumi wantem mekem samting we God i no glad long hem. (Rom 7:21-25) Taswe, Baebol i no tokbaot samting we i mekem se man i wantem slip wetem man bakegen, be hem i talem stret se i tabu blong man i mekem rabis fasin ya.

?Olsem wanem blong mekem God i glad, nating se yu stap faet agensem filing ya?

Baebol i talem se: “Yu no mas letem bodi blong yu i kontrolem yu. Yu mas kilimaot evri tingting we i pulum yu blong mekem seks long fasin we i no stret.” (Kolosi 3:5, Contemporary English Version) Yu mas kontrolem ol tingting blong yu, sipos yu wantem kilimaot ol rong tingting we i save lidim yu blong mekem samting we i nogud. Sipos oltaem yu stap fulumap tingting blong yu wetem ol samting we oli klin, bambae i moa isi long yu blong sakemaot ol tingting we oli no stret. (Filipae 4:8; Jemes 1:14, 15) Maet long stat, yu harem se i had ale yu mas traehad bigwan blong sakemaot ol tingting olsem, be sloslo bambae i kam moa isi. God i promes se bambae hem i givhan long yu, blong mekem ‘tingting blong yu i kam niuwan.’—Efesas 4:22-24.

Plante man we oli no gat fasin ya blong slip wetem man bakegen, mo we oli wantem folem ol rul blong Baebol long laef blong olgeta, olgeta tu oli stap traehad olsem. Yu traem tingbaot olgeta we oli singel be oli no gat janis nating blong faenem wan narafala blong mared wetem. Mo yu traem tingbaot olgeta we oli mared be wan samting i rong long bodi blong hasban no waef blong olgeta, ale oli no save mekem seks. Olgeta ya oli mas jusum blong kontrolem bodi blong olgeta, nating se oli fesem plante samting we i traem pulum olgeta. Taem oli mekem olsem, oli naf blong gat wan gudfala laef. Taswe, ol man we oli harem se oli wantem slip wetem man bakegen, olgeta tu oli save gat wan gudfala laef olsem sipos oli rili wantem mekem God i glad.—Dutronome 30:19.