?Wanem Ya Taem Blong Bigfala Trabol?

Ansa we Baebol i givim

Hemia wan taem blong trabol we i bigwan moa i bitim ol taem bifo. Profet tok blong Baebol i talem se trabol ya bambae i hapen long “ol las dei,” o “taem blong en.” (2 Timoti 3:1; Daniel 12:4) Hemia “wan bigfala trabol we i neva hapen bifo, stat long taem we God i mekem olgeta samting i kam kasem taem ya, mo neva bambae i gat wan trabol olsem bakegen.”—Mak 13:19; Daniel 12:1; Matiu 24:21, 22.

Ol samting we bambae i hapen long taem blong trabol ya

• Ol giaman skul bambae oli lus. Kwiktaem nomo ol giaman skul bambae oli lus. (Revelesen 17:1, 5; 18:9, 10, 21) Ol politik paoa we oli joen long Yunaeted Nesen, bambae oli mekem samting we God i wantem, taem oli tekem aksen ya.—Revelesen 17:3, 15-18.a

• Atak long trufala skul. Vison blong Esikel i tokbaot “Gog blong kantri blong Magog.” Hemia wan grup blong ol nesen we bambae oli joen blong traem spolem olgeta we oli mekem tru wosip. Be God bambae i protektem ol man blong hem.—Esikel 38:1, 2, 9-12, 18-23.

• Jajmen blong ol man long wol. Jisas bambae i jajem ol man, “i seraot ol man, olsem we man blong lukaot long sipsip i stap seraot ol sipsip long ol nani.” (Matiu 25:31-33) Bambae hem i jajem ol wanwan man from we oli sapotem o oli no sapotem ol “brata blong Kraes,” hemia olgeta we bambae oli rul wetem hem long heven.—Matiu 25:34-46.

• Tekem ol rula blong Kingdom oli go long heven. Laef blong olgeta we God i jusumaot olgeta blong rul wetem Kraes, bambae i finis long wol, mo bambae oli laef bakegen long heven.—Matiu 24:31; 1 Korin 15:50-53; 1 Tesalonaeka 4:15-17.

• Amagedon. I gat wan narafala nem blong faet ya long “bigfala dei blong God Ya We i Gat Olgeta Paoa,” hemia “dei blong Jehova.” (Revelesen 16:14, 16; Aesea 13:9; 2 Pita 3:12) Olgeta we Kraes i jajem olgeta se oli man nogud, bambae oli lus. (Sefanaea 1:18; 2 Tesalonaeka 1:6-10) Hemia i minim tu ol politik paoa blong wol, we animol ya we i gat seven hed blong hem, i pija blong olgeta.—Revelesen 19:19-21.

Ol samting we bambae i hapen afta long bigfala trabol ya

• Setan mo ol rabis enjel bambae oli kalabus. Wan strong enjel bambae i slingim Setan mo ol rabis enjel oli go “long abys,” nao oli no moa save wok, i olsem we oli ded. (Revelesen 20:1-3) Taem Setan i stap long abys, bambae hem i kalabus, from we i no moa gat paoa nating long wol ya.—Revelesen 20:7.

• Wan Taosen Yia Rul blong Kraes i stat. Kingdom blong God bambae i stat blong rul blong 1,000 yia, mo ol man bambae oli kasem ol bigfala blesing. (Revelesen 5:9, 10; 20:4, 6) Wan “bigfala hip blong ol man” bambae oli “pastru long bigfala trabol” blong luk stat blong rul ya blong Wan Taosen Yia.—Revelesen 7:9, 14; Ol Sam 37:9-11.