?“Ona Long Papa Mo Mama Blong Yu” i Minim Wanem?
Ansa we Baebol i givim
Oda ya blong “ona long papa mo mama blong yu” i kamaot plante taem long Baebol. (Eksodas 20:12; Dutronome 5:16; Matiu 15:4; Efesas 6:2, 3) Mo hemia i joen wetem fo men aksen.
Glad long tufala. Yu ona long papa mo mama blong yu taem yu talem tangkiu long tufala from olgeta samting we tufala i mekem blong yu. Yu save soemaot se yu glad long tufala, taem yu tinghevi long olgeta samting we tufala i mekem blong lidim gud yu. (Ol Proveb 7:1, 2; 23:26) Baebol i enkarejem yu blong luk ol perens blong yu olsem “glori” blong yu, we hemia i min se yu mas praod from tufala.—Ol Proveb 17:6.
Akseptem raet blong tufala. Yu ona long papa mo mama blong yu taem yu luksave raet we God i givim long tufala, yu mekem olsem speseli taem yu yangfala. Kolosi 3:20 i talem long ol yangfala se: “Yufala i mas obei long ol papa mo mama blong yufala long evri samting, from we Masta i glad long fasin ya.” Jisas tu i glad blong obei long perens blong hem.—Luk 2:51.
Tritim tufala wetem respek. (Levitikas 19:3; Hibru 12:9) Hemia i joen oltaem wetem ol toktok blong yu, samting we yu talem mo olsem wanem yu talem. I tru se samtaem sam perens oli mekem sam samting we i mekem se i had blong respektem olgeta. Nating se i olsem, ol pikinini oli stil save ona long ol perens blong olgeta, hemia taem oli blokem ol toktok mo aksen we oli no soemaot respek. (Ol Proveb 30:17) Baebol i talem se man we i tok nogud long papa o mama blong hem, hemia i wan bigfala sin.—Matiu 15:4.
Givim samting long tufala. Taem perens blong yu i stap kam olfala, tufala i nidim we yu givhan long tufala. Yu save soemaot ona long tufala, taem yu traem bes blong yu blong meksua se tufala i gat ol samting we tufala i nidim. (1 Timoti 5:4, 8) Traem tingbaot Jisas, smoltaem bifo we hem i ded, hem i mekem plan blong wan i lukaot long mama blong hem.—Jon 19:25-27.
Rong tingting long fasin ya blong ona long papa mo mama
Rong tingting: Ona long papa mo mama blong yu, i min se yu mas letem tufala i kontrolem mared blong yu.
Trutok: Baebol i tijim se taem wan man mo woman i mared, naoia tufala i gat prapa famle blong tufala. Jenesis 2:24 i talem se: “Man bambae i aot long papa mo mama blong hem, mo bambae hem i go joen wetem waef blong hem.” (Matiu 19:4, 5) I tru, mared kapol i save harem gud long advaes blong ol perens blong tufala o ol papa mama blong hasban o waef blong tufala. (Ol Proveb 23:22) Be, wan kapol i gat raet blong putum limit long ol famle blong oli no pusum nus tumas long mared laef blong tufala.—Matiu 19:6.
Rong tingting: Papa mo mama blong yu nao i gat raet blong mekem laswan desisen.
Trutok: Nating se God i givim sam raet long ol perens insaed long famle, be raet we olgeta man i gat, i gat limit blong hem—oli no save ova long raet we God i gat. Traem tingbaot, taem hae kot i givim oda long ol disaepol blong Jisas blong oli no obei long God, oli ansa se: “Mifala i mas obei long God we i rula blong mifala, i bitim we mifala i obei long ol man.” (Ol Wok 5:27-29) Long sem fasin, ol pikinini oli obei long ol perens blong olgeta “olsem Masta blong yumi i wantem,” hemia long olgeta samting we i no go agensem ol loa blong God.—Efesas 6:1.
Rong tingting: Ona long papa mo mama blong yu, i min se yu folem bilif o jos blong tufala.
Trutok: Baebol i enkarejem yumi blong faenemaot fastaem sipos samting we man i talem long yumi, hem i trutok o nogat. (Ol Wok 17:11; 1 Jon 4:1) Wan man we i mekem olsem, hem i save jusum wan bilif we i defren long bilif blong perens blong hem. Baebol i tokbaot plante gudfala man blong God olsem Ebraham, Rut, mo aposol Pol, we oli no folem skul blong ol perens blong olgeta.—Josua 24:2, 14, 15; Rut 1:15, 16; Galesia 1:14-16, 22-24.
Rong tingting: Blong ona long papa mo mama blong yu, yu mas joen long ol kastom blong wosip long ol bubu we oli ded finis.
Trutok: Baebol i talem se: “Yu mas mekem wosip long Jehova nomo we i God blong yu, mo yu mas mekem tabu wok blong hem nomo.” (Luk 4:8) Yes, God i no agri nating long fasin ya we man i mekem wosip long ol bubu blong hem we oli ded finis. Mo tu, Baebol i tijim se “ol dedman oli no moa save wan samting nating.” Oli no save nating se ol man oli givim ona long olgeta; mo oli no save halpem o spolem man we i laef yet.—Prija 9:5, 10; Aesea 8:19.