Hibru 4:12—“Tok Blong God i Laef Mo i Stap Wok”

“Tok blong God i laef i stap mo paoa blong hem i stap wok, mo hem i sap moa i bitim naef blong faet we i sap tu saed. Mo hem i go dip insaed long man, i seraotem sol mo spirit, mo i seraotem ol joen blong bun long wota blong hem. Mo hem i naf blong faenemaot ol tingting mo ol plan we i stap long hat blong man.”—Hibru 4:12, Baebol Long Niu Wol Translesen.

“Tok blong God i laef mo i stap wok, i sap moa i bitim naef blong faet we i sap tu saed, mo i go dip insaed long man, i seraotem sol long spirit, ol joen long wota blong bun, mo i faenemaot ol tingting blong man mo ol samting we hat blong man i wantem.”—Hibru 4:12, English Standard Version.

Mining blong Hibru 4:12

Ol tok we God i talem long ol man tru long Baebol, i gat paoa blong soemaot wanem i rili stap long tingting blong olgeta, mo tingting we i pusum olgeta blong mekem samting. Ol tok ya i save jenisim man mo mekem hem i kamgud moa.

“Tok blong God i laef i stap.” “Tok blong God” i minim ol promes blong hem, o tingting we hem i gat fastaem, olsem we i stap long Baebol.a Wan impoten haf blong stamba tingting ya blong hem, hemia se ol man we oli obei long hem bambae oli laef olwe long wol long trufala pis, mo bambae oli joen gud.—Jenesis 1:28; Ol Sam 37:29; Revelesen 21:3, 4.

?Olsem wanem tok blong God, o stamba tingting we hem i talemaot, “i laef i stap”? Tok ya i save gat paoa long hat blong olgeta we oli bilif long hem, i givim hop long olgeta, mo i mekem se laef blong olgeta i gat mining. (Dutronome 30:14; 32:47) Mo tu, tok blong God mo ol promes blong hem oli “laef,” from we God ya we i laef, i stap wok blong mekem ol promes blong hem oli kamtru fulwan. (Jon 5:17) God i no olsem ol man, hem i no fogetem ol promes we hem i mekem, o faenemaot se hem i no naf blong mekem ol promes ya oli kamtru. (Namba 23:19) Tok blong hem “bambae i no kambak long [hem] we i no gat risal blong hem.”—Aesea 55:10, 11.

“Paoa blong [tok blong God] i stap wok.” Yumi save tanem “paoa blong hem i stap wok” i kam “hem i gat paoa,” “hem i stap wok” o “hem i mekem evri samting we [tok blong God] i talem.” Taswe, eni samting we Jehovab God i talem o eni promes we hem i mekem, i sua se bambae i kamtru. (Ol Sam 135:6; Aesea 46:10) Blong talem stret, God i save mekem ol promes blong hem oli kamtru long fasin we yumi neva ekspektem.—Efesas 3:20.c

‘Paoa blong tok blong God i stap wok’ taem i givhan long olgeta we oli tinghae long tok ya, nao oli mekem ol gudfala jenis long laef mo fasin blong olgeta. Ol tijing blong God oli kam haf blong laef blong olgeta, i min se ol tijing ya oli gat paoa long tingting mo fasin blong olgeta, mo ol mak we oli wantem kasem. (Rom 12:2; Efesas 4:24) Long rod ya, “tok blong God . . . i stap wok” long laef blong olgeta we oli akseptem tok ya.—1 Tesalonaeka 2:13.

“Tok blong God . . . i sap moa i bitim naef blong faet we i sap tu saed.” Tok blong God i sap moa i bitim enikaen naef blong faet we man i wokem, from we i save go dip insaed long man. I no gat wan tijing blong man we i save gat paoa olsem tok blong God long hat blong man, hemia ol tingting mo fasin blong man we oli haed. Ol narafala tok long Hibru 4:12 i soemaot samting ya.

“Tok blong God . . . i go dip insaed long man, i seraotem sol mo spirit, mo i seraotem ol joen blong bun long wota blong hem.” Long Baebol, “sol” i save minim fasin we i luk olsem se man i gat, be “spirit” i save minim fasin we man i rili gat. (Galesia 6:18) I olsem we “tok blong God” i save go insaed go kasem ‘wota blong bun,’ hemia ol dip filing mo tingting blong yumi. Taem ol tijing blong Jehova oli soemaot ol fasin blong yumi we narafala i no save luk mo se yumi rili wanem kaen man, oli save pusum yumi blong mekem ol gudfala jenis long fasin blong yumi. Hemia i mekem Krieta blong yumi i glad mo i mekem yumi glad tu.

“Tok blong God . . . i naf blong faenemaot ol tingting mo ol plan we i stap long hat blong man.” Samting we man i mekem taem hem i harem tok blong God, i save soemaot wanem i rili stap long tingting blong hem, ol samting we hem i wantem, tingting we i pusum hem blong mekem samting, mo we i gat paoa long ol fasin blong hem. Sipos wan man i mekem ol jenis we hem i mas mekem taem hem i harem tok blong God, hem i soemaot se hem i gat tingting daon, mo se hem i rili wantem mekem samting we i stret blong mekem Krieta blong hem i glad. Be sipos hem i traem faenem poen long tok blong God, maet hem i stap soemaot se hem i praod, mo i stap tingbaot hem wan nomo. Maet hem i stap traem blong mekem eskius from ol fasin blong hem we God i no laekem.—Jeremaea 17:9; Rom 1:24-27.

Wan buk we i eksplenem Baebol i talem se tok blong God “i save go kasem dip insaed long yumi.” I no gat wan samting long saed blong yumi we God i no save luk, mo we tok blong hem i no save soemaot. Hibru 4:13 i talem se: “Olgeta samting oli stap long klia ples nomo, stret long fes blong hem. Mo long fes blong hem nomo, yumi evriwan i mas talemaot ol fasin blong yumi.”

Ol vas raonabaot long Hibru 4:12

Samwe long yia 61 K.T., God i pulum aposol Pol blong raetem leta blong Hibru long ol Jiu we oli Kristin long Jerusalem mo Judia.

Long japta 3 mo 4 blong Hibru, Pol i tokbaot olsem wanem fasin blong ol man Isrel bifo, i olsem wan woning long ol Kristin. (Hibru 3:8-12; 4:11) Jehova i promes blong tekemaot ol man Isrel long Ijip we oli wok slef, mo lidim olgeta oli go long wan kantri we oli save “stap sef” long hem. (Dutronome 12:9, 10) Be bakegen mo bakegen, ol man Isrel we oli aot long Ijip oli soemaot se oli no bilif long ol promes blong God, mo oli no obei long ol komanmen blong hem. From samting ya, oli no “kasem spel blong [God]” mo oli no stap long pis wetem hem, be oli ded long draeples. Nating se ol pikinini blong olgeta oli kasem Promes Lan, be olgeta tu oli foldaon long fasin ya blong no obei long God. Hemia i mekem se nesen ya i safa bigwan.—Nehemaea 9:29, 30; Ol Sam 95:9-11; Luk 13:34, 35.

Pol i eksplenem se ol Kristin oli mas lanem samting from nogud fasin blong ol man Isrel we oli no stap tru long God. Sipos yumi obei long tok blong hem mo bilif fulwan long ol promes blong hem, yumi save kasem spel blong God we ol man Isrel ya oli no kasem.—Hibru 4:1-3, 11.

Wajem sot video ya blong luk samting we buk blong Hibru i tokbaot.