“Mitufala i Luk Se Jehova i Lidim Mo i Kea Long Mitufala”

Mifala i talem long pris se maet mifala i givim kil long draeva. Hem i ansa se: “!Kilim hem i ded! !Yusum klos blong mi blong waepemaot blad blong hem long han blong yufala!” I tru se mi mi praod long Grik Otodoks Jos we mi gruap long hem, be samtaem biaen, ol tok kros ya i pusum mi blong lego jos. Naoia mi luksave se situesen ya i givhan long mi blong mi faenem trutok long saed blong Jehova.

Faenemaot Trutok Long Saed Blong Jehova

Taon ya Tripoli i stap klosap long solwota, taswe taem mi stap gruap, taon ya i fulap long ol man blong ol defdefren kalja, lanwis, mo jos. Evri famle oli praod long ples we oli kamaot long hem, mo famle blong mi i sem mak. Mi mo ol bigfala brata blong mi, mifala i joenem wan grup we i agensem ol Witnes blong Jehova, nem blong grup ya Ol Soldia Blong Jos.a Mifala i neva mitim wan Witnes, be pris i talem se olgeta oli wan rabis grup we oli agensem Grik Otodoks Jos, mo se lida blong olgeta, hem i wan man we nem blong hem Jehova. Pris i talem bakegen mo bakegen se sipos mifala i luk wan Witnes, mifala i mas atakem hem.

Mi no save se tri brata blong mi oli bin mitim ol Witnes blong Jehova. Be oli no atakem olgeta, oli wantem pruvum se ol Witnes oli rong, ale oli agri blong stadi Baebol wetem olgeta. Wan dei mi kambak long haos, mo mi luk se i gat fulap Witnes oli stap storian long Baebol wetem famle blong mi mo sam neba. !Mi mi kros! ?Olsem wanem ol brata blong mi oli save agensem Otodoks jos? Mi tanraon blong aot bakegen, nao wan neba we i wan dentis mo wan Witnes tu, i talem long mi blong sidaon mo lesin. Wan fren blong famle i stap yusum Baebol blong mi blong ridim Ol Sam 83:18 long bigfala voes. Wantaem nomo, mi luksave se pris i giaman long mifala. !Jehova i no lida blong wan rabis grup, be hem i trufala God!

Mi wantem save moa long saed blong Jehova, ale mi joenem Baebol stadi we Brata Michel Aboud i lidim long haos blong mifala. Wan dei, wan fren we i joenem stadi ya, i askem wan kwestin we mi stap tingbaot long ful laef blong mi. Hem i askem se: “Traem talem long mi, ?hu i krietem God?” Brata Aboud i poenem wan puskat we i stap slip long jea. Hem i eksplenem se ol puskat oli no naf blong kasem save ol toktok mo tingting blong ol man. Long sem fasin, yumi no naf blong kasem save plante samting long saed blong God. Pijatok ya i givhan long mi blong luksave se i gat sam samting long saed blong Jehova we mi no naf blong kasem save long olgeta. Smoltaem biaen, mi givim laef blong mi long Jehova God, mo long 1946 taem mi gat 15 yia, mi mi baptaes.

Wok Blong Paenia i Givim Mining Long Laef Blong Mi

Long 1948, mi stat blong wok wetem brata blong mi Hanna, long bisnes blong hem blong tekem foto. Stoa blong hem i stap klosap long wan stoa blong salem ol samting blong pentem haos, mo wan brata we nem blong hem Najib Salemb i ona blong stoa ya. Najib i gat strong tingting blong talemaot gud nius, mo hem i gohed blong mekem olsem go kasem we hem i ded, taem hem i gat 100 yia. Taem mi go prij wetem hem long ol vilej, mi luk se hem i no fraet nating sipos man i agensem hem. Mo tu, hem i save statem wan storian long saed blong Baebol wetem eni man, nomata se hem i blong wanem jos. Gudfala eksampol blong hem i gat paoa long ful laef blong mi.

Wan dei, wan sista blong Lebanon we i stap long Yunaeted Stet, nem blong hem Mary Shaayah, i kam visitim mifala long ples blong wok. Hem i bisi oltaem from we hem i wan mama, be antap long hemia, hem i paenia. Visit blong hem i jenisim laef blong mi. Mary i gohed blong tu aoa blong serem ol ekspiriens we hem i gat long wok blong prij. Bifo we hem i aot, hem i lukluk mi mo i talem se: “Milto, yu yu no mared, ?from wanem yu no paenia?” Mi mekem eskius, mi talem se mi mas wok blong kasem naf mane blong laef. Hem i askem se: “?Mi mi stap hamas aoa wetem yu tede?” Mi talem se “Ating tu aoa.” Hem i se: “Long tu aoa ya, yu no mekem wan wok nating. Sipos yu prij tu aoa evri dei, yu save paenia. Traem blong wan yia, mo afta, yu save luk sipos yu wantem gohed o nogat.”

Long ples blong mifala, ol man oli no lesin long advaes blong woman, be mi harem se ol tok blong hem oli stret. Tu manis biaen, long Jenuware 1952, mi stat blong paenia. Samwe long 18 manis biaen, mi kasem invetesen blong joen long namba 22 klas blong Skul Blong Gilead.

Afta long skul ya, oli sanem mi mi go long Medel Is. Bifo we wan yia i pas, mi maredem Doris Wood, wan hapi sista blong Inglan we hem tu i misinari long Medel Is.

Talemaot Trutok Blong Baebol Long Siria

Jes afta we mitufala i mared, oli askem long mitufala blong go long taon ya Aleppa long Siria. Gavman long ples ya i putum tabu long wok blong prij, taswe mitufala i statem ol Baebol stadi wetem ol man nomo we ol narafala oli talem se oli intres.

Wan dei, mitufala i visitim wan woman we i bin soemaot intres long Baebol. Woman ya i fraet tumas, i stap seksek, mo i talem se: “!Lukaot! Polis i jes kam long ples ya. Oli wantem save se haos blong yutufala i stap wea.” I klia se sikret polis i save weples mitufala i go blong mekem ol Baebol stadi. Mitufala i kolem ol brata we oli lukaot long wok long Medel Is, mo oli talem long mitufala blong aot long kantri ya kwiktaem. Mitufala i harem nogud blong lego ol Baebol stadi, be mitufala i harem save se Jehova i stap protektem mitufala.

Long Irak, Jehova i Lidim Mitufala

Long 1955, oli askem long mitufala blong go long Baghdad long Irak. Mitufala i save prij long Irak sipos mitufala i lukaotgud, be mitufala i prij moa long olgeta we oli talem se oli Kristin.

Mo tu, mitufala i traem blong storian wetem ol Muslim long maket mo long rod. Plante taem Doris i talem ol toktok we oli pulum tingting blong ol man we hem i mitim. Wan eksampol, hem i talem se: “Oltaem papa blong mi i bin talem se yumi evriwan i mas talemaot ol fasin blong yumi long God.” (Rom 14:12) Afta, hem i talem se: “Hemia i halpem mi bigwan long laef blong mi. ?Wanem tingting blong yu long ol tok ya?”

Mitufala i harem gud blong wok wetem ol brata long Baghdad blong klosap tri yia, mo givhan long olgeta blong prij long waes fasin. Mifala i mekem ol miting long Arabik lanwis long haos blong ol misinari. Mifala i glad tumas blong welkamem sam man Asiria we oli stap talem se oli Kristin, be oli wantem save God moa. Taem oli luk se mifala i lavlavem mifala mo joengud long ol miting, oli luksave se mifala i trufala disaepol blong Jisas.—Jon 13:35.

Wan long olgeta we i laekem tumas gud nius blong pis we mifala i stap tokbaot, hemia Nicolas Aziz, wan kaen mo kwaet man we i gat pikinini, mo i kamaot long laen blong Amenia mo Asiria. Nicolas mo waef blong hem Helen, tufala i kwik blong akseptem tijing blong Baebol se Jehova mo Pikinini blong hem Jisas, tufala i tu defren man. (1 Korin 8:5, 6) Mi tingbaot yet dei we Nicolas mo 20 narafala oli baptaes long Yufretes Reva.

Jehova i Halpem Mitufala Long Iran

Smoltaem afta long rebelian we i kilim i ded King Faisal 2 blong Irak long 14 Julae 1958, oli aotem mitufala i go long Iran. Long ples ya, mitufala i lukaot gud taem mitufala i gohed blong sikis manis blong prij long ol man blong ol narafala kantri.

Jes bifo we mitufala i aot long Tehran, kapital blong Iran, ol polis oli tekem mi mi go long polis stesen blong kwestinim mi. Mi luksave se oli stap wajem mitufala oltaem. Afta, mi ring long Doris blong talem long hem se ol polis oli stap wajem mitufala. Mitufala i luk se i moa sef sipos mi no gobak long haos, be mitufala i stap wanwan go kasem we mitufala i aot long kantri.

Doris i faenem wan sefples blong stap long hem go kasem we mitufala i mit long epot. ?Be olsem wanem hem i save kasem epot we polis i no luk hem? Doris i prea long Jehova long saed ya.

Wantaem nomo, bigfala ren i foldaon, mo ol man wetem ol polis tu oli go haed insaed. I no gat man i stap long rod, ale Doris i go kwik long epot. Hem i talem se: “!Ren ya i wan merikel stret!”

Afta, ol brata oli askem long mitufala blong go long wan narafala ples, blong prij long ol man blong ol defren kantri mo jos. Long 1961, mi mekem wok blong eria elda, mo mitufala i visitim ol brata mo sista long ol defren ples long Medel Is.

Mitufala i Luk Spirit Blong Jehova i Wok

Taem mi stap prij long Medel Is, plante taem mi luk paoa blong tabu spirit blong mekem ol man oli joen gud. Mi tingbaot yet taem ya we mi mekem Baebol stadi long tu man Palestaen, Eddy mo Nicolas, we tufala i no fraet blong toktok. Tufala i laekem ol miting, be tufala i stopem Baebol stadi from we tufala i strong long politik. Mi prea long Jehova blong i openem hat blong tufala blong akseptem trutok. Taem tufala i luksave se God bambae i stretem ol problem blong olgeta man, i no ol man Palestaen nomo, tufala i stat blong stadi bakegen. (Aesea 2:4) Tufala i lego tingting ya se kantri blong tufala i gud moa i bitim ol narafala kantri, ale biaen tufala i baptaes. Samtaem biaen, Nicolas i kam wan eria elda we i wok wetem strong tingting.

Taem mi mo Doris i go long ol defren kantri, mitufala i sapraes long ol brata mo sista, we oli stap holemstrong nomata wanem trabol oli fesem. Taem mi mekem wok blong eria elda, mi traehad blong kamfotem olgeta, from we i no isi blong oli stanap strong. (Rom 1:11, 12) Oltaem mi holem tingting ya se mi mi sem mak nomo long olgeta. (1 Korin 9:22) Mi glad tumas blong leftemap tingting blong olgeta taem oli nidim.

Mitufala i harem gud tumas taem plante we mitufala i stadi wetem olgeta oli kam ol gudfala man blong Jehova. Samfala oli tekem ol famle blong olgeta oli go long ol narafala kantri blong ronwe long denja. Oli stap givhan bigwan long ol brata mo sista we oli toktok Arabik long ol kantri olsem Kanada, Ostrelia, Yunaeted Stet, mo Yurop. Long ol yia we oli jes pas, sam pikinini blong olgeta oli kambak long Medel Is blong mekem wok blong prij long ples we i gat nid. !Mi mo Doris i glad tumas blong gat plante brata mo sista raonabaot long mitufala, we oli olsem ol pikinini mo smol bubu blong mitufala!

Dipen Long Jehova Blong Olwe

Long ful laef blong mitufala, mitufala i luk se Jehova i lidim mo i kea long mitufala long plante defren rod. Mi mi talem tangkiu long hem from we hem i halpem mi blong jenisim fasin ya we mi gat taem mi yangfala, nao mi no moa flas from kantri blong mi, mo mi no moa agensem sam narafala. Trening we mi kasem long ol brata we oli no fraet mo oli mekem i sem mak long olgeta man, i rerem mi blong serem trutok blong Baebol wetem ol man blong ol defdefren kantri. Taem mi mo Doris i go long ol defren kantri, mitufala i fesem plante hadtaem, mo samtaem mitufala i no save wanem bambae i hapen. Be hemia i tijim mitufala blong dipen fulwan long Jehova God, i no long paoa blong mitufala.—Ol Sam 16:8.

Taem mi tingting bak long ol yia we mi mekem wok blong Papa blong mi long heven, mi luksave se mi neva save pembak hem from ol gudfala samting we hem i mekem long mi. !Mi agri wetem gudfala waef blong mi Doris, we plante taem hem i stap talem se, i no mas gat wan samting we i blokem mitufala blong wosipim Jehova wetem fulhat, nating sipos mitufala i ded from! Oltaem mitufala i talem tangkiu long Jehova from we hem i letem mitufala i talemaot ol tok blong pis long Medel Is. (Ol Sam 46:8, 9) Mitufala i stap lukluk i go long fiuja wetem strong tingting, from we mitufala i save se Jehova bambae i gohed blong lidim mo protektem olgeta we oli dipen long hem.—Aesea 26:3.