?From Wanem i Gat Plante Kristin Skul?
Ansa we Baebol i givim
Plante man oli yusum ol tijing blong Jisas Kraes blong statem ol defren kaen “Kristin” skul. Be Baebol i talem se i gat wan tru Kristin skul nomo. Tingbaot trifala risen from wanem yumi talem olsem.
Jisas i talem se hem i tijim ol man long “trutok,” mo ol fas Kristin bifo oli tokbaot skul blong olgeta olsem “trutok.” (Jon 8:32; 2 Pita 2:2; 2 Jon 4; 3 Jon 3) Hemia i soemaot se olgeta we oli tijim ol samting we i agensem ol tijing blong Jisas, oli no stap folem tru Kristin skul.
Baebol i tijim se ol Kristin ‘oli mas toktok we oli gat wan tingting nomo.’ (1 Korin 1:10) Be plante Kristin skul oli no save agri se weswan man i stret blong singaotem hem se Kristin. Taswe, ol skul olsem oli no save tru.—1 Pita 2:21.
Jisas i talemaot wan profet tok se plante man bambae oli talem se oli Kristin, be bambae oli no obei long ol tok blong hem, taswe hem i no wantem olgeta. (Matiu 7:21-23; Luk 6:46) Sam lida blong skul we oli wantem spolem tru wosip blong kasem samting blong olgeta nomo, bambae oli lidim ol man oli go krangke. (Matiu 7:15) Sam narafala man bambae oli laekem moa ol giaman Kristin skul, from we ol skul ya oli talem samting we ol man oli glad blong harem, be i no trutok blong Baebol.—2 Timoti 4:3, 4.
Long pijatok blong Jisas long saed blong wit mo rabis gras, hem i talemaot se bambae i gat sam man we oli rebel agensem tru Kristin skul, hemia ol man blong apostasi. (Matiu 13:24-30, 36-43) Bambae i gat wan longfala taem we i had blong luksave olsem wanem tru Kristin skul i defren long ol giaman Kristin skul. Olsem Jisas i talem, afta we ol aposol oli ded, ol man blong apostasi oli kam antap bigwan. (Ol Wok 20:29, 30) Ol tijing blong ol man blong apostasi oli defdefren, mo tu, ol defren giaman Kristin skul oli “lusum rod blong trutok.”—2 Timoti 2:18.
Jisas i talemaot tu se bambae i kam klia hu nao tru Kristin skul mo hu ol giaman Kristin skul. Hemia i hapen finis long taem blong yumi, “long lashaf blong sistem blong wol ya.”—Matiu 13:30, 39.