Ol Atak Long Saed Blong Seks: ?Mi Mas Save Wanem?—Pat 1: Ol Aksen Blong Blokem

?Ol atak long saed blong seks i minim wanem?

I gat defdefren mining folem loa long ol defren ples, be bigfala mining se enikaen fasin long saed blong seks we narafala i mekem long yu be yu no wantem. Samtaem hemia i min se hem i fosem yu. I save minim tu se i fosem wan pikinini o yangfala long saed blong seks, seks bitwin tu memba blong sem famle, wan i repem narawan, o wan dokta, tija, o lida blong jos i mekem nogud long wan we i trastem hem. Nating se oli atakem narafala wetem ol tok blong olgeta o oli mekem nogud long narafala long saed blong seks, be oli talem long hem se bambae oli kilim hem sipos hem i ripotem.

Wan stadi we oli mekem long Yunaeted Stet i soemaot se evri yia, i gat klosap 250,000 man we oli ripotem ol atak long saed blong seks. Klosap 50 pesen blong olgeta oli gat 12 yia kasem 18 yia nomo.

Samting we yu mas save

• Baebol i agensem ol atak long saed blong seks. Baebol i talem se 4,000 yia i pas, wan bigfala hip blong man we ol krangke filing long saed blong seks i pusum olgeta, oli traem blong repem tu man we tufala i visitim taon blong Sodom. Stori ya i soemaot from wanem Jehova i spolem taon ya Sodom. (Jenesis 19:4-13) Mo tu, Loa we God i givim long Moses samwe long 3,500 yia i pas, i agensem fasin ya we tu memba blong sem famle oli mekem i nogud tugeta, o wan i fosem narawan long famle long saed blong seks.—Levitikas 18:6.

• Bighaf oli save hemia we i atakem olgeta. Buk ya Talking Sex With Your Kids i talem se: “Tu long evri tri woman oli save man we i repem olgeta. Hem i no wan strenja we i haed mo i jamaot blong atakem olgeta.”

• Samting ya i hapen long ol woman mo ol man tu. Long Yunaeted Stet, samwe long 10 pesen blong olgeta we narafala i atakem olgeta, oli ol man. Folem Rape, Abuse & Incest National Network (RAINN), ol man ya “oli fraet se atak bambae i mekem olgeta oli kam homoseksuol” o “bambae oli no moa strong olsem man.”

• Yumi no sapraes se i gat plante atak long saed blong seks. Baebol i talem se long “ol las dei” plante man bambae oli “no gat lav,” oli “wael olgeta,” mo “oli no save bos long tingting.” (2 Timoti 3:1-3) Hemia fasin blong ol man we oli atakem ol narafala long saed blong seks.

• I no fol blong yu sipos narafala i atakem yu. I no gat wan risen we i mekem se i stret blong narafala i atakem yu long saed blong seks. Hem nao i gat fol from ol asken blong hem. Be i gat sam samting we yu save mekem blong givhan blong blokem ol atak.

Samting we yu save mekem

• Rere gud. Yu mas save fastaem wanem blong mekem sipos narafala i traem fosem yu long saed blong seks, nating se yu stap frenem hem o hem i wan famle. Wan yangfala woman, nem blong hem Erin, i talem se blong rere gud from eni situesen we narafala i traem fosem yu, i gud blong aktem samting we i save hapen mo rere gud long samting we yu save mekem. Hem i se: “Maet yu harem se i narakaen blong mekem olsem, be sipos samting ya i rili hapen, bae yu rere blong blokem.”

  Baebol i talem se: “Yufala i mas lukaot gud olsem wanem yufala i wokbaot, yufala i no mas wokbaot olsem ol man we oli no waes, be olsem ol man we oli waes, . . . from we yumi laef long ol dei we oli rabis we oli rabis.”—Efesas 5:15, 16.

  Askem se: ‘?Bambae mi mekem wanem sipos narafala i tajem mi long fasin we i no stret?’

• Mekem wan plan blong yu save ronwe kwiktaem. RAINN i talem se: “I gud yu talemaot long ol fren mo famle sam spesel tok we yu save talem sipos yu fraet long man we yu stap wetem hem. Olsemia, taem yu ringim olgeta blong askem help, yu save talem spesel tok ya be man ya bambae i no save. Nao ol fren o famle oli save kam from yu, o mekem wan eskius blong yu save aot long hem.” Yu save blokem plante trabol sipos yu luksave bifo, se wan situesen i denja tumas.

  Baebol i talem se: “Man we i tingting gud i luksave we trabol i stap kam, nao i go haed, be man we i no gat ekspiriens, hem i gohed nomo, i no wantem save, mo biaen i safa from.”—Ol Proveb 22:3.

  Askem se: ‘?Wanem plan we mi gat blong mi save ronwe kwiktaem?’

  

• Mekem sam rul mo folem olgeta. Wan eksampol: Sipos yutufala i stap fren, yutufala i mas tokbaot wanem kaen fasin i stret blong mekem mo wanem kaen fasin i no stret blong mekem. Sipos hem i ting se i krangke blong mekem sam rul mo folem olgeta, i gud yu faenem wan narafala fren we i respektem tingting blong yu.

  Baebol i talem se: “Man we i gat lav . . . i no mekem ol samting we i no stret, hem i no tingbaot hem wan nomo.”—1 Korin 13:4, 5.

  Askem se: ‘?Wanem ol fasin we yumi tinghae long olgeta? ?Wanem ol fasin we i no stret blong mekem?’