?Mi Mas Save Wanem Long Fasin Blong Putum Foto Long Intenet?

Yu stap gat gud taem long spel blong yu, mo yu wantem talem long ol fren blong yu. Be, ?olsem wanem? ?Bambae yu

1. sanem wan poskad long wanwan?

2. raetem wan imel long evri fren blong yu?

3. postem ol foto long Intenet?

Taem tufala bubu blong yu oli gat sem yia olsem yu, ating oli stap folem opsen “A” nomo.

Taem papa mo mama blong yu oli gat sem yia olsem yu, maet oli folem “B”.

Tede, plante yangfala we oli gat raet blong postem ol foto long Intenet oli laekem moa opsen “C.” ?Yu tu? Sipos yes, atikol ya bambae i save givhan long yu blong no kasem sam trabol.

• ?Wanem ol gudfala samting?

• ?Wanem ol denja?

• Yu save mekem wanem

• Sam yangfala oli talem wanem

?Wanem ol gudfala samting?

I kwiktaem. “Taem mi gat wan nambawan spel o gudfala taem wetem ol fren, mi putum ol foto blong mi we mi stap harem gud yet long taem ya.”​—Melanie.

I isi. “I isi nomo blong lukluk tru long ol niufala foto we ol fren blong mi oli postem i bitim we mi jekem long imel blong faenemaot samting we i stap hapen.”​—Jordan.

I halpem yu blong faenemaot samting we narafala i stap mekem. “Sam long ol fren mo famle blong mi oli laef longwe. Sipos oli postem ol pija plante taem mo mi jekem plante taem, i olsem se mi stap luk olgeta evri dei!”​—Karen.

?Wanem ol denja?

Yu save putum yu wan long denja. Sipos kamera blong yu i gat geotagging (infomesen long saed blong ples we yu tekem foto), maet yu sek long samting we man i save faenemaot long ol foto we yu postem. Websaet blong Digital Trends i talem se “Taem yu postem ol foto mo ol narafala samting long Intenet mo yu putum stret ples we yu tekem, man we i gat rong tingting mo i gat softwe blong hem i save faenem ples we yu stap long hem.”

I tru se, sam rabis man oli intres moa long ples we yu yu no stap. Digital Trends i talem se wan taem, tri stilman oli go insaed long 18 haos long taem we evriwan i aot. ?Olsem wanem oli save se bambae i no gat man long haos? Oli go long Intenet mo oli jekem ol ples we ol man blong haos oli go​—nem blong samting ya we oli mekem i cybercasing (oli spae long man tru long Intenet)​—praes blong ol samting we oli stilim hem i 100,000 dola.

Yu save luk sam nogud samting. Sam man oli no sem blong postem eni samting blong ol man oli luk. Wan yangfala we nem blong hem Sera i talem se: “Yu save kasem trabol taem yu stap go tru long akaon blong ol man we yu no save. I olsem we yu stap wokbaot long wan taon we yu no save mo yu no holem map. Be wan samting we yu sua long hem, se bambae yu kasem wan ples we yu no wantem nating blong go long hem.”

Yu spenem tumas taem. Wan yangfala woman we nem blong hem Yolanda i talem se “I isi nomo blong lukluk ol laswan samting we ol fren blong yu oli postem mo ridim komen blong evriwan. Yu save kasem mak ya blong jekem fon blong yu evri seken jes blong luk samting we i niu.”

Wan yangfala we nem blong hem Samanta i agri long tingting ya. Hem i talem se “Mi mas lukaotgud long hamas taem mi spenem long ol websaet ya. Yu mas kontrolem yu wan sipos yu wantem gat wan akaon blong putum ol foto long Intenet.”

Samting we yu save mekem

• Yu mas gat strong tingting blong no lukluk ol nogud samting. Baebol i talem se: “Bambae mi no save lukluk wan samting we i blong nating nomo.”​—Ol Sam 101:3.

  “Oltaem mi jekem ol samting we ol fren blong mi oli postem, mo sipos mi luk se sam samting we oli putum i no stret mi karemaot olgeta long akaon blong mi.”​—Steven.

• Yu no joen wetem ol man we oli no gat ol gudfala fasin olsem yu, from oli save spolem yu. Baebol i talem se: “Yufala i no mas letem ol narafala oli lidim yufala i go krangke. Ol rabis fren oli save spolem ol gudfala fasin.”​—1 Korin 15:33.

  “Yu no lukluk ol foto long Intenet jes from we plante man oli laekem. Plante taem, hem i long ples ya nao we bambae yu luk ol nogud tok, ol man oli no werem klos, mo sam narafala nogud samting bakegen.”​—Jessica.

• Putum sam mak long taem we bae yu spenem long Intenet mo hamas taem bae yu postem ol foto. Baebol i talem se: “Yufala i mas lukaot gud olsem wanem yufala i wokbaot, yufala i no mas wokbaot olsem ol man we oli no waes, be olsem ol man we oli waes, yufala i yusum gud taem blong yufala.”​—Efesas 5:​15, 16.

  “Mi karemaot long akaon blong mi ol man we oli postem tumas foto. Eksampol, wan man i go long solwota mo hem i postem 20 pija blong sem sel. Rili? I tekem tumas taem blong lukluk tru long ol foto!”​—Rebeka.

• Yu mas meksua se yu no postem ol foto blong yu nomo from we yu save givim rong tingting long man. Wan long ol man blong raetem Baebol Pol i talem se: “Mi mi talem long yufala se i no mas gat wan long yufala we i tinghae long hem bitim mak.” (Rom 12:3) Yu no mas ting se ol foto blong yu mo ol samting we yu mekem bambae i pulum bigfala intres long ol fren blong yu.

  “Sam man oli postem plante we plante selfies. Sipos yu fren blong mi, mi save se yu olsem wanem​—Mi no nid blong yu rimaendem mi oltaem!”​—Allison.