OL YANGFALA OLI ASKEM
?Olsem Wanem Mi Save Joen Gud Wetem Papa Mo Mama?
Ol kwestin long ol rao
?Yu rao moa wetem hu?
Papa
Mama
?Yufala i rao plante o smol nomo?
Wanwan taem
Sam samtaem
Oltaem
?Yufala i raorao strong?
Mifala i stretem kwiktaem mo mekem pis.
Mifala i stretem afta we mifala i agiu.
Mifala i no stretem, nating se mifala i agiu plante.
Sipos yu no save joen gud wetem papa mo mama blong yu, maet yu ting se tufala nao i mas mekem samting blong gat pis wetem yu. Be i gat sam samting we yu yu save mekem, blong yufala i no rao plante mo no rao strong tumas. Fastaem, traem tingbaot . . .
?From wanem mifala i raorao?
Yusum tingting. Taem yu stap kam bigwan, yu tingting dip moa i bitim taem we yu pikinini. Mo tu, yu stat blong gat sam strong bilif, we maet sam long olgeta oli defren long tingting blong papa mo mama blong yu. Nating se i olsem, Baebol i talem se: “Yu mas ona long papa mo mama blong yu.”—Eksodas 20:12.
Trutok: Taem yu no agri wetem papa mo mama blong yu, yu mas bigman long tingting blong yu, mo waes long ol toktok blong yu, blong yu no rao wetem tufala.
Kamfri. Taem yu kam bigman moa long tingting blong yu, ating papa mo mama blong yu bambae i letem yu yu mekem sam samting we yu wantem. Be maet yu ting se tufala i mas letem yu yu mekem plante samting we yu wantem, mo letem yu yu kam fri kwiktaem. Hemia nao samting we i save mekem rao i kamaot. Be Baebol i talem se: “Yufala i mas obei long papa mo mama blong yufala.”—Efesas 6:1.
Trutok: Sipos Papa mo Mama i luk se yu yusum gud fasin fri we tufala i givim, plante taem bambae tufala i givim moa.
Samting we yu save mekem
Tingbaot wanem we yu save mekem. I gud yu tingbaot samting we yu save mekem blong gat pis, i bitim we yu blemem papa mo mama blong yu from ol rao. Wan yangfala we nem blong hem Jefri, i talem se: “Plante taem i no samting we Papa mo Mama i talem we i mekem rao i kamaot, be ansa we mi givim long tufala. Sipos mi toktok kwaet, mi save holem pis wetem tufala.”
Baebol i talem se: ‘Yu mas mekem bes blong yu blong gat pis.’—Rom 12:18.
Lesin. Samanta we i gat 17 yia, i talem se: “Mi luk se i had moa blong lesin i bitim ol narafala samting. Be taem mi lesin long papa mo mama blong mi, mi luk se tufala i lesin long mi tu.”
Baebol i talem se: “[Yu] mas rere oltaem blong lesin, [yu] no mas hariap blong toktok.”—Jemes 1:19.
Rao i olsem faea—sipos yu no kontrolem, bambae i kam bigwan moa
Tingbaot se yufala i stap long sem tim. Sipos yu gat defren tingting long papa mo mama blong yu, tingbaot samting ya olsem wan spot, maet tenis. Be yu no plei agensem Papa mo Mama, yu plei wetem tufala agensem problem ya. Yangfala Adam i talem se: “Long wan rao, ol papa mo mama oli wantem samting we oli ting se i gud long yangfala blong olgeta, mo yangfala i wantem samting we i gud long hem wan. Taswe oli rili stap wok blong kasem sem samting.”
Baebol i talem se: “I gud yumi traehad long evri rod blong gat pis wetem ol narafala.”—Rom 14:19.
Traem kasem save long filing blong papa mo mama. Yangfala Sera i talem se: “Samting we i givhan long mi, hemia taem we mi tingbaot se Papa mo Mama tu i gat sam problem blong tufala, we maet oli bigwan olsem problem blong mi.” Yangfala Kala i go moa, i se: “Mi traem blong tingbaot sipos mi mi stap long ples blong Papa mo Mama. ?Bambae i olsem wanem sipos mi nao mi Mama mo mi stap traem blong tijim wan pikinini we i gat sem problem olsem mi? ?Wanem rod i beswan long pikinini blong mi?”
Baebol i talem se: “Yufala i no mas tingbaot yufala nomo, be yufala i mas tingbaot ol narafala man tu.”—Filipae 2:4.
Obei. Hemia nao samting we Baebol i talem se yu mas mekem. (Kolosi 3:20) Mo sipos yu obei, evri samting bambae i isi moa. Yangfala Karen i talem se: “Taem mi mekem samting we Papa mo Mama i askem, mi no gat stres. Tufala i bin lego plante samting blong lukaot gud long mi, taswe i no wan bigfala samting blong obei long tufala.” !Fasin blong obei i wan samting we i save blokem rao!
Baebol i talem se: “Taem i no gat faeawud, faea i ded.”—Ol Proveb 26:20.
Traem hemia. Sipos yu luk se i had blong talemaot tingting blong yu long tufala, traem raetemdaon long wan pepa o teks mesej. Yangfala Alisa i talem se: “Mi mekem olsem taem mi harem se tingting blong mi i no stret blong toktok long tufala. Hemia i givhan long mi blong talemaot ol tingting blong mi, we mi no tok strong, mo mi no talem samting we biaen mi sore from.”