Laef Stori

Laet Blong Trutok i Saen Long Medel Is

NAJIB SALEM I TALEM STORI YA

Long faswan handred yia K.T.,a laet we i kamaot long Tok blong God i saenaot long Medel Is i go kasem ol ples farawe long wol. Long ol yia 19 handred, laet ya i kambak bakegen long ples ya. Naoia bambae mi tokbaot long yufala olsem wanem samting ya i hapen.

MI BON long yia 1913, long taon blong Amioun long not blong Lebanon. Hemia laswan yia blong wan kwaet taem long wol, from we wan yia biaen, Wolwo I i stat. Taem faet ya i finis long 1918, Lebanon we ol man i luk hem olsem perel blong Medel Is, i kam wan kantri we ekonomi mo politik blong hem i brokdaon olgeta.

Long 1920, taem postofis i stat blong wok bakegen long Lebanon, ol manples we oli laef long ol narafala kantri oli stap sanem leta i kam. Sam long olgeta we i mekem olsem, hemia tufala angkel blong mi, Abdullah mo George Ghantous. Tufala i raet long papa blong tufala, Habib Ghantous, bubu man blong mi, mo tufala i tokbaot Kingdom blong God long hem. (Matiu 24:14) Taem bubu blong mi i storebaot ol samting we tufala boe blong hem tufala i raetem long ol leta ya, ol man blong taon oli jikim hem. Ol man ya oli mekem toktok i goraon se tufala boe blong Habib oli stap pulum papa blong tufala blong salem graon blong hem, blong pem wan dongki, mo go prij.

Laet i Stat Blong Saenaot

Wan yia biaen, long 1921, Michel Aboud, we i bin laef long Brooklyn, wan eria long taon blong New York, Yunaeted Stet, i kambak long Tripoli, Lebanon. Hem i wan Baebol Studen, hemia nem we ol Witnes blong Jeova oli bin karem bifo. Nating se bighaf blong ol fren mo famle blong Brata Aboud oli no intres long mesej blong Baebol, i gat tu man we tufala i intres long mesej ya, plante man oli savegud tufala. Wan i tija, nem blong hem Ibrahim Atiyeh, mo narawan i wan dokta blong tut we nem blong hem Hanna Shammas. Dokta Shammas i letem ol brata oli yusum haos mo klinik blong hem blong mekem ol Kristin miting long hem.

Taem Brata Aboud mo Brata Shammas i kam visitim ples blong mifala long Amioun, mi mi wan yang boe nomo. Visit blong tufala i rili gat paoa long mi, mo mi stat blong folem Brata Aboud long wok blong prij. Blong 40 yia, mitufala i stap joen tugeta oltaem long wok blong prij gogo kasem we Brata Aboud i ded long 1963.

Bitwin ol yia 1922 mo 1925, laet blong trutok blong Baebol i saenaot bigwan long plante vilej, long not blong Lebanon. Samwe long 20 kasem 30 man oli stap mit wanples blong tokbaot Baebol long haos blong sam man, olsem haos blong mifala long Amioun. Be, ol lida blong skul oli stap sanem ol pikinini oli kam blong kilkilim ol tin mo singaot bigwan blong stopem miting blong mifala. From samting ya, samtaem mifala i mekem ol miting ya long bus.

Taem mi yangfala, strong tingting we mi gat long wok blong prij—mo blong joen long evri Kristin miting—i mekem se oli stap singaot mi Timoti. Daerekta blong skul i givim oda long mi blong mi stop blong go long ol miting. Mi no lesin long hem, ale oli sakemaot mi long skul.

Givim Witnes Long Ol Ples We Baebol i Tokbaot

Stret afta baptaes blong mi long 1933, mi statem wok blong paenia, hemia nem we ol Witnes blong Jeova oli yusum blong talem olgeta we oli prij fultaem. Nating se long taem ya mifala i no plante, be mifala i prij long bighaf blong ol vilej long not blong Lebanon i go kasem Beirut wetem ol vilej raonabaot long hem mo i go kasem saot blong Lebanon. Long ol yia ya, plante taem mifala i wokbaot leg nomo no mifala i klaem long dongki, olsem Jisas Kraes mo ol man blong hem oli bin mekem long faswan handred yia.

Long 1936, Yousef Rahhal, wan Witnes blong Lebanon we i stap laef long Yunaeted Stet blong plante yia finis, i kambak bakegen blong visitim kantri blong hem. Hem i tekem sam mesin blong saon mo tu fonograf i kam wetem hem. Mifala i stanemap ol mesin ya antap long wan olfala trak, mo mifala i go olbaot long Lebanon mo Siria blong talemaot mesej blong Baebol long ol ples we i longwe tumas. Laodspika blong mifala i mekem se ol man we oli stap bitim 10 kilometa longwe oli save harem mesej ya. Ol man oli go antap long ruf blong haos blong olgeta blong lesin long voes ya we oli talem se hem i kamaot long heven. Olgeta we oli stap long garen oli lego wok blong olgeta mo oli kam klosap blong lesin.

Long koltaem blong 1937, mi mekem laswan trip blong mi wetem Yousef Rahhal blong go long Aleppo, Siria. Bifo we hem i gobak long Yunaeted Stet, mifala i go tu long Palestaen. Long ples ya, mifala i visitim ol taon blong Haifa mo Jerusalem, wetem ol vilej afsaed long taon. Mifala i mitim Ibrahim Shehadi, wan man we mi bin save hem tru long leta nomo. Ibrahim i gruap gud long save blong hem long Baebol, mekem se taem mifala i visitim hem, hem i stat joen long wok blong prij wetem mifala.—Ol Wok 20:20.

Mi wantem tumas blong mitim Tija Khalil Kobrossi. Hem i wan strong Katolik be biaen hem i stat stadi Baebol wetem ol Witnes blong Jeova tru long leta. ?Olsem wanem hem i bin kasem adres blong ol Witnes long Lebanon? Long Haifa, man blong wan stoa i tekem wan pepa blong kavremap olting we Khalil i pem. Pepa ya hem i terem long wan buk blong ol Witnes blong Jeova, mo adres blong mifala i stap long pepa ya. Mifala i gat wan gudfala storian tugeta, mo biaen, long 1939, hem i kam long Tripoli blong tekem baptaes.

Long 1937, Petros Lagakos i kam long Tripoli wetem waef blong hem. Long sam yia biaen, mitrifala i kavremap bighaf blong Lebanon, mo Siria, blong tokbaot mesej blong Kingdom long ol man. Bifo we Brata Lagakos i ded long 1943, ol Witnes oli karem laet blong trutok i go long bighaf blong ol taon mo vilej blong Lebanon, Siria, mo Palestaen. Samtaem, samwe 30 blong mifala i mas aot eli olsem 3 klok moning long trak no bas blong go kasem ol ples we i longwe tumas.

Long ol yia 1940, Ibrahim Atiyeh i transletem Wajtaoa magasin i go long lanwis blong ol man Arab. Biaen, mi raetemdaon fo kopi blong magasin ya mo sanem i go long ol Witnes long Palestaen, Siria, mo Ijip. Taem we Wolwo 2 i gohed, fasin blong agensem wok blong prij i kam antap bigwan. Be, mifala i gohed blong stap kasem ol man long Medel Is we oli laekem ol trutok blong Baebol. Mi droem wan map blong ol taon mo ol vilej raonabaot, mo mifala i putum mak se bambae mifala i mas karem gud nius i go kasem olgeta ples ya.

Long 1944, taem Wolwo II i stap gohed strong, mi maredem Evelyn, gel blong Michel Aboud, fren blong mi we mitufala i stap paenia wanples. Biaen, mi mo Evelyn, mitufala i gat tri pikinini, wan gel mo tu boe.

Wok Wetem Ol Misinari

Stret afta we wo i finis, ol faswan misinari blong Gilead Skul, oli kasem Lebanon. Risal we i kamaot se, faswan kongregesen i stanap, mo oli putumap mi olsem man blong lukaot long kongregesen. Biaen, long 1947, Nathan H. Knorr wetem sekretari blong hem, Milton G. Henschel, tufala i visitim Lebanon mo oli rili leftemap tingting blong ol brata. Afta long hemia, i gat sam moa misinari i kam. Oli halpem mifala bigwan blong mekem plan long minista wok blong mifala mo blong lidim ol miting blong kongregesen.

Long wan trip we mifala i mekem i go long wan ples we i longwe tumas long Siria, wan bisop blong ples ya i agensem mifala. Hem i talem giaman toktok se mifala i stap givimaot ol buk blong wan grup we oli kolem olgeta ol man blong Saeon. Samting we i narakaen se, bifo long yia 1948, ol lida blong skul oli talem plante taem se mifala i “Komunis.” Be naoia, oli holem mifala mo oli askem kwestin long mifala blong tu aoa, long ol aoa ya mifala i givim gudfala witnes.

Long en blong tu aoa ya, jaj we i lesin long kot kes ya i talem se: “Nating we mi no glad long bisop we i putum yufala long kot, mi mas talem tangkiu long hem from we hem i givim janis long mi blong mi mitim yufala mo save moa long ol tijing blong yufala.” Nao hem i talem sore long mifala from trabol ya.

Ten yia biaen, taem mi stap long wan bas mo mi stap go long Beirut, mi stat stori wetem wan man we i sidaon klosap long mi, hem i wan man blong wokem ol mesin blong wok long garen. Hem i lesin gud blong sam menet taem mifala i eksplenem bilif blong mifala, afta hem i talem se hem i harem finis semkaen toktok ya we wan fren blong hem long Siria i bin talem long hem. ?Hu ya fren ya? !Hem i jaj ya we i bin lesin long kot kes blong mifala ten yia bifo!

Long ol yia 1950, mi visitim ol Witnes blong Irak mo mi joen wetem olgeta long wok blong prij long ol haos wanwan. Mi spenem plante dei tu long Jordan mo long Wes Bank. Long 1951, wan grup blong fo Witnes i bin go long Betlehem, mo mi mi wan long olgeta. Mifala i mekem Lodsapa long ples ya. Eli long dei ya, olgeta we oli kam from Kakae blong Masta, oli tekem bas mo oli go long Jodan Reva, mo long ples ya, 22 man i tekem baptaes blong soemaot se oli givim laef blong olgeta long Jeova. Taem ol man long eria ya oli tok agensem mifala, mifala i stap talem se: “!Mifala i kam blong talem se wan long ol prapa pikinini blong yufala bambae i kam King antap long ful wol! ?From wanem yufala i kros? !Yufala i mas glad from!”

Prij Long Hadtaem

Plante man long Medel Is oli gud, oli gat fasin daon mo oli glad blong tekem man i kam long haos blong olgeta. Plante oli intres blong lesin long mesej blong Kingdom blong God. Ol man oli haremgud tumas taem oli save se promes ya blong Baebol klosap i kamtru we i talem se: “God bambae i kampani wetem [ol man blong hem]. . . . Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem.”—Revelesen 21:3, 4.

Mi faenemaot se ol man we oli agensem mifala moa, hemia ol man we oli no kasem save long wok blong mifala mo mesej we mifala i karem. Ol lida blong skul blong Krisendom oli talem plante giaman toktok blong spolem nem blong mifala. Taswe long 1975, taem wan faet i kamaot long Lebanon, mo i gohed blong bitim 15 yia, ol Witnes oli fesem plante hadtaem.

Wan taem mi stap mekem Baebol stadi wetem wan famle we i bin strong long skul blong olgeta. Oli gohed gud blong lanem ol trutok blong Baebol, mekem se ol lida blong skul oli kros. Nao, long wan naet, wan grup blong skul we i stap long ples ya, i pusum ol memba blong hem blong spolem stoa blong famle ya, mo oli bonem ol samting insaed long stoa ya we praes blong hem i kasem samples long 10,000 U.S. dola. Long sem naet ya oli kam mo karemaot mi long haos blong mi. Be, mi gat janis blong toktok wetem lida blong olgeta, mo eksplenem long hem se sipos hem wetem ol man blong hem oli rili Kristin bambae oli no mekem ol bigfala trabol olsem. Taem mi talem olsem, hem i talem long draeva blong i stopem trak mo i givim oda long mi blong kamaot long trak.

Long wan narafala taem, fo man blong ami i kam tekemaot mi. Lida blong olgeta i tok strong long mi plante taem se bambae hem i sutum mi, be wantaem nomo hem i jenisim tingting blong hem, mo i letem mi mi gofri. Tu blong ol man ya i stap naoia long kalabus from fasin blong kilim man i ded mo stil, mo tufala narawan ol man oli kilim tufala i ded.

Sam Narafala Janis Blong Givim Witnes

Plante taem mi gat janis blong flae long wan kantri i go long narawan. Wan taem we mi karem plen long Beirut blong go long Yunaeted Stet, mi sidaon klosap long wan man Lebanon we bifo hem i minista blong foren afeas, nem blong hem Charles Malek. Hem i lesin gud long mi mo i glad long olgeta vas blong Baebol we mi ridim long hem. Biaen, hem i talem se hem i bin go long wan skul long Tripoli mo tija blong hem i Ibrahim Atiyeh, faswan man ya we papa blong waef blong mi i bin soem trutok blong Baebol long hem. Masta Malek i talem se Ibrahim i bin tijim hem blong gat respek long Baebol.

Wan narafala taem we mi tekem plen, mi sidaon klosap long wan man Palestaen we i wan wokman blong Yunaeted Nesen. Mi gat janis blong talemaot gud nius blong Kingdom long hem. Biaen hem i soem mi long famle blong brata blong hem we i stap long New York, ale plante taem mi stap go visitim olgeta longwe. Mi gat wan famle tu we i wok long bilding blong Yunaeted Nesen long New York. Wan dei mi go visitim hem long ofis blong hem mo mi spenem tri aoa blong tokbaot Kingdom blong God long hem.

Naoia mi gat 88 yia, mo mi naf yet blong mekem sam wok insaed long kongregesen. Waef blong mi, Evelyn, i stap gohed yet blong mekem wok blong Jeova wetem mi. Gel blong mitufala i mared long wan seket elda we tede i wok olsem elda long wan kongregesen long Beirut. Gel blong tufala tu i wan Witnes. Laswan boe blong mitufala wetem waef blong hem oli Witnes, mo gel blong tufala tu i stap long trutok. Long saed blong olfala boe blong mitufala, mitufala i putum Kristin bilif long hat blong hem, mo mi hop se wan dei bambae hem i save folem bilif ya.

Long 1933, oli putum mi blong wok olsem wan paenia—mi faswan paenia long Medel Is. Wok we mi mekem blong Jeova olsem wan paenia long ol laswan 68 yia, oli beswan samting we mi mekem long laef blong mi. Mo mi gat strong tingting blong gohed blong wokbaot long laet blong trutok we hem i givim.

[Futnot]

[Tok blong pija long pej 23]

Najib long 1935

[Tok blong pija long pej 24]

Wan long ol trak ya wetem laodspika blong talemaot mesej long ol man, hemia long ol hil blong Lebanon long 1940

[Tok blong pija long pej 25]

Antap, stat long lefsaed: Najib, Evelyn, gel blong tufala, Brata Aboud mo olfala boe blong Najib, long 1952

Daon (long fored): Brata Shammas, Brata Knorr, Brata Aboud, mo Brata Henschel long haos blong Najib, Tripoli, long 1952

[Tok blong pija long pej 26]

Najib mo waef blong hem, Evelyn