Baebol i Talem Wanem

?Ol Kristin Skul Oli Karem Gudfala Frut No Nogat?

KLOSAP wan long evri tri man long wol oli talem se oli Kristin. Nating se i olsem, politik mo raf fasin we i kam antap bigwan i bitim bifo, i mekem se wol ya i seraot moa. ?Olsem wanem? ?Hemia i minim se i gat wan samting i rong wetem Kristin bilif we Jisas i tijim? ?No wan samting i rong long fasin blong plante man we oli talem se oli folem ol tijing blong Jisas?

Haf ya bambae i tokbaot wanem we Jisas i rili tijim mo eksampol we hem i soem long ol man blong hem. Mo tu, bambae i tokbaot tingting blong ol man we oli talem se oli Kristin, wan tingting we i rili agensem bilif blong trufala Kristin skul.

Ol Giaman Kristin Skul

Samwe long fo handred yia afta we Jisas i ded, wan giaman Kristin skul i kam stamba skul long ol kantri we Rom i rul long olgeta. I no longtaem, ol memba blong grup ya we oli talem se oli Kristin oli kam ol bigman long politik mo oli kasem ol hae posisen, ol man oli no moa lukluk daon long olgeta. Ol lida blong jos, olsem Augustine, oli tijim se jenis ya i soemaot we Kingdom blong God i kamtru finis. Ol lida ya oli talem se oli kasem niufala paoa long politik mo skul, mo hemia i rod blong mekem wil blong God i kamtru long wol. Oli makemgud se ol man nomo oli mas traehad blong stretem ol bisnes blong wol.

From samting ya, plante man oli bilif se wan Kristin i gat wok blong mekem insaed long politik. Oli talem se samtaem wan Kristin i mas mekem sam bilif blong hem i laenap wetem tingting blong ol man long ples blong olgeta. Taswe, plante man oli talem se oli bilif long ol tijing blong Kraes long saed blong lav mo pis, be long semtaem oli sapotem ol faet. Mo bakegen, maet ol jos oli talem long ol memba blong olgeta blong prea from Kingdom blong God, be long semtaem oli sapotem ol lida blong wol we oli mekem i strong tumas long ol man.

Ol giaman Kristin skul ya oli no sem mak long skul we Jisas i stanemap. Oli ol skul we man nomo i stamba blong olgeta, mo plante man tede we oli talem se oli Kristin oli folem ol skul ya. Ol giaman Kristin skul ya oli no karem gudfala frut. Yumi luk samting ya i klia nomo, long fasin blong olgeta jos blong Krisendoma tede we oli no tinghae long ol rul blong Baebol.

?Jisas i Rili Tijim Wanem?

Maet sam man oli sapraes long tok blong Jisas se ol man blong hem oli no ‘man blong wol ya, olsem we [hem i] no man blong wol ya.’ (Jon 17:​15, 16) ?From wanem Jisas i talem samting ya long ol disaepol blong hem? Aposol Jon, wan disaepol we Jisas i laekem hem tumas, i givim ansa long kwestin ya. Hem i raetem se: “Olgeta man blong wol ya oli stap long paoa blong Setan.”​—1 Jon 5:19.

Taswe, ol tijing blong Jisas oli no lidim ol man i go long wan ogenaesesen blong man, be oli lidim ol man i go long Kingdom blong God long heven we i olsem tul blong mekem wol ya i kam gud mo stret. (Matiu 6:10) Jisas hem wan i no pusum nus blong hem nating long ol bisnes blong wol long taem blong hem. Hem i tanem baksaed blong hem long janis we hem i gat blong joen long politik. (Jon 6:15) Mo tu, hem i sakemaot fasin ya blong faet from we hem i save se hemia i no rod blong stretem ol rao. (Matiu 26:​50-53; Jon 18:36) Jisas i no raetem wan konstitusen mo i no putumap plante loa blong kantri blong hem. Hem i no tekem saed nating blong wan pati blong politik long taem blong hem. Olsem nao, hem i no joen long wan grup we oli maj long rod blong givhan long ol man we oli wok slef blong oli kam fri, mo hem i no joen wetem ol man Jiu blong faet agensem rul blong ol man Rom.

Be, hemia i no min se Jisas i no tingbaot ol man mo ol trabol blong olgeta. Jisas i tijim se i impoten we yumi wanwan i mekem i gud long narafala. Hem i leftemap fasin ya blong no giaman no stil taem yumi pem takis mo hem i soem se i impoten blong obei long olgeta we oli gat haenem. (Matiu 22:​17-21) Hem i tijim olsem wanem blong soem intres long olgeta we oli gat nid. Hem i tijim tu olsem wanem blong soem respek long raet blong narafala mo olsem wanem blong soem filing, fogiv, mo sore long narafala. (Matiu, japta 5-7) Ol samting ya oli soemaot klia se ol tijing blong Jisas oli stanap long lav we man i gat long God mo long ol man raonabaot long hem.​—Mak 12:​30, 31.

Trufala Kristin Skul Tede

?Ale, wan trufala man blong Kraes i mas gat wanem fasin? Hem i mas gat fasin olsem Jisas. Hem i mas obei long ol loa blong kantri blong hem, be hem i no joen nating long ol bisnes blong politik. (Jon 12:​47, 48) Hem i no brekem ol Kristin rul, nating se hem i kasem wan strong traem. (1 Pita 2:​21-23) Be hem i no mas stap olsem we i intres long hem wan nomo. Wan tru Kristin i mas mekem plante samting blong givhan long ol narafala raonabaot long hem, olsem we Jisas i bin mekem. (Mak 6:34) Hem i mas yusum taem mo paoa blong hem, wetem olting blong hem, blong halpem narafala blong kasem save ol tijing blong Jisas, mo blong oli laef folem ol tijing ya nao oli save gat wan hapi laef.​—Jon 13:17.

Sem mak tede, ol Witnes blong Jeova oli traehad blong folem eksampol blong Kraes taem oli stap wetem ol man blong wol ya. Oli holem pis mo oli obeigud long loa blong kantri blong olgeta, be oli no man blong wol ya. Olsem Jisas i mekem, oli no joen long ol faet mo ol raorao blong politik we i stap hapen oltaem tede. Oli putum tingting blong olgeta i stap strong long Kingdom blong God olsem stamba samting blong finisim ol trabol blong wol ya. Frut blong samting ya, hemia se ol memba blong trufala Kristin skul oli gat wan laef we i hapi mo oli joengud wetem ol narafala memba blong skul ya. (Jon 13:​34, 35) Yes, trufala Kristin skul i karem gudfala frut.

[Futnot]

?YU YU BIN TINGBAOT?

◼ ?I stret we ol Kristin oli joen long politik?​—Jon 6:15.

◼ ?Olsem wanem? ?Jisas i soemaot se faet nao i rod blong stretem ol rao?​—Matiu 26:​50-53.

◼ ?Wanem fasin i makemaot ol trufala Kristin?​—Jon 13:​34, 35.

[Foto Credit Line blong pija long pej 16]

EL COMERCIO, Quito, Ecuador