Baebol i Talem Wanem

?Wan Kristin Man i Mas Gat Wanem Fasin?

KINGSLEY, we i blong wan long ol kantri blong Afrika i talem se: “Long kantri blong mi, wan Kristin i minim wan man we i go long jos wan taem long wan wik.” Raad, we i blong Medel Is, i talem se: “Long ples blong mifala, ol man oli luk ol Kristin olsem wan grup blong man we oli folem ol tingting mo kastom blong ol kantri blong Wes mo oli soemaot samting ya long fasin blong olgeta blong putum klos, mekem ol lafet mo fasin we oli mekem long ol woman.”

Be, blong stap olsem wan Kristin, i no minim nomo se man i go long jos sevis wan taem long wan wik mo i folem sam tingting mo kastom blong sam ples. Nogat. Tok ya “Kristin” i minim wan fasin blong laef we i soemaot ol tingting mo fasin blong Kraes wetem ol samting we hem i tinghae long olgeta. Ol samting ya, Jisas i talemaot mo i soemaot long eksampol blong hem.a ?Taem Kristin skul i jes stat, wanem fasin blong ol memba blong hem?

Faswan Kristin Skul—Wan Fasin Blong Laef

Jisas i talem long ol man blong hem se: “Sipos yufala i stap mekem ol samting we mi mi talem long yufala, yufala i fren blong mi.” (Jon 15:14) From we ol tijing blong Jisas oli gat paoa long laef blong ol disaepol blong hem, olgeta ya oli luk skul blong olgeta olsem “Rod.” (Ol Wok 9:2) Smoltaem biaen, God i pulum ‘ol man blong oli givim wan nem long ol man blong Jisas, se ol Kristin man.’ (Ol Wok 11:26) Niufala nem we oli kasem i soemaot se oli bilif se Jisas i Pikinini blong God we i talemaot long ol man ol samting we Papa blong hem long heven i wantem. Bilif ya i pusum olgeta blong folem wan fasin blong laef we i defren long hemia blong ol man raonabaot long olgeta.

Ol tijing blong Jisas oli pulum ol man blong hem blong folem ol tijing blong Baebol blong no mekem ol rabis fasin olsem ‘mekem nogud wetem woman, mekem ol samting blong sem, mekem ol samting we oli nogud olgeta, mekem prea long ol narafala god, mekem ol bisnes blong posen mo kleva, kam enemi, faet, jalus, kros, leftemap olgeta nomo, rao oltaem, dring we i lusum hed, mekem lafet blong mekem nogud nomo, mo mekem ol narafala samting olsem.’ (Galesia 5:19-21; Efesas 4:17-24) Aposol Pol i pulum ol Kristin long Korin blong oli tingbaot se oli bin mekem ol rabis fasin ya bifo. Biaen hem i talem se: “Be naoia, long nem blong Jisas Kraes, Masta blong yumi, . . . God i wasemaot ol sin blong yufala finis blong mekem yufala i klin. Hem i mekem yufala i tabu, yufala i man blong hem, mo hem i mekem yufala i stret man finis long fes blong hem.”—1 Korin 6:9-11.

Man ya E. W. Barnes i talem long buk blong hem (The Rise of Christianity) se: “Ol trufala stori we oli raetem long saed blong ol Kristin bifo, oli soemaot se ol man long Kristin skul oli gat gudfala fasin mo fasin blong obei long loa blong gavman. Ol memba blong hem oli wantem stap olsem ol gudfala sitisen mo oli ona oltaem long olgeta we oli rul. Oli stap longwe long ol giaman mo ol rabis fasin blong ol hiten man. Long laef blong olgeta wanwan oli traehad blong gat pis wetem ol man raonabaot long olgeta mo blong kam ol fren we man i save trastem olgeta. Oli lan blong bos long tingting blong olgeta, oli wok strong mo oli klin. Oli stap laef long wan taem we i gat plante kruked fasin mo rabis fasin long saed blong seks, be sipos oli holemstrong long ol rul blong olgeta, oli ol man we oli mekem i stret mo oli stap tru oltaem. Oli folemgud ol rul we i blokem ol doti fasin long saed blong seks: oli gat respek long fasin joen insaed long mared mo famle laef blong olgeta i klin.” Hemia nao fasin blong wan Kristin bifo.

Wan fasin blong Kristin skul bifo hemia se hem i wok strong long wok blong prij. Jisas i talem long ol man blong hem se: “Nao from samting ya, yufala i mas go long ol man long olgeta ples long wol, blong pulum olgeta oli kam man blong mi.” (Matiu 28:19, 20) Jean Bernardi we i wan tija blong Sorbonne Yunivesiti blong Paris long Franis, i talem se: “[Ol Kristin] oli mas go toktok long evri ples mo long evriwan. Long ol big rod mo long ol taon, long ol pablik ples mo long ol haos. Long ol man we oli akseptem olgeta no long ol man we oli no akseptem olgeta. Long ol pua man, mo long ol rij man we fasin blong hivimap ol sas samting i stap holemtaet olgeta. . . . Oli mas wokbaot, pas long ol sip, mo go long ol las ples long wol.”

Trufala Kristin Skul Tede

Ol trufala Kristin tede oli mas gat wan fasin blong laef we i defren long ol man blong wol olsem ol Kristin long faswan handred yia. From samting ya, ol Witnes blong Jeova oli traehad blong folemgud ol rul we ol Kristin bifo oli bin stanemap. Ol man oli luk klia traehad we olgeta ya oli mekem blong mekem laef blong olgeta i laenap wetem ol tijing blong Baebol.

Olsem nao, buk ya New Catholic Encyclopedia i talem se ol Witnes blong Jeova oli “wan grup blong man long wol we oli gat nambawan fasin.” Niuspepa ya Deseret News blong Salt Lake City, long Utah, i talem se ol Witnes blong Jeova oli “leftemap fasin joen insaed long famle mo oli mekem ol gudfala wok blong givhan long man blong kam ol gudfala sitisen.” Niuspepa ya i gohed i talem se: “Ol memba blong skul ya [ol Witnes blong Jeova] oli strong blong folem wan fasin blong laef we i gud. Oli tingbaot fasin blong smok, drong, tekem drag, plei laki, slip olbaot mo fasin ya we man i slip wetem man no woman i slip wetem woman olsem ol fasin we oli save spolem wan man long saed blong spirit. Oli tijim fasin blong tok tru mo fasin blong wokhad.”

Ol Witnes oli tinghevi long wok we oli gat hemia blong wok strong blong talemaot gud nius. Buk ya New Catholic Encyclopedia i tokbaot ol Witnes blong Jeova se: “Stamba wok blong ol wanwan memba blong skul ya . . . i blong givim witnes long Jeova taem oli stap talemaot Kingdom blong Hem we i stap kam. . . . Blong kam wan trufala Witnes, man i mas gat gudhan blong prij long sam rod.”

I klia se trufala Kristin skul i no minim se man i memba blong wan skul we i talem se hem i Kristin. Jisas hem wan i talem se ol giaman Kristin bambae oli kam plante. (Matiu 7:22, 23) Ol Witnes blong Jeova oli singaot yu blong yu lanem wanem we Jisas i tijim mo blong mekem ol samting ya i wok long laef blong yu. Hemia nao mining blong tok ya “Kristin.” Jisas i talem se: “Naoia yufala i savegud ol samting ya. Oraet, sipos yufala i stap mekem olsem, bambae yufala i save harem gud.”—Jon 13:17.

[Futnot]

?YU YU BIN TINGBAOT?

◼ ?Hu ya ol man we Jisas i talem se oli fren blong hem?—Jon 15:14.

◼ ?Ol trufala Kristin oli mas sakemaot wanem kaen fasin?—Galesia 5:19-21.

◼ ?Ol Kristin oli mas joen long wanem wok?—Matiu 28:19, 20.

[Tok blong pija long pej 25]

Ol trufala Kristin oli wok strong long wok blong prij olsem ol Kristin long faswan handred yia